Mo Sapuak

Sunglamte in mo lei ni-in a hi a, ahun lem ni khat in, a mo khak nu uh a gawhzawh cia khat sa gawh thei uhi. Tua mo sagawh, a hi kei leh an puak pen, ‘an tawi’ kici hi. A hunsial in Monu in a nungsang lampanin anlim nono a minsa in Tek lepite tut thei den zel a, tuate zong ‘antawi’ kici veve thei hi.

Mo sagawhna ah, akhe 3, apangsa 1, a ik 1, ahuai 1, a phukka 1, agil khap 1, le lukhungsa cihteng kipuasak hi. Monu kimasuanin hih, moken vanteng pua in kiciah khia a, Mo leite kongbiang a kitun ciangin Thusapi pa in kiko vengvangin upna pulakna nei hi.

“ ….. Hei ! tanu tawh hong tung ing ei, tapa tawh hong tung ing ei!

Sumnu tawh hong tung ing ei, sumpa tawh hong tung ing ei!

Sialpi tawh hong tung ing ei, sialtal tawh hong tung ing ei!

Mimza tawh hong tung ing ei, taangza tawh hong tung ing ei!….”

ci–in kikovakvak a, tuangkhawng hi. Monu leh vaiciah teng innsung ah kilutsuak pahhi.

Monu pen a tongsate songpi nuai pana songpi nuai mah ah a, lut ahih leh moliah man Ks.1/-,songpi nuai a lutlo ahih leh moliah man /-50 (hamu) kipia hi. Monu in ama moliah dingpen ama sanggamnumeite sung pan a hi a, a kihualpih pen lawmnu ahi zongin sam thei hi. Ni nih, ni thum sung moliah nu in Monu sep ding semsak a, Monu in a Pasal tawh a lupkhop ni lang khat moliah nu hun a beita hi.