Fisher Quartet Thu
Rev Gin Khaw Khai, Rev Thang Khan Suan, Rev Dai Khen Mang leh Evan Awn Sian Pau te tungtawn in “Fishers of Men Quartet” cih hong piang khia hi. “Ka nung hong zui in, mi man te kong suak sak ding hi.” (Mk 1:17) leh ka hin laiteng ka Pasian phatna la kasa ding hi. (Lt.104:35) bulphuh a hong piang khia ahi hi. Mi khempeuh in phatna la asak nop nading la aw man leh aw kim tawh asak theih nading, biakpiak na ah phatna athupit zia akitel semsem nading, khangno te in phatna leh Biakna ah nuam asak theih nading, phatna late hangin satan vangletna pan suakta a, damna leh lungnopna ngah nading deihna hi.
Hih min “Fishers of Men Quartet” zong Rev Cin Khaw Khai Ph.D, California a Myanmar Full-Life Mission Church Pastor in aphuah sak ahi hi. Kawlgam sung State le Division tuamtuam ah kisam a, Gamdang pen Malaysia, Singapore, India gam Lamka leh Mi zoram, Philippine-Bagio ten ahunhun in sam in paizel uh hi. Hih bangin Topa phatna tawh mapan zawh kum 24 a cin ciang in yangon a Grace Music Institute in 22.1.2010 ni-in Pahtawina (Honorary Music Award) pia hi.
Rev Gin Khaw Khai: Fishers of Men Quartet makai pi pa hi. Phaiza khua Pa Thang Khua Lang leh Nu Goih Khaw Man te sung pan 5.5.1956 ni-in suak hi. West Bengal Bible College, Culcutta ah C.Th, B.Th zo hi. Tedim Bethel Bible College in B.C.Min pahtawina pia hi. Sakollam Pentecostal AG ah pastor sem a, Pawlpi inn 123, Pawlpi mi 500 kem hi. Phatna la dawng 25 phuak hi. Nu Cing En Vung tawh Jan 8,1979 ni-in pumkhat suak a, tanu tapa 6 nei uh hi.
Tate: (1) Tg Lang Sian Piang B.A, B.Th, USA (2) Lia Dim Sian Kim Matric Pass.(3) Lia Zam Sian Niang B.Th(4) Tg Nang Sian Tuang Matric.
Rev Thang Khan Suan: Kaptel khua Pa Tun Lang leh Nu Khawl Ciin te sung panin 9.9.1952 in suak hi. Tedim Bethel Bible College ah G.Th ngah in B.C.Min kipia thuah hi. 1986 kum akipan Kaptel HMC AG ah pastor sem a, Pawlpi inn 170, Pawlpi mi 900 val kem in nasep pih 12 tawh mapang hi. Phatna la dawng 5 phuak hi. Nu Hau Do Lun tawh pumkhat suak a, tanu tapa 7 nei uh hi.
Rev Dai Khen Mang: Gamlai khua Pa Tuang Kam leh Nu Dim Khaw Zen te sung pan 22.7.1959 niin suak hi. Tedim Bethel Bible College ah B.Min ngahin, B.C.Min pia thuah lai hi. Gamlai AG ah pastor semin Pawlpi inn 65, Pawlpi mi 350 kem hi. Phatna la dawng 10 val phuak hi. Nu Cing Ngaih Lun tawh pumkhat suak in tanu khat nei hi.
Evan Awn Sian Pau: Phaiza khua Pa Am Khan Nang leh Nu Cing Zam te sung pan 1955 kumin suak hi. Tedim Bethel Bible College B.C.Min pia hi. Phaiza AG Pawlpi leh khua kim khua 6 ah Evangelist sem hi. Nu Ciin Ngaih Vung tawh pumkhat suak a, tanu tapa 10 nei hi.