Mi thahat Tawk Thang
Tawk Thang pen pu Thang Suut leh Pi Hial Vung te’ tapa ahi hi.1860 kumin Tungtuang khua ah suak hi. A zi pi Ot Ning hi a, tapa nei lo uh hi. Tawk Thang pen kum 1901 in si hi.
Ama’ hatnate:-
Ukpipa Haucinkhup’ in tuangdung pek pi 48, pi 3 sah letmat 3 a pha pua dingin cial hi. Zawl aw, na tuangdung lah hong puak pih mah ning in, nang zong ann neek khat akpi khat ta tawh hong mehsak in ci hi.
Tonzang ukpi gam sunga pasal hatte in mual dungah lampi sat tawm in miksi sazawn in zawng uh hi. Khatvei luisung khat ah khahsuah in tolhsak uh a, thukpi tak tum hi. Tuaciangin Tawk Thangin liangdap khat hong pia dih vua ci in, a mawngah liangdap dap in pua khia a, a khukdinna kuak pen sai khepheh cia tawh kibang hi.
Tungtuang a pu Awn Khaw Pau te innka laizang a songka ka kua a pha pen Gamlai gama kisui ahi hi. A sui pasal hatte in zawng uh a, tuithungah munah galkah pih uh hi. Tonzang lam gal singkung lakah a puakzia ding uh thei lo uh a, tuithu gal vialcian lamah nusia uh hi. Tua thu Tawk Thang in a theih ciangin amah guak in zan kuan in sing lakah a tung lam in tawi zeu zeu in Tungtuang khua nawlah nga hi. Khuasung pasal te in a muh uh ciangin lamdang sa uh a, a kan uh ciangin Tawk Thang puak ahih lam thei uh hi.
Ukpipa Hau Cin Khup sial sawmnga tawh a ton lai in a ngeina bangin ton kipat ni in song suite ki vaak hi. Zingsang khuavaak ciangin tangvalte in sialte mawlpih dingin sialkongah khau in khih uh hi. Tawk Thang in mipi muhna ah sialte pen aki ah man in a gawngah heek in a mitte a khelkhiat ziau ziau pen lamdang leh muhnop sa in mipite awng ziah ziah hi
A khuapihte Lam Suan leh a lawmte hum in zu nun ni khat in vuak sawm hi. Zunun khek leh ni in zukham ten phin in kilai uh a, Tawk Thangin huansakah khat phungtungah nih, inn nuai ah khat lawn meng meng zo ziau hi.
Phaitu khua a a zawlpa in a innka zawl feet 24 tang 4 tang 2 sah mal 4 a veka na puak zawh leh tang in ci hi. Tawk Thang in lawm hen in pua pah in tang pah hi.
Tungtuang hausa upate in zu leh sa a neek ni khat in to in kilai uh hi Tawk Thang in zo hi. Tuaciangin hausa pa Phut Vum in Tawk Thang pen sing leh suang zong bang kei sik tawh kibang ci hi.
Poding kici loupa bawh hak mah mah khat pen Tawk Thang in a taw bo tawh tep in bawt zo hi. Tua hangin Tonzang khua kiimte in tu dongin poding pen Tawk Thang nel bawh kiak ci uh hi.
A taw ip a tangval ten phen sawm in phen zolo uh hi.
Gua pum nal tunga kah kidemna ah kuamah dang a kahzo om lo hi. Tawk Thang baih takin kahzo hi. Pu Tawk Thang nang bangci kah na hia ci in aki dot ciangin guapum aki tam lo deuh in meek in kah leeng haksa lopi ci hi.
Mizoram ah a sanggam te Tawng Vial leh Thawn Pum tawh zin uh hi. Zawlbukah tangval te in phin phin uh a kilai uh hi. Tawk Thangin a khup a thal in a lom lom in a lot khit ciangin amau laka hat pen leilak a denna leh a siakmit kitam hi.
A sunghte in a lo uh ah an simsak uh hi. A ciah ciangin vaimim bawk sawm giat puak khat in pua hi. Mai pum za zong pua zo hi.
Tungtuang khua tangval ten sialgawh ding a mawlpih uh leh khahsuah uh hi. Tawk Thang a kisil kim lai ko uh a, Tawk Thang in a khut lang khat in a kal hum in a lang khat in sial mei ah man in khawlsak hi.
Tawk Thang a sih ciang in a guh a et uh leh bing hi. A suan a khakte Suangsang khua ah om uh hi. A pu mah bangin midang sangin hat zaw uh hi. Tawk Thang zah lianga hat bel om lo uh hi.
Source: http://thangpinaulak.blogspot.com/2013/01/mihat-tawk-thang-tangthu.html
