Rev Nang Suan Kham @ David Kham (DD)
Pa Thual Zam (Ngaihte) leh Nu Do Khua Nuam (Tanghau) te sung panin 23.11.1966 kumin Tedim Tsp, Buan khua ah suak hi. Pianpih laizom te (1) Dongh Khan Nenh Thang, (2) Pr. Nuam Ngaih Luan @ Siama Luan, (3) En Lawh Cing, (4) Rev Nang Suan Kham @ David Kham, (5) Tun Zen Niang @ Niangboih, (6) Suan Sian Zam @ Zambawk.
Zi leh tate: Pa Lam Za Tinh (S.E.O) leh Nu Lam Za Cing te ii tanu tumpen Sm Neam Kang tawh 16.6.2015 Thursday 7-8 P.M hunin Tedim khuapi Bethel AG biakinn pi ah Rev Dr Khai Khan Suan in siangtho kitenna tawh pumkhat suahna pia hi. Tu laitak in lia Nuam Sian Siam leh Lia Cing Sian Dim, tanu nih nei pan uh hi.
Sangkah sung haksatna: Anu leh apate in pilna deihsak lua ahih manin tuktum khau phelliang, leitawi liangin sang kahsak. Sum zattawm ding haksa lua ahih manin loma pan piang alu peuh zuak tawmin sangkah. Tonsim (Champhai) leh Buan ni nih lampi ah anteh theipuam zuak tawmin namgimtui puasuk in zuakkik a, ngah sunsun tawh sangkah. Kigin (Sani) ni khat veivei cimbeng zongin zuak. Nuntak haksa ahih manin tan sawm ong mial mek.
Tan sawm on khit 1988-1994: Nu leh pa nasep huh Apple cing, sum zong pai zong lawhcingna om ngei mahmah lo. 1989-90 kum khat val kum natin sihna limguam thuk pan Topan honkhia. 1990-93 kumli sung Buan Tuiphum pawlpi sungah lamakai leh khangno makai sem. TBAYF khangno makai thusinna kumsim in pai, ki lamdanna neilo ci-in apa phunzel. 1994 May kha leh June kha sung Khitui Gospel te zui, Sia Do Khup thugenna tungtawn in 1994 kum June kha 22 ni zankim laitak pianthakna bukim kha baptize na ngah.
Pianthak khit lungdamna leh thuakna: Apianthak ciang anu leh pa lungdam mahmah. Tuiphum pawlpi upa ten thusit zel in atawpna ciang khangno makai pan tawpsak. Lehdona atam zahin David Kham pianthak akipan a innsung uh ah thupha ki lamdang. Anu leh pa nangawn khalna kipia in Tuiphum pawlpi pualam ah koihna thuak. Pianthak pan kipan a inn uh suang tawh kideng in suang tum bekbek kumkhat sungin hanbawm khat pha zel. Innkhum sikkang vanglet zihziah. Hakha khua ah zum nasep siau in interview pan kia zel. Ulian meltheih neite bekin ngah.
Lamet ngamloh thupha 1: Hakha khuapi a om State Law Officer Pu On Za Nang in ama khutnuai ah lai-at sem sak. Hakha Ciimnuai Christian Fellowship ah kumli sung Choir leader sem. 1994-1996 Law Officer Pu On Za Nang khutnuai ah, 1996-98 Pu Kap Tial Khutnuai ah lai-at sem, sum tawh leizawh loh KHA thupha tampi ngah kha. Kumpi nasep sungin Pasian sapna (divine calling) ngah. 1998 April kha in kumpi nasep nusia in Laisiangtho sang kah ding yangon zuan.
Lamet ngamloh thupha 2: 1998 pan 2003 dong laisiangtho sangkahna ah Dr. Chin Do Kham in kicing takin huh. Laisiangtho sangkah akipan Rev Dr Suan Za Pau in Word of Hope AG pawlpi in Youth Pastor sem sakin hun lang sia (parttime minister) semsak. 2001-2007 dong youth pastor asep sungin khangno member 15 pan 80 dong khang.
Lamet ngamloh thupha 3: 8.4.2007 Sunday ni-in Olive Christian Church kipankhia. Pawlpi inn 3 tawh pawlpi thak kipankhia in 2015 kumciang inn 60, mimal 200 val. 2014 January kha in Kawlgam bup AG kipawlna pan siampi zaa (ordination) ngah. La lam thupha sanna: Zomi khanlawhna la phuakte lakah atampen phuak mithum lakah khat in kihel. Evan. Langh Do Khup makaihna tawh 1996 kum “Lainatna Aw Series”. TBAYF kum 40 cin mualsuang 1998 kum “Topan Deih Hi” David Kham la 12. Evan. David Khai makaihna tawh 2004 kum “Tho In La Taang In” David Kham la 12. 2007 kum pan kipan David Kham late “Siandeih Zainem” series Vol. 4 hawmta.
Pahtawina tuamtuam te: (1) ZOMUS kipawlna pan, (2) ZCLS pan, (3) Ngaihte beh kipawlna pan. David Kham late paudang tawh a kiletkhia tuamtuam te: (1) Hakha, (2) Falam, (3) Matu, (4) Mindat, (5) Kawl, (6) Mizo, (7) Thahdo, (8) Sihzang, (9) Zo cihbangin amau kammal zat ciat uh tawh letkhia in biakinn te ah kisa hi. (Zomi laphuak te lakah paudang tawh akiletkhiat atampen David Kham late hi kici).(10) Rev.Dr.David Kham @ Nang Suan Kham in August 28,2017 ni-in,The World- Wide Accrediting of Christian Educational Institutions(WWACCEI) Richmond,Virginia, USA ;Apostolic Biblical Theological Seminary, New Delhi, India pan in, HONOURY DOCTOR OF DIVINITY (D.D) lukhu nelkai ngah hi.
Gospel paina munte: Hakha, Falam, Thantlang, Tonzang, Cikha, Khinman, Lamka, Pangzawl, Kansau, Mauvom, Tuimang, Buanli, Tungzang, Tuithang, Lailo, Thuklai, Kaptel, Heilei, Tuicilh, Khuaimual, Suangzang, Tuilang, Dimlo, Far Rawn, Mualbem, Limkhai (Zo+Bungh+Leidawh), Taakkhawl, Voklak, Thuklai, Mualpi (Tonzang) Buanman, Thangnuai, Suangpi, Vangteh, Phunon, Pimpih, Phai, Tahan (Fuller AG), Kalaymyo-Galilee AG, Agape AG, Rhema AG, Zosuan khua, Lamka, Imphal, Champhai, Aizawl, Shillong. Thuklai tuiphum pawlpi- 2010 (Olive Gospel Team-Crusade). Singapore, Malaysia-2008 pan 2012.
Crusade ding sapna ngahna khua leh gamte: (Tdm) Suangzang -1993, (Lasa). Leilum tuiphum pawlpi -1994 (Lasa). Sumcinvum (Lamka)1994 (Lasa). Lawibual tuiphum pawlpi crusade -1994 (lasa). Sezang+ Buanman+ Langzang + Thangzang -1999 (Lasa). Thuklai AG section CA khawmpi Buan khua -2013 (Zinmang :Thugenpi). Kalaymyo, Galilee AG-29.1.2014 (Siandeih zainem late tawh Gospel Concert). USA a om Chicago Zomi Community Church State 20 ah 2014 June kha pan kipanin December kha dong America gam state 20 ah maban zom. Shillong ZBC ah Oct. 1-7, 2015 (zinmang :Thugenpi). Aizawl ABC ah Oct.1518, 2015 (Zinmang :Thugenpi).
Ngimna: Kha Siangtho makaihna tawh pawlpi lianpi nei ding. Mun 1000 ah mission puak ding. (Zec.4:6). Leitung bupah paiding kha mangthang manding (Matt. 28:18-20).