Dr. Cin Khaw Mung, Ph.D
Tonzang gam, Saipimual khua pan in 1984 September 12 ni in Rev. En Za Kap (Tombing) (L) le Nu Niang Go Cing (Siahliap) (L) te sung pan ka piang hi. Unau numei nih leh pasal thum pha in anihna hi. Apu GinZaCin(Tombing (L) in a khua vuah Hausa asep laitakin piang ka hih man in Cin Khaw Mung ci in phuak hi.
1987 kum in Tahan ah lalsuk in tuni ciang teng hi. 1996 May 12 ni in Jesuh gumpa in sang a, Pasian na sem ding cih khensatna tawh Laisiangtho sang kah hi. 2000 January kha in Emmanuel Bible College, Lamka, Manipur, India ah Laisiangtho sang kah ki pan hi. A sang kah sung in gilkialna, hamsatna tampi banah, 2001 August 24 ni in a Pu in ong nusia cih a zakciang in dah mahmah hi. 2002 June kha in Bangalore ah sangkah na maban zom ding in pai kik a, Calvin Theological College ah kum khat kah hi. Sum le paai, pau le ham a kipan hamsatna tampi phukha hi.
2003 June kha apat 2009 March kha ciang Berean Baptist Bible College & Seminary ah kah in B.Th, B.Div, M.Div le M.Th. degree te ngah hi. 2006 March kha in B.Th zo in, innlam ciah nuam a sum neih loh na hangin ciah zolo hi. B.Div. kah kum 2006 December 7 ni in a pa in emial khak a, a nu sih gen ahih manin khitui nap tui tawh om hi. B.Th. zawh khit phet in ciah zo leh a nu tawh ki mu man ding cih bekbek ngaihsun hi. Thanem pipi in B.Div zom a, Piano tum in sang sum kisik tawm hi. M.Div. a man khit ciangin a siapi pa huhna tawh innah ciah zo hi. Bangalore ah kum guk sung khatvei bek ciah hi. Inn a tun ciangin a pa zong dam lo ahih manin mel theih te in a sang zom loin a pa a khoi zawk ding kho uh hi. Apai na sang zop zawk ding tha pia hi.
A pa in Lai Siang tho bu lain, “Isaiah26:12,Topa aw, kote tung ah mavanna hong pia in. Kote’ matut zawhna khempeuh nangmah in na hong sepsakna hanga hi hi hi.” simsak hi. Tua khit ciangin apaina lutungah khut ngain thupha apia hi.A pa kiangah Pasian’ nasep ken na zom ning, cih pen a kiho tawpna kammal hi. Ka sangkah sungin na sih leh zong kilungnuam sak in, na maban a zom dingin sang kah ka hi hi, ci-in a pa vaikhak hi. Apa’ lunggulhna bangin sang zom kik hi. M.Th a kah kum 2008 August 6 ni-in apa in nusia hi, ci-in phone ki set hi. Tua kawmkalah khitui naptui mah tawh a sang zom teitei hi. Topa in 2009 March kha in M.Th. zawh pih hi. July 11, 2009 ni in a u pasal in nu sia leuleu hi.
Pasian in hong taisan ahi tam ci-in tamveipi ngaihsun hi. Aih hang Topa’n nusia lo in tonpih, makaih na nisim in phawksak veve hi (Kahla 3:21- 25). 2010 kum pan in Kawlpi Lai Siangtho sang thum ah lai hilh hi. November 20,2011 in a pi in nusia leuleu hi. A nuntakna sungah haksatna, dah na, kahna, lungkham nate in tuihual bangin nawk den in ki ngaihsun hi. Pa Pau Khen Kap (Naulak) le Nu Zen Suan Cing(Gualnam) te tanu neu pen ahi Lia. Lian Ngaih Nem B.Sc tawh May 12, 2012 in ka kiteng uh hi.
Guahzuk khit ciangin ni a hong taan tawh ki bang hi. Tapa khat nei uh hi. Pasian lam hon sakna tawh 2014 August kha in, S.Korea ah sang kahna maban zom hi. Seoul Hanyoung University ah Th.M mah sin in, 2016 June kha in zo hi. Yemyung Graduate University ah,Ph.D asin laitak hi. Anuntakna sungah ka thalakna kammal in, AGUALZO TE LUNGKIA NGEILO, A LUNGKIA TE GUALZO NGEILO, hih kammal ahi hi.