Dr Khai Sawm Tuang (D.Min)
Tedim gam, Sezang khua Pa Tun Khen Pau leh Nu Dim En Niang te tapa thumna hi a, 1975 November 30 ni-in Sezang khua ah suak hi. Zolai tan li dong Sezang khua ah sang kahin, tan
nga pan tan sawm dong No. 2 SHS, Tedim ah sangkah hi. Tan sawm kum nih (1993-94 leh 1994-95) kia in, a kiat ciangin 1996 kumin Tedim Theological College (TTC) ah Lai Siangtho sang kah kipan hi.
Tan sawm onglo ahih manin Dip.Th kah ding, tan sawm ong sa hileh B.Th hiding ahihna hangin tan sawm on nop mahmah na lungsim nei ahih manin a Lai Siangtho sangkah kum nihna 1997-98 kumin Tan sawm a vuan leh ‘B’ bek tawh ong a, lungkialo in a kumkik 1998-99 ciangin vuankik a, 1999 ‘A’ leh ‘B’ kikhen nawnloh kumin Tan sawm ong hi. Tan sawm a on leh TTC sang Siapipa in B.Th kipat pah ding leh Dip.Th zawh dong zop suak ding teelsak a, kum thum sung bang Dip.Th course a sinsa ahih manin zosiang vet a, tua khitteh B.Th zop ding teel in 2000 kumin Dip.Th zo hi.
2000-2001 sang honkik ciangin Siapipa in “Nang pen Tan sawm lah ong a, Dip.Th lah zokhin nahih manin midang te tawh kibang theilo B.Th kumnih in na zo thei ding hi” ci ahih manin zompah a, a kumkik 2001-2002 kumin B.Th zo hi. B.Th Final kum (February-September, 2001), kha giat sung “English for The 21st Century” ah English sin a, Kalaymyo, Tedim, Falam, Hakha center li kigawm sungpan 2nd Prize ngah hi. Lai Siangtho sang kah zoplai ding mah sawm ahih manin B.Th a man kum mah in Myanmar Institute of Theology (MIT) sangpi ah Lai Siangtho sang kah theih nading siau a, 2003 April kha sungin Entrance Exam phi in sang lutkhuan ngah pah ahih manin 2003 kum June kha pan in MIT Insein ah Master of Divinity (M.Div) kah kipan a, 2006 March 11 ni-in zo hi.
Sang a man ciangin inn lam tawmvei ciahto a, ahi zongin sang zop ding lunggulhna hang mah tawh a sawtlo in Yangon lam paisukkik in 2007 November 14 ni-in Philippines gam Philippine Christian University –Union Theological Seminary (PCU-UTS) ah Doctor of Ministry (D.Min) sin thei a, 2012 March 23 ni-in zo hi. 2012 June kha beikuan ciangin Kawlgam ciah hi. A nu a pate Sezang khua pan Kalaymyo ah innkuan in na om uh ahih manin amah zong a nu a pate mah tawh Kalaymyo ah om hi. Emmanuel Baptist Church ah pawl lut in Pawlpi sung leh khangno sungah ahih theih zahin mapang a, 2014 kumin Emmanuel Baptist Church ah Youth President sem hi.
2014 Summer hun sungin KVBC Lai Siangtho ahi Kalay Theological College (KTC) ah Summer English hilh hi. 2014 June kha a kipanin KTC Board of Trustees sapna tawh KTC Lai Siantho sangah Warden leh hunbit laihilh nasep sem hi. 2015 May kha pan in KTC mah ah Principal sem hi. 2014- 2016 sung (SKVBA) Youth Fellowship ah vice-president sem hi. 2014-2016 sung Kalay university pan B.A.(History) kum thumna man hi. 26.6.2016 ni in Pasian piak tapa khat nei a, a min Pau Van Mung phuak hi. 2015 June 13 ni-in Emmanuel Baptist Church Pawlpi mi Pa Hrang Cung leh Nu Hau Dim te tanu lina Lia Thawng Ngun Sui (Sui Sui) tawh pumkhat suahna nei hi.
Dissertation Title: The stage of the Churches in the Tedim Township and the Ecumenical vision practicing Ecumenism in the Zomi Setting.