Zomite Min kisap dan

Min kisap dan;- Tanu tapate in ulenau meltheih sungah a hong bual theih uh ciangin khat-le-khat kisap zia ding leh kihona zia ding a theihloh uh a phamawh hun a hong tun ciangin, innkuan sung, beh sung, khua sunga ulenau tawh kisapna kammalte pan kisintuung a kipanin hilhpah kul hi.

Pu;- Ih Pa’ pa, ih Nu’ pa leh, i nu sanggam pasal teng, i pa’ sanggam pasal teng banah, beh sung papi teng leh, i pu’ khangual teng peuhmah, ‘Pu’ ci-in kisam ciat hi. Min pat masa hiam, minmal tawpna mal tawh kilokhawmin Pu min kilo ciat hi. Ih nute nungsang lam pasal khempeuh, moi leh haam leh, ‘pu’ kici hi.

Pi ;- Ih Pa’ nu, ih Nu’ nu, ih Nu’ sanggam numei teng, leh tuate tawh akikhangual numei khempeuh, ‘Pi’ kici a, i nu’ pasalte’ ziteng, i pa’ pate, sanggam pasalte’ zi teng leh, i nu pianna beh sunga nupi khempeuh zong ‘Pi’ kici hi. A hizongin i nu’ sanggam numeite, abehte zi in a om leh, i nu i phawkna in ‘ Pi’ kici lo a, ‘nu’ in kisam zaw hi.Pa ;- Ih pianna ih pa leh ama sanggam pasal khempeuh, beh sunga i Pa khangual khempeuh, khua sunga i pa’ gual leh a tungsiah a nuaisiah akilawm ciang teng, ‘Pa’ kici hi. Theih ngeiloh i pa’ khangualte leh, i pa’ nite’ ta pasal teng zong ‘pa’ kici hi.

Papi ;- Ih pa unau sung pan, a upa pen, beh sung a pa i cihte unau sungpanin a upa pen, nute unau laka a upen’ pasalte, ‘Papi’ kici thei a, pawl khatte in Papi, Palai, Pano cih bangin lo thei uhi. A tamzawte in ‘Papi’ a a lawh loh teng, a min patna mal a hih keileh a min tawpna mal tawh lokhawmin ‘Pa’ ci ciat uhi.

Ni ;- Ih pianna i Pa’ sanggam numei teng, innlak beh sung papi leh pate sanggam numei teng, nulepa i nite tanumei teng, ‘Ni’ kici hi. Pa’ unau lak panin, numei upen, ‘Nipi’ kici a, tua loteng ‘Ni’ kici hi. Ih gangte’ sanggam numeite zong tanau sung ki-it kihawmthawhna sungah ‘Ni’ mah zong kici thei a, nuam zong kisa zaw hi. Nidang lai-in hausa-numei khempeuh, Nautangte in asap uh ciangin, ‘Ni’ ci-in sam uh a, tuhun ciangin kizang nawnlo kammal suak ta hi.

U ;- Numei ahi a, Pasal ahi zongin, inn sung, beh sung, phung sung, khua sung, ei sanga uzaw peuhmah ‘U’ kici ciat hi. ‘U’ cih bek pawl om a, a minno tawh lokhawm a, ‘U’ cih pawl zong om hi. U cih kammal in a zangte aadingin kiniamkhiatna kammal suak a, a za tadingin zak dan nuamsak hi. Ei sanga nauzaw pipi khat in ‘U’ hong ci nuam kei in, i minmal khawng in hong lo ngalngal tadih leh i lungsim puakdankhat kikhel zo tham hi; ih Pute lam lobuang, ei sanga uzaw mi peuhmah ‘U’ kici hi.

Nau ;- Ei sanga nauzaw peuhmah ‘nau’ cih ding ahih hangin, Nau Lian, Nau Lun cih banga i sapna kizang lo zel ahih manin a minno tawh kilo ziau peuhleh, i nauzaw a hih lam kilang khin ta hi.

Gang ;- Nite pasal khempeuh, leh nidangin hausa numeite pasalte  zong ‘gang’ kici hi. Ih Nipite pasalte ahih leh, ‘Gangpi’ kici pah lel hi.

Nuphal ;- Zite tawh ki-unau, numeite nuphal kici a, a pasalte uh zong, khat le khat nuphal kici veve ciat uhi. Beh khat sungah numeite ciat i pasalte zong khat le khat, nuphal kici ciat uh a, a zite uh zong nuphal mahin kineihpih ciat hi.

Tute ;- Inn sung papi khat leh nupi khat sung pana piang, tapate leh ta numeite sung pana a piangsawn pasal ta hi leh numei ta hi leh ‘tu’ kici hi. Tute sung pana apiang sawn lai teng ‘tusawn’ kici a, tuate tateng, ‘tusawnsawn’ kici lai hi. Mi cidamte in a tusawnsawn ciang mu uhi.

Makte ;- Innsung, beh sung, phung sung pana piang, tapate leh ta numeite pasalte peuhmah ‘mak’ kici a, ‘gang’ i cih khempeuhte in, i makte vive ahi uhi.

Sungh ;- Zite a hong pusuahkhiatna Innpi pen sungte hipaha, abeh aphung teng khempeuh zong ‘sungte’ himangpah hi. Ih makte khempeuh aadingin ei pen, a sungte kihipah hi.

Mo ;- Numeite in a pianna a nu le apa nusia a, midanginn sung khatah pasal a va neih ciangin tua nu pen, a lutna baangkua sungah ‘mo’ a va hi hi. Ni dang lai-in numeite bek midang inn sungah ‘mo’ a,tuhun ciangin, pasal in a zite a vabelh leh, ‘mopa’ a va suak hi.

Teek ;- Monu in a va tunna inn sunga a pasal nu pen, a Teeknu hipah a, a pasal pa pen, a Teepa hipah hi. A tekte baangkua sungah a haam pen pan a moi pen dongin amah pen ‘monu’ ciciat uhi.

Beh ;- Ih pianna gui paipi sungah ei khang panin ta khang, tu khang dongah a piang khempeuh, a si, a hing huamin ‘beh’ kici a, tua sung panin sanggam, thalloh, baangkua-a pang dingte, kila ciat hi. Hih beh khat bekin a sih uh ciangin hankuang khat sung ah kisial khawm mang uhi. Beh khat sung mi ahilo, pute, tute, makte, gangte, ahih uh hangin beh khat sung mi a hih keinak han kuang khat sungah kisialkhawm thei ngei lo hi. A hi zongin beh dang pana, pasal a nei, mote a kileikhinsa ahih nak leh, beh han khat sungah kisialkhawm ding hi. A kileinai lo mo a hih leh, a manawh han kuang ah a kisial theihna dingin, a luang a om sungin kilei hamtang a, tua pen, ‘guhsia lei’ kici-in, a pasal beh han sungah kisial thei pan hi.

Zawl ;- Khua sung pan a hi a, khual pan ahizongin i ki-itpih tuam leh i kiphawkpih deuh, a tuamin om thei a, tua bangte in khat-le-khat, ‘zawl’ a kicituak uhi. Tua ‘zawl’ i kicihpihte in baangkua sungah Sanggam panmun a hong la thei uhi.

Khua & Mipih ;- Beh tuamtuam leh phung tuamtuam ten khopna munpen ‘khua’ kici a, i kibeh tektek se loh hang in mundang ah i beh te leh i beh kibat pih loh, ikhuapih te tawh i kizop na-ah hongki bang thei nai lo hi. Mun dang panin ibehte kiang ahih hang in ikhuapih ana omkholsa te kiang ah kisan zawciat hi.

Zinte ;- Ih tenna khua pan paikhia in, khua dang khat-a meltheihte kiangah va kitung thei, va kigiak thei a, tua laitakin ei pen ‘zinte’ i hi a, i hawhna innneite pen, ‘Inntekte’ kici hi.

Lengla ;- Mi khat peuh inn ah i va hawh leh, i ciahkhiat ma sung ‘lengla’ i hi a, i hawhna innneite pen, ‘Inntekte’ kici hi. ei pen,

Pemta ;- Khua khat panin khua dang khatah a va tengte, ‘pemta’ kici a, a ma lawm taisan a, lawm dang khat-a ava lutte zong, ‘lawmpeem’ kici hi. Tua zui-in ama sawm ciahna mun nusia a, sawm dang a, a va giakte zong, ‘sawmpeem’ kici hi.

Sawm/ Sawmte ;- Pasal note in, nulepa ang ah a lup nawn loh uh ciangun, a lawm a gual lakah va kihel uh a, mun khatah giakkhawm in, tua mun pen, ‘sawm’ kici a, a va giakte zong, ‘sawm’ mah kici hi. Sawm neihna dingin, inn kicing ding, khaam kicing khat nei ding, a inntekte, lengla do siam, gualhuaite hiding, khatveivei, a sawmciahte thalawpna dingin nek-le-dawn a piazote hiding hi. Daipaam vutkhute in sawm a nei thei ding uh hilo hi.

Source: Zomi Encyclopedia pan kila hi.