Ngalngam leh Hangsai

Tuiluang dung(Tuisa dung) ah inn 30 a pha khuakhat a om hi. Tua khua hausapa tanu hoih lua mahmah ahih manin a sawmgiak tangval tengin khatvei tek i *** mateng ci-in a kamciam sim uh hi. Hausapa tanu a mit kildawn naai nuh sakin sawm tangval tengin gual*** uh hi. Nungaknu hong gai a, a hong suah ciangin a pate’n a dot teh sawm tangval teng hi ding ci hi. Tua teh a pa in kihih zau ahih manin a min Zau Hang a phuak hi. Zau Hang in ta a hong neih leuleu ciangin, Zau Hang tapa min Ngal Ngam a phuak uh hi.

Ngal Ngam a hong khantoh cingin, a sabetna-ah mihing keitui dawn sahang aa piang Hang Sai tawh hong kimu uh hi. Ngal Ngam in, “Lawm Hang Sai aw kizawl ni.” a cih leh Hang Sai in zong, “hi hen.” ci-in kizawl uh hi. A zawlta un kithukimin sabeng dingin hong kuankhia pah uh hi. Ngal Ngam in sa pang a, Hang Sai in a hawl leh sa tampi tak suaha, ahi zongin thaltang khat bek nei ahih manin na kap ngam lo hi. Hang Sai in, “Zawl aw, sa hizah hong suak bang dinga na kaplo na hi hiam?” a cih cingin Ngal Ngam in, “Ngal khat hong suak ka kap leh pailetin hih suangkawm-ah ka thal awk hi, hong pai inla dok khawm ni,” ci-in dokkhawm uh hi. A dawhkhop uh ciangin Ngal Ngam in siat suk a, Hang Sai in dokto ahih manin dokkhia zolo uh hi. Ngal Ngam in zong, “Zawl aw, tha leh tha kituak lo hi, kei guak in hong dok ning.” ci-in a mah guakin a dawh leh dawk ziau hi. Tua ciangin Hang Sai in kihta sim pian pah hi.

Tua mun panin sahawl kilaih leuleu a, Ngal Ngam in hawlin Hang Sai in a panna, mual lai khat ah sazuk luang sawm na pet lum hi. “Zawl aw, tu in ih puakna ding theilawng va sat in.” ci-in Ngal ngam a sawl hi. Ngal Ngam in teeipi cia a pha nih va sat hi. Hang Sai in zong sazuk luang sawm, a dawi ai tawh neusak in thei lawng nihte ah tasak hi. Sateng pua in pai uh-a, mual khat a tun uh ciangin, “Zawl Hang Sai aw, i sa em nading hua mualmong a, mei vala in.” ci-in a sawl ciangin Hang Sai zong paipah hi. Mual kua a khupkhit ciangin gamla lai lua ahih manin kilehkika, “Zawl aw gamla lua mahmah in la zo keng, hong kileh kik ing.” a ci hi. Ngal Ngam in, “Nang’ la zolo na hih leh ke’n vala ning.” ci-in pai a, mualpang panin a meisah sat in meide-in a hong ciah hi. Tua mun pan pai leuleu-in mun khatah singkung dangah The-pi khat om Ngal Ngam in a muh ciangin a lawmpa muhloh kalin a thung-ip ah a koih hi. Mual khat a tun ciangin, “Zawl aw suang kilot teh ni,” ci-in suanglot hong kidem a, Hang Sai in suang takpi lawnin mual khat bek a khum hi. Ngal ngam in a The-pi mat a lot leh leng vingveng in mual kua khum hi.

Tua pan mun khatah paileuleu a, Ngal Ngam in Vagik tui tang khat mu-in a thung-ip sungah guangsim leuleu hi. A tawlngakna munah suang-aipaak khat tuaka, Hang Sai in, “Zawlaw hih suang sak tuak mahmah, kipeh teh ni.” ci-in Hang Sai in peta, pet kham zolo hi. Ngal Ngam in zong a thung-ip sunga, Vagiktui lasim khian a, a pehpah leh kitam ziau hi. (Sahang mat ciangin sahang kam-ah suangpaak kipetsaka, en’ aktui i peh pen hih hang ahi hi.)

Tua pan a zawlta un mualtung khatah hong kahto uh-a tua munah suangtum tampitak om a muh uh ciangin Hang Sai in, “Zawl aw, ke’n hih suangpi teng laam sak thei ding hing.” a cih teh, Ngal Ngam in zong, “Laam sak dih veleh mu nuam hang.” a ci hi. Hang Sai in zong phui hongsam in tua suangpi khempeuh a hong laam sak pah hi. Ngal Ngam in tua ai deihgawh ahih manin a sa puakteng tawh na matai in mun khatah na bungkhia hi. “Zawl aw, ka tuuk leh i sateng buaksuah ing, hong guangkik in.” a ci hi. Hang Sai in zong, asa kimkot-ah a ai Khuaimu-in laamlaam saka, a sa khempeuh tawmcik khat a phaksak laitakin Ngal Ngam in a samzangin tua Khuaimu a matsak hi. Hang Sai in, “Zawl aw, ka na khat mang veh aw.” a cih ciangin, Ngal Ngam in, “Ke’n thei kha het keng.” ci-in pia nuam nawnlo hi. Tua zawh ciangin Ngal Ngam in a thalpi tangte a zawlpa laka, “Hih na pa ka ginna, hih na nu ka ginna, hih nang kong ginna,” ci-in a thalpi tang khat bek guang zel thunkikzel hi. Hang Sai in zong ahi mah sa-in, “Zawl aw, ke’n ka na nei nawnlo ka hih teh ka khua-ah ciah ning, hong zui in,” ci-in a zawn hi.

Ngal Ngam in a zan cingin mualtung khatah kahto-in huih khempeuh samsamin an um khat dimin a thun hi. A zingsang Hang Sai a ciah ding ciangin, “Zawl aw kong piakding bangmah neilo ka hih manin hih an-um na pua inla, na inn na tun ma teng hong peuhmah kei in.” ci-in a vaikhak hi. Hang Sai in zong Ngal Ngam kiangah, “Zawl aw, bangmah nei nawnlo ka hih manin mual-ah i kituah leh mual-ah, guamah i kituahleh guamah, ki that ni.” ci-in a vaikhak hi. A kithat zo belbel, “Dawikungpu-sial-kili-nei in ki-ai ni.” ci-in kithukimin kikhen uh hi. Hang Sai a khuanawl a tun teh, ‘ka zawlpa hong guat bang hipeuh mah hiam,’ ci-in a an-um a hon leh huihpi nakpitak nungin Hang Saite khua inn khempeuh a len mang hi.

Ngal Ngam zong ciah in a inn a tun cingin Hang Sai a thah zawh nading a buk tungah milim khat bawla, tua milim tamngai a tumsak hi. Tamngai a zak ciangin Hang Sai hong vak a, milim a muh ciangin hih mipa ka thahnoppa hi ci-in tha khat in milim bawhin hong pet pah hi. Ngal Ngam zong buk sung pan thakhatin lengkhia-in a thalpi tawh Hang Sai a kaplum hi. Hang Sai a thah zawh ciangin a zawlpa tawh a kiciamna thu teng Ngal Ngam in a pa kiangah a gen hi.

Hang Sai tawh akiciamna mah bangin Dawikungpu-sial-kili-nei la dingin Ngal Ngam in a pa a sawl hi. A pa kiangah, “Dawikungpu in, neemna dildial, neem na dildial, ka tung sunni neemna dildial, hong cih leh, nang zong so na vingving, so na vingving ka tung sunni, so na vingveng ci-in thuk in.” ci-in a pa a vaikhak hi. “Na kot a lehlam-ah kong suaklo-a, na uitalpi kualna-ah kong kual hi ci-in gen in” ci-in vaikhakin a paisak hi. A pa zong Dawikungpu kiangah hong paipah a, a tapa vaikhak bangin a gen takteh, Dawikungpu in tungsial khat a pia pah hi. A tungsial kai-in a ciah leh tungsial in lampi-ah a so nelh hi. A pa atun theihloh ciangin Ngal Ngam in va kan a, lampi-ah a tungin a pa na sonelh-in a samzangbek a dawk lai a mu hi. Ngal Ngam in zong, “Ka pa luang sing bang lum, kei man tang bang phong ning.” ci-in a tungtun a suih leh a pa dawkin a phongkhiato hi. Ngal Ngam zong tua pan paisuakin Dawikungpu tawh aikidem pah hi.

Ngal Ngam in Dawikungpu ai zo ahih manin a sial-kili-nei manin kaikhia pah hi. Kongka a tun laitak Dawikungpu in, “Ngal Ngam aw ka it mahmah ka sial-kili-nei nong kaih sak, na khut leh sialkhau kimatcip pah hen,” a cih ciangin Ngal Ngam in dawng kik a, “Nang zong na tutna suangpi leh na taw kimatcip ta hen.” a ci hi. Ngal Ngam khut leh sialkhau kimatcip takpi a, Dawikungpu taw leh suangpi zong kimatcip takpi hi. Dawikungpu hong lau leuleu a, “Ngal Ngam aw ai kileh kik tuak ni.” ci-in a kun hi. Dawi kungpu in, “Ngal Ngam khut leh sialkhau kikhenkik hen.” a cih ciangin a kikhenkik pah hi. Ngal Ngam in zong, “Dawikungpu tawsa bek khat suangpi ah belh henla, a mah paikhia ta hen.” a cih leh, a paikhia thei pah hi. Ngal Ngam in zong Dawikungpu-Sial-kili-nei kai in ciahpiha, inn a tun ciangin a zawlpa Hang Sai aih na-in a go pah hi.

Nikhat ni ciangin Ngal Ngam in a lawmte kiangah, “Dawikungpi va hih ni,” ci-in a zawn hi. Alawmte’n “Hih zo kei ni,” ci-in umlo ahih manin kuamah ngahlo hi. Ngal Ngam in zong a mahguak pai in Dawikungpi inn a tun ciangin, “Pi aw, ka dangtak lua in zu hong lup in.” ci-in inn sung meikiangah a lum hi. Dawikungpi in zong zu lup pah a, a nih un zu dawn khawmin akkhuan dong a paupau uh hi. Dawikungpi in a ngak zawh nawnloh ciangin lup san hi. Dawikungpi a ihmut lam Ngal Ngam in a theih ciangin a cil leh a khaksawh kaikhawmin Dawikungpi nik lem sak in, a na vang sungah phih suk hi. Tua zawh teh, “Pi aw, na ihmut suak lawmlawm ei! Ka hong hih lam zong thei kei teh.” ci-in a phong hi. “Na up kei leh na-na en inla, lawng in.” a cih ciangin a lawn leh kawt nemnam ahih manin, “Aw ong hih petmah na hive maw.” a ci hi. Tua ciangin Dawikungpi in Ngal Ngam kiangah “gen peuhmah ken maw” ci-in “hi hen aw” kici uh hi. Dawikungpi in zong Ngal Ngam in a gen kha hiam ci-in Vacimnote leh Thovaite a zui sak hi.

Nikhat ni ciangin Ngal Ngam in Tuivai dungah ngasa benga, ngasa khat a mat ciangin a ngasa mat khai langlangin Dawikungpi ahihna thu a phuang khial kha laizang hi.

Vacimnote leh Thovaite in za ahih manin a va gen ciangin Dawikungpi in a samsak kik hi. A innsungah zu beeltung khum mahmah lupin Dawikungpi a innka-ah pusuaka, a innpi suangpite khangtosak hi. Ngal Ngam hong pai in a innkhum ah a lentoh laitakin tua suangpi in a dip pan na tepcip pah hi. Ngal Ngam in zong Zulei kiangah, “Tengh khau tung va zui inla, Tui vai gal a ka um va la in.” ci-in a sawl hi. Zulei in ai um tuah kawmin a hong pai ciangin Simbu hong lenga, tui sungah a khiatsak hi. Simbu in lasa pah a “Nang pawh limnga na suak a, kei pawh lo mu ka suak” ci-in van-ah lengto pah hi. Ngal Ngam ai um tui lakah tumsuka, “Ka pu Ngal Ngam koi-ah na om hiam?” ci hi. “Tuivai dungah kei ka lam diaidiai.” ci-in awng hi. Tua ai um in thugen-a, “Ka pu ka pate in mi a bum ciangin hih bang teng phuisam in nei hi.” ci-in a gen hi. “A lehkik ciangin zong hih bangin phuisam hi.” ci-in a genkhia hi.

Singkung a sihsak nop ciangin hih bangin phuisam in a lehkik ciangin zong hih bangin phuisam hi ci-in genkhia hi. Huih sapna, vasa sapna, phuisam kammalteng gen kawmin tui tungah laamin a paipai hi. Kum 30 tuitungah laamlaamin bum leh ai thu teng leh bum leh ai lehkikna thu a gen kawikawi hi. Tuitawbing panin hong kilehkik a, a kipatcilna mun hong tunkik ciang kum 30 bang hong sawt hi. Hih mun a hong tun kik ciangin mite in, ‘Thu leh la hizah tak hong gen, ai-um sungah bang om hiam, mu nuam hang,’ ci-in a satkhap uh ciangin umkeek neng lenga, a tukna mun khempeuh a sia mang khin hi. BUM LEH AI thu pianna in Pu Ngal Ngam leh Pu Hang Sai zawl tate tung pan hong piang khia ahi hi.

Ref: Pu Zel Khup’ Tangthu Ciapteh sung pan