Pu Hau Ko Pau

Pu Thawng Lian leh Pi Cing Kho Kam te tapa upen hi a, 18.11.1938 ni-in Thuklai ah suak hi. 1956 kumin Thuklai sang panin tan 10, 1st attempt tawh a ong masapen hi a, nasia kisa tek peuh mah hi. Amah pen kimawlma kin mahmah a, 1960 kumin Yangon University Tennis tournament ah halfblue leh fullblue kha khat a zawh man in Special halfblue kipia hi. 1961 kumin Rangoon University Pingpong 1st ngah hi. 1984 Myanmar Tennis Federation te ii above 45 years, Kawlgam bup Tennis kidemna ah 1st ngah hi.

Tua bek tham loin a pension lakzawh ciangin zong 60 kidem na ah 1st ngah hi. 1961 kumin B.A degree ngah in, kumpi nasem in lut a, Deputy Commissioner dong khang hi.1999 kumin, kum 60 cin pension la hi. Pension a lak zawh ciangin B.Min., M.Min., D.Min degree te la beh in 2009-2012 dong Antioh Mission International Bible College Kalaymyo ah Principal sem hi. Thuklai Lunmun tuu, Pu On Cin tanu Sm Vung Za Huai (Nursing Sister) tawh kiteeng a, tapa 2 leh tanu 1 nei uh hi. Kalemyo Nyagpyintha ward ah teeng hi.

Pasian nasepna:(1) Matupi AG biakinn mun leitang kapiak beh hi.(2) Hakha khua AG Laisiangtho sanginn mun acre khat dektak kapia hi. (3) Hakha khua RCM biakinn mun ding leitang kapia hi. (4) Hakha khua UPC biakinn mun ding leitang kapia hi.(5) Tedim gam leh ka tuntunna ah mizawng leh meigong te inn mun kapia hi.