Ka Khawi khia mai tang e gualsa no bang

A. Ka khaw khai mai tang e gualsa no bang
Ka khaw khai mai tang e..
B. Ka gial mang lo lai e gualsano bang
Ka khaw khai mai tang e..

#Kammal_khiatna:

“Ka khaw khai mai tang e”
Zo pau in “khaw” cih ciangin khe cihna hi, ci-in khanghamte in ciamteh uh hi.

“Gualsa no bang”
Khisa no/sakhi no aci zong om hi. “Gualsa” cih ciangin sa gual cihna hi-in a khiatna taktak in ngalno cihna hi.

“Ka gial mang lo lai e”
Ngalno suaktungte a dung zui-in gial uh hi. A upat khit uh ciang agial uh mang semsem in, a tualtei khit uh ciang agial uh mang siang hi. Gial mang nailo ngalnote (ngal aneu mahmah laite) acih nopna ahi hi.

#La khiatna bulpi:
Gam lak ah ngalte a honhon in kikhawl diamdiam uh hi. Amau ading gal le lauhuai ahi sabengte ahi a, sahang le humpite ahi zongin tuak thei uh hi. Gal le lauhuaina pan a kidal/a kihepkhiat theih nadingun a kimkot ah ngalkhaatte in cing in kem uh hi. Gal le lauhuaina a om leh ngalkhaatte in gal phawnna aw ging sak uh hi.

Gal phawnna awging azak phet un a mailam khe khat khaisa om om a, atai uh ciang kal kikim takin tai uh hi. Suk le suk khawm, to le to khawm diamdiam, liailiai uh ahih manin galsia, lauhuaina le sihna pan in suakta uh hi.

Hih ganhingte tatzia a tel mahmah khangluite in mihingte tatzia dingin kilawm sa lua uh ahih manin “Ka Khaw Khai Mai Tang E..” cih la phuak, sa in a laam uh ahi hi.

Tua ahih manin Zomite kum khen khuado pawipi hong nai hiaihiai ta ahih manin Zotate in i omna munmun pan hih la sa kawm in kumthak ah nuntakna thak, ngimna thak le a kihual thei pen ding kalsuanzia thakte i neih zawh nadingin “I Khaw Khai Khawm ni”.

#Credit: Revd. Khoi Lam Thang (General Secretary, Bible Society of Myanmar)