Rev Job Nang Khaw Thawng
Pa Song Za Thang (Naulak) leh Nu En Sial Ning (Thangnawk) te sung panin 1.9.1961 kumin Tedim gam Gamlai khua ah suak hi. A nungta unau 4 lakah 3 na hi. Pa Go Khawm Thang, Pa Suan En Pau, Job Nang Khaw Thawng, Pa Pau Ngaih Thang hi. 1967 April sung cisa natna pan khe lang zaw in temh suak hi.
1.6.1969 ni-in SPS Gamlai ah tan 4 ciang kah a, 23.3.1986 ni-in Zomi Theological College (ZTC) pan Diploma in Theology ngah hi. 1.4.1986 ni pan Gamlai Sia khawk Tuiphum Pawlpi kipawlna (GTK,TBA) hun bit Pasian nasep kipan a, 1987 April dong sem hi. 1.5.1987 ni pan Tahan Tuiphum Pawlpi (KVBA) ah tuni dong sem hi. 17.10.1988 ni-in pumzaw natna ngah a, Tedim, Yangon zato lumin kum khat val sawt hi. 24.11.1989 ni-in zato pan Tahan tung kik in, nasep zom kik a, Wheel Chair leh Tri-Cycle zangin nungta hi.
6.5.1992 ni-in a pa Pu Song Za Thang (Kum 68) in Gamlai ah sihsan hi. Huhna te:15.12.1989 ni-in custom Pa Thang Khan Tuang in Sen gam pan peithum nei cycle khat lei sak hi. 30.3.1992 ni-in Rev. Dr. S Pau Khan En in vaihawnsak a, (UK) panin motor no khat ngah hi. 4.9.1995 ni-in David Thang Za Pau leh Carson Cin Khen Tuang in khut sawn cycle wheel chair khat ngah hi. 15.1.1997 ni-in Pa Len Cin Thang in (Pu Dai Cin) tapa tu a teen na inn mun 96’x48’ leisak in pia khong hi. 17.9.2005 ni-in Rev Zam King Mang vaihawm sak na tawh anu pa un Singapore leh Malaysia zin khawm thei hi.
13.7.2009 ni-in Rev. Dr. JM Ngul Khan Pau leh alawm te vaihawm sak na tawh peithum nei Tri Motor Cycle khat ngah hi. 27.9.2009 ni-in Nu Dim Don Cing leh Pa Tun Kap Thang te innkuan in khut sawn cycle letsong in pia hi. 6.1.2011 ni-in Rev. Dr. Go Cin Zam te unau in vaihawm sak in handphone khat leisak hi. 2.7.2006 ni-in TBC tagah kepna te bawl Aungbary mee No. 25612 tawh Motor Cycle 110 Pasian in letsong in pia hi.
1996 April 1-6 sung Pasian nasep kum 10 cin na Ministry Tin Jubilee limci takin Crusade tawh thuah in bawng 5, vok 2 go in mipi vaak hi. 1997 June kha in Vandaitui inn up na bek tawh lawm a, Nang Khaw Thawng (NKT) Nankattaih lam zo hi. 28.3.1998 ni-in “Vandaitui” inn thak ah lutna nei hi. 17.10.1998 ni-in “Damlo lap toh” nasepna (Handicap Uplift Ministry) phuan in damlo ta ding in nasep kipan hi. 2.4.1999 ni-in Chin Evangel Centenary Hakha panin Ordination ngah hi. 1.4.2004 ni-in Pa Dem Do Lian leh Nu Dim Khan Ngo te tanu Ruth Vum Ngaih Cing tawh pumkhat suak in, Rev. C.Tuang Khan Kap in letthat hi.1. Pahtawina laipi leh letsong (2011) kum ciang (29) ngah hi.2. Hun zatna, Tintan piakna, Crusade bawlna mun leh Pawlpi (2011) kum ciang (148) pha hi. 3. Vandaitui Literature Ministry panin Laibu bawlzah (2011) ciang bu (110) pha ta hi.
4. Thupha bawlna hang a lungdamna te anuai a bang ahi hi. (1) Tedim Laisiangtho bupi 200 val hawmkhia, Tin Jubilee ni-in bu 100 hawm kik hi. (2) Kawl Laisiangtho (NT) thuciam thak bu 200 val hawmkhia hi. (3) Pawlpi 10 val tungah nek khawm kuang guan ngiat hi.(4) Pastor 6 tungah (Siampi) puan tualpi guan hi.(5) Pawlpi 5 te tungah Pulpit, Pulpit tut na, sabuai no guan hi.(6) Pawlpi 2 te tungah Laikhetna (Type Writer) guan hi.(7) Pawlpi 3 te tungah meisopi (Geet Light) guan hi.(8) Pawlpi 10 val te tungah zattang zang laa bu guan hi.(9) Pawlpi kimkhat te a ding pakan, sikkeu, guan, zonsak hi.(10) Pawlpi 2 te tungah Guitor guan hi.(11) Pawlpi kimkhat biakinn sikkang guan, zonsak hi. (12) Laisiangtho sangkah 20 val huh, sponsor zonsak hi.(13) Pawlpi kimkhat Pawlpi tangthu laibu bawl sak, huh.(14) Tui haksa khua kimkhat tuizawl vaihawm sak, zon sak hi. (15) Upna kamciam bawlsak na tawh Pawlpi, Kipawlna, Tagah kepna, pawlkhat in inn mun, huangpi, Foundation, Motor dong neih lawh.(16) Zomi Handicap Uplift Ministry (Managing Director) zong ahi hi. Tu ciangciang damlo 245 te tawh kikhawl in huhna pia thei hi.