Haimual Khuathak

Khua thu atomkim:

1. Khua min          : Haimual khuathak
2. Inn phazah      : tu laitak gal tai gai (Melbuk gam leh mun tuamtuam ah om)
3. Veng                  : field veng, sang veng, kuan veng, kawt veng
4. Sang                  : Basic High School
5. Mi phazah        : tu laitak gal tai gai (Melbuk gam leh mun tuamtuam ah om)
6. Beh omzah      : Hualngo, Zahau, Songput, Gualnam, Naulak, Vunglu, Vangaw, Malneu, Buansing
7. Pawlpi               : EMC, EBC, RC, Tuiphum, UPC, Weslyan
8. Kivaakna          : tu laitak gal tai gai (Melbuk gam leh mun tuamtuam ah om)

1933 kum sungin Pu Sal Thanga in a tapa ubel, Pu Khuang Thuama aa dingin khua thak khat sat ding leh a nau pa, Pu Sawi Liana hausa septheih nadingin avaihawm laitakin nattom tawh Pu Khuang Thuama a si hi. Tua ciangin a ngaihsutna uh tangtung pak thei nawnlo hi. Pu Khuang Thuama a sihpak hangin a tutna uh sisak lo-in Pu Khuang Thuama tapa Pu Ral That Thuama hong khan ciangin Haimual khualui khua panin 1950 kum sungin inn 9 tawh khuathak khat satkik veve a, ‘Haimual khuathak khua’ ci in a minvawh hi. 1896 kum a Pu Hnen Thang leh Pu Thang Vea-te’ sat, Haimual khua pen, ‘Haimual khualui khua’ a hongsuak ta hi. 

Haimual khuathak Khuasat Pupi teng;

1. Pu Ral That Thuama (Chalthleng)
2. Pu Lun Puma (Zahau)
3. Pu Neih Chunga (Zahau)
4. Pu Za Sai Lova (Zahau)
5. Pu Vom Than Lova (Hmar)
6. Pu Neih Khuaia (Bocung)
7. Pu Khuang Than Vela (Zahau)
8. Pu Khuang Than Thioa( Cherput)
9. Pu Za Ai Thuiha (Zahau)

Hih Haimual khua thak khua a kisat hun sungin Mangkangte in Tedim, Falam, Hakha ci-in Falam DC gam pen subdivision thum in khen uh a, Falam khua DC zumpi a phut uhi. 1937 kum India le Kawlgam a kikhen ciangin Hualngo khua giat India Mizoram State sungah kikoihn a, adang Hualngo khua 56 teng Falam subdivision gam sungah a koih uhi. 1954-56 kum Falam Tedim Subdivision ci-a akikhen leuleu ciangin Falam subdivision gam sungah hualngo khua 26-teng Falam subdivision gam sungah kikoih a, Tedim subdivision gam sungah khua 17 kikoih ahih manin Haimual khualui khua leh khuathak te el Tedim subdivision gam sungah a om uhi.

1965 Tedim le Tonzang township a kikhen hun ciangin Tonzang township gam sungah Hualngo khua 6-kikoih a, Tedim township gam sungah khau 11 a kikoihna sungah Haimual khualui leh Haimual khua thak khaute gel, Tedim township gam sungah a omto suak hi.

Haimual Tapidaw tunna

Haimual khualui panin Christian a hisa in hih khua akisat ahih manin Dawi biakna om ngei lo hi. 1950 kum in Rev. Lai Thanga makaihna tawh Methodist Pawlpi om aa,  1971 kum in Pu Lai Hnuna makaihna tawh Independ Church of Baptist om in, 1978 kum in Pu Lal Lawma makaihna tawh UPC pawlpi om hi. 1996 kum in Pu Dam Mun Thang makaihna tawh Tuiphum pawlpi om hi. 1994 kum in Sia Zo Do Pau makaihna tawh inn 4, mimal 21 tawh EBC pawlpi in ding uh a, 1995 kum gambup khawmpi Tungzang panin pawlpi khat kisang hi.