Lia Zam Neih Cing ( Zam Nu )
Pa Pum Za Kap leh Nu Don Lam Cing te sung panin 30.7.1980 ni-in suak hi. Nu leh pa tawh unau 6 ka pha uh a, ka innkuan un mi 8 ka om uh hi. Ka Pawlpi pen Grace Assembly of God ahi hi. Ka inn uh pen Taih-14, Akhan 18, Bhahoshi inn ahi hi.Laa tawh kisai in ka neu tung kum 4 kaphak lim a ka-uk ahi hi. Sunday school ah zong solo ka sa den hi. Music zong ka u nau un uuk lua ka hih man un nulehpa in hong kham lo in tha hong pia aa, ka pa in Biakna laa “Tuh Niza neh Tu” cih laa hong khumsak ngei hi.
Kum 13 kaphak ciang laa sak ding ut lua nuam sa lua kahih manin laa khui khempeuh ngai in ka sin pah hi. A zawdeuh in mang laa te ka kantel zaw hi.Hih ciang ka tun theih nading in hong makaih ka sia te in sia U Saw Nuh leh Siama Dim Kham te ahi hi. Laa ki phuak te ih et ciang Pasian biak na laa, gam it na laa, leh zawl laa (Love song) te hi a, sak dan thuak dan zong a tuam tek ahi hi.
Biak na laa ih sak ciang in pumpi, lungsim, kha tawh ki ap kawm in ki sa hi a, biak na laa te thu thuk vive ahih manin a zaa a ngai te ading ki lamthak na a piang ding a kisa ahi hi. Laa dang te pen lungsim leh pumpi tawh kha paa lo a kisa leh deihsakna bulphuh a kisa ahi hi. A thupi pen in ih laa sak khempeuh lungtang sungah thuakna tawh saleng hoih pen ding leh kha in nasem pen dingin un ingh. Studio ka lut tungin ka dip kua in, khuasik mul hong tho hi. Tua panin nopna daihna hong lut kik hi.
Aw a siat loh nadingin ki kepkul aa, tuikhal, coffee, niangtui leh tuikhum khempeuh tankul hi. Ih aw hoih nading leh a sian nading in nikhat nai lang ta bang sinkul hi. Zingsang thawh tungin huih dikdan leh aw sian nading laa sak sin leng hoih pen hi. Laa sak bek hilo in laa phuah zong ka uk hi. Gamsung gampua ah laa siam kei pahtaak deuh te in Mariah Carey, Beyonce leh “Yin Nwe Win, Le Le Win, Tin Za Maw” te ahi hi.
Khang thak te tungah kong vaikhak nop penin laa siam ding na ut leh hoihtak sinin la kan in. A bulpi ahi melody, beat te theih loh phamawh hi. A lunglut te adingin hahkat takin sin in cih tha kong pia nuam hi. Topan “Huu” hong kop lai teng Topa phatna laa kasa ding hi. GMI pan kikhum “Lei mong dong in” cih sung pan ka lungsim hong sukha penin (Holy) cih ahi hi. Huu sang thei khempeuh in Topa phat un Laisiangtho in ci ahih manin, Topa phat nopna ih neih ding leh Topa hong piak aw ahoih pen tawh Topa ih phat ciat nading kong hanthawn nuam hi, Lungdam.