Sia Thang Sian Khai @Zogam Lapu

Pu Huat Cin (Naulak) leh Pi Kim Cin (Haunung) te sung pan Tedim gam Pimpih khua ah 23.2.1957 kumin suak hi. Pianpih laizom 15 lak pan athumna, pasal upen ka hi hi. 1962-68 sung SPS Pimpih, 1968-75 sung SHS Tedim, 1978 kum SHS Thuklai pan Tan 10 zo in, 1984 kumin yangon university pan B.A (philosophy) tawh ka zo hi. 1989 February kha in Pa Dal Langh (Heilei bawmkhai) leh Nu Cin Za Ngoih (Zahlangh) Suangzang te tanu Lia Zam Ngaih Lun tawh siangtho kiteenna kanei uh hi.

Pasian piak tate: (1) Tg Jacob Cin Tul Khup (B.Th, M.Div, Th.M frist year), (2) Tg Langh Sian Muang (matric) USA, (3) Tg Cin Kop Tuang (B.Tech) fourth years, (4) Lia Ngoih Don Kim (B.Sc) Math, (5) Lia Mawi Biak Sang (L.L.B) first year, (6) Lia Niang Nem Nuam (Grade-11), (7) Tg Thang Suan Khual (Grade-7), (8) Tg Mang Muan Mung (Grade-3).

Nasepna: 1974 kum pen Tedim EFC leh Pimpih EFC pawlpi te ah la makai kasem hi. 1987 kum EFC zumpi, Tahan ah youth worker tavuan tawh Pasian nasep ka kipan hi. 1990 kum Rakhine gam Kyaukdaw ah ah missionary kasem hi. 1991-92 sung Pegu Division Pe Nwe Gong ah Pastor kum 2 sem. 1992-94 sung ka khua pimpih ah local pastor kasem hi. 1994 February pan EBC pawlpi ah lut, music director semin ka innkuan un Tedim ah. 1995-97 sung Tedim myo ah Anti Drug Christian Youth Fellowship ah makai sem. 2013 kum hunbit Pasian nasepna pan medical pension ka la hi.

Tuahsiatna: 1984 kum sum zongin India ka paina ah Behiang khua pan BSF ten hong man kha 3 thongkia in tua sungin la ka bawla suahtak tak ciang “Zo hei sa” cih la Album ka bawl uh hi. 1987 September ni 9 ni-in sumbawl khualzin Cikha leh Tonzang kikal ah mawtaw tawh 2 vei tak tuahsiatna ah Pasian in hongkem in ka samzang khat zong kialo ahih manin Pasian nasem dingin kakhen sat pah hi.

Latawh kisai: Tawmvei nunsung Pasian hongpiak talent ahi laphuah leh lasak ahih manin Gospel la dawng 1200 kim kaphuak hi. Hong pantah kapu Dai Khan Ngin (USA) tungah lungdamna ka ciamteh hi. Gospel la album 13 dong gualzo takin kahawmkhia zo a, Topa phalna a om lai leh Tuun leh Zua itna bekbek album khat kabawl nuamlai hi. SHS Thuklai sangkah sung Zogam bupah minthang “Salvation Quartet” min tawh lasa in ken a paisuak kasa hi.

Pahtawinate: (1) Sihna kigozo 1 pan 3 na dong 1980 pan 2012 dong ki hawmkhia khin hi. (2) Pahtawina laipi leh van tuamtuam te pawlpi leh kipawlna tuamtuam pan 8 vei kangah hi. (3) La tawh kisai Zomi sungah adamlai upapen kahihman “Zogam Lapu” cih pahtawina 3 vei hong kipia hi. (4) Gam sung gampua a om Zomus lawm leh gual te huhna tawh Yangon ah inn kaneih man ka lungdam hi. (5) Tulaitak Central Zomus kipawlna ah Vice President twh ma kapan laitak hi.