Rev Gin Za Lian
Pa Lian Za Go (Sukte) leh Nu Hau Za Cing te tapa hi a, 14.5.1947 ni-in Ngennung khua ah suak hi. 1975 kumin Arts and Science University Yangon pan B.A (Geography) ngah hi. 1973 kum October kha in piangthak hi. 1977 kumin EBC Pawlpi ah hunbit sia sem a, EBC leh AG Pawlpi hong kikhen ciangin AG Pawlpi sungah hunbit sia sem suak hi.
1980 kum April 6 ni-in Thuklai khawmpi ah District Council in License pia a, 1987 kum February 12 ni-in Putao khua ah General Council kikhop na panin Ordination kipia hi.1979 kum panin Bethel AG Pawlpi ah huh sia sem hi. 1993 kum pan asih ni 29.10.1995 dong Tedim Bethel Assembly of God Pawlpi kem hi. 1978 pan 1989 leh 1993 pan 1995 hong sihsan ni dong Tedim section ah Secretary sem hi.
1993 kum a kipan in Bethel Bible College ah hun lang tawh sangsia sem a, Rev Thaum Khan Thang Oral Roberts University (USA) ah asang kah sungin Bethel Bible College ah Siapi sem hi. 1990-1992 sung Philippines gam Baguio khua Asia Pacific Theological Seminary ah sangkah a, Master of Divinity ngah hi. 1993 kumin Singapore gam Haggai Bible Institute ah hun tom thusinna vanei hi.
1.5.1978 ni-in Pu Ling Za Thang (Gualnam) leh Pi Kham Hen Niang (Taithul) te tanu Nu Hau Go Cing tawh kiteeng a, tapa 4 leh tanu 2 nei hi. Limsuaih siam hi. La lam zong kiva mahmah hi. Agape la tom no bu tuamtuam bawl hi.
Agape late zong 1979 kum December kha in Agape No (1) , 1980 kum July kha in Agape No (2), 1982 kum January kha in Agape No (3),(4) , 1987 kum September kha in Agape No (5),(6), 1990 kum April kha in Agape No (7),(8) te khum hi. 29.10.1995 ni-in Yangon zato a lupna panin hong sihsan hi.
Tate tawh kisai: (1) Nu Cing Nem Kim B.E (Civil) GMI,()(2) Tg Go Sian Tuang B.A (Bible), M.Div, Oral Robert University, Tulsa, USA.(3) Pa Thang Muan Suum B.A (Eng), World Vision (Managing Manager). (4) Nu Niang Khawm Huai B.Sc(Chem) U.K (Missionary). (5) Pa Pau Kim Siing B.E (E.C) Singapore.(6) Tg Kham Mun Zeel BBSc (Tyanlyan), M.Div (MEGST), Bethel Academy Church.
