Maanzaih Siam Kim Mang (Ever Zomi)

Min pi leh beh: Gin Kim Mang (Ever Zomi)

Beh : Buansing

Kham khua: Heilei Khua

Suahni : October 29, 1992

Lai Pilna : B.A (English)

Pianna Tuun leh Zua min: – Ngun Dong ( Nu ) – Dai Lian Kap ( Pa )

Pianpih laizom te min: -Tg. Bawi Lian Khup -Tg. Thang Hau Lian Kim -Tg. Luan Za Mung

Ukna (Hobbies): Manzaih/Video zaih, Graphic Design, khualzin

LST Mun: Paunak 16:3 Na geelnate khempeuh Topa ap in; tua hileh na geelna bangin tangtung ding hi.

GZC Q1. Manzaih lam na kidiah zawh asawt ta na. Bang in hong uksak hiam, EverZomi Photography koi dan a hong piang khia cih nong gen thei ding hiam?

KM- 2014 Kum ka birthday ah ka Nu leh Pa in Nikon DSLR Camera khat hong leisak uh in tua camera tawh Zogam mun tuamtuam ka paipai na ah Zogam hoihna limlakte ka zaih kawikawi na pan Manzaih(Photography) lungno a vei toto in kithei ing. Ever Zomi cih pen ka college kum khatna 2009 kum Graphic Design lam uk ka hih manin ka design bawlte ah suan dingin kei leh kei ka kipiak tawm minsel hin, Manzaih lam ka uk toh ciang zong tua minsel mah a zangto suak hing.

GZC Q2. Zomi pawi picing Zomi Namni/Khuado/Sialsawm etc te a manzaih dingin hong ki cial ngei na, minam dang ii pawi ( Festival ) picing te leh Cele, Model, Magazine minthang a ding na zaih sak ngei hiam?

KM- Zomi Nam Ni, Khuado Pawipi, State level Khuado Pawipi cihte a tam zaw kuama cialloh ka ukna tawh kizui in zaih zel ing. 2019 Kum April 25-26 ni Kale Khuapi, ZBCM huang sungah akibawl A 3 veina Zomi Guitar Festival ah manzaih dingin ka lawm Abraham Kim tawh vaisai ten hong cial ngei uh hi. Tu ciangciang minam dang te pawi bel ka zaihsak om nai kei. 2019 Kum March 16-17 ni Yangon Khuapi, Myanmar Covention Center ah a kibawl Chin State Investment And Product Fair ah ka manzaihte pawlkhat lahna hong neihsak uh hi. Tua lo Zingsol Magazine leh Zomi Siamsin Magazine cihte ah zong ka manzaihte Cover dingin hong zatsak ngei hi. Myanmar gambup media minthang 7DayNews Journal , The Voice, Eleven Media, The Sun Rays leh printed media pawlkhat ah zong Photo News dingin hong zatsak ngei uh hi.

GZC Q3. Zomi manzaih uk leh siam tampi tak a om tei hang a Professional ding tawm, ka manzaih sa te koicih leng bit ding, logo koih ham tang ning cih lungsim nei mel omlo, a mawk zaihzaih pong ki tam, Hi ciang dong na tun theihna dingin haksat na phu kha hiam, kua in tha hong pia cih nong gen thei tam? KM- I manzaih sa limlakte ahih theih nakleh logo suang hamtang zo leng 100% bit inteh i cih ngam samloh hang a zaih/limlak neite lam pan i kidaltheihna lian pen hiding in um ing. Khat veivei phone tawh i zaih ziauh pawlkhat i manlang nop ciang logo suan ding i mangngilh hun aih kei leh i thadah hun zong om thei mah ei.

Haksatna tampite lakah manzaih lam i uk ciang camera cih bek tawh hong kingah nawnlo lens tuamtuam a tom/a sau, Tripod, SD Card, Filter, Camera Bag, Edit nading computer cihte a kipan a kisam na tam lua mahmah. Kei bang Manzaih(Photography) sung pan Landscape Photography lam uk phadiak ka hih manin tua view tuamtuam zaih bek tawh lah a tunga i deih/i kisapte ki neizo lo ding dinmun hi. Tua hin 2017 Kum pan sum tawh a kicial Prewedding zaih lam zong na thuahto ing. Deih/kisap khempeuh i lei zawh pah loh hang nak dan tawm hong nuamzaw deuh hi. Man hoihtak zaih theih nang a kisam van leh na, sum leh paai a kipan na khempeuh hong panpih tha hong pia pen ka nungah ka innkuanpihte hi. Tedim Khuapi ah manzaih ka uk pih ka lawm Abraham Kim, Thaw Thawn leh VK Mung te in zong manzaih tawh kisai theihloh/theihnopte zong/kikum khawm zel ka hih manun ka theihna hong khang sak mahmah banah amaute panpihna tampi zong kihel hi.

GZC Q4. Nangmah bangin Zomi manzaih siam leh video zaih siam te na hanthot nop a omna, manzaih zia idea na muh suah thak na hop (share) nop khatpeuh ki ngah.

KM- Camera hoih/van hoih neileng bek limlak hoih akingah pah hi tuan loin camera nunga minu/mipa(behind the camera) ii siamna(skill) tungah kinga zaw hi. Camera hoih/van hoih i neih pah nailoh hang lungkia lo in i neih bangbang tawh a hoih pen a zaih theih sawm ding cih kei mimal muhzia hi. I uk takpi ahih nakleh i sinna khawl bawl lo a, a thakthak sinin ki update toto ni.

GZC Q5. Zomi te koici kalsuan leng mailam hun ah thu le laa khatpeuh ah ki khangto theiding?

KM- Mimal khat ciatin khantoh nopna lungsim nei photphot leng a bucing in ki khangto in um ing ei.

GZC Q6. Man/Video zaih ( Photography/Videography ) tawh a kisailo na gennop khatpeuh hong luikhia dingin hong thuum ungh.

KM- GZC tanute tungah lungdam mahmah ing. GZC Dam sawt hen…!

GZC Tanute: Manlah, buai pipi mahtawh na hun manpha hong khenkhia teta nahih manin nang sangsang in koh lungdam zaw ung. Mailam ah nasinna, nasep, na kalsuanna ding te ah hong lamzang toto lai in maw.