Video & Photographer Tg. Pass Tuang

Min pi: David. Pau Sian Tuang Bawmkhai Sukzo suan Bawmkhai ( Sb )

Kham khua: Tonzang (Tedim ah suak)

Suahni: 12th Oct 1995

Lai Pilna:

– Bachelor of Law (2012 ~2017) University of Kalay, Myanmar – Diploma of Christian Ministry (2017~2018) Full Gospel Bible Training Center – Myanmar – Bachelor of Arts in Theology (~ 2014) Timothy Bible School and Seminary – Tedim, ChinState Tulaitak Field Supervisor Position tawh na kasep laitak hi.

Pianna Tuun leh Zua min: – SK.Zen Lam Don (Nu) – SB.Langh Hau Lian ( Pa)

Pianpih laizom te min: Pianpih u numei khat le pasal khat mithum lak ah a nautum pen ka hihi.

Ka pianpih laizom te min in; 1.Nu Mary.Man Ngaih Nem( Staff Nurse – Falam General Hospital partner of Tedim ) + Pa Nang Thawn Khai ( Deputy staff officer of Rural Department Tedim )- Gamvai in tawlnga. Amau nih sungpan Pasian’piak tanumei thum: i). Esther.Cing Sian Muang ( Kum 7 leh kha 6 ) ii). Rebecca.Don Sian Itt Lian ( Kum 5 leh kha 6 ) iii). Elizabeth.Hau Khan Nuam ( Kum 1 leh kha 3 ) 2. Tg.Joseph.Pau Sian Khai ( Site Development Executive – MGACompany )

Ukna (Hobbies): Magic Tricks, Acting, Directing & Script writing, Composing, Photography & Videography

LST Mun: Late 23 bup Hih LST mun bulphuh inzong ka hihtheihzah uhtawh Pasian’ ading ministry khat part-time in ka nei uh hi. Amasa pen in GZC te tung ka lungdam mahmah hi. Bangmah Professional nailo kei lel nong phawk khak uh leh man ( Value ) nong neihsakna uh hang in ka lungdamna khitui ka nul hi.

GZC Q1. Manzaih lam na kidiah zawh asawt ta na. Bang in hong uksak hiam, Pass Production koi dan a hong piang khia cih nong gen thei ding hiam?

PT~ Man leh video zaihlam pen kum 12 ka phak hunpawl MP4 ( Digital Camera MP4 Player ) Zogam ah hong langg mahmah hunpan ki pan ka uk khat leh nasep ka kipatna khat hong suak hi. Bang in hong uksak :

~ Amasa in Pasian in hongpiak kivakna khat hi cih ka kitel hi. Anihna ah kapa’ sisan hang hi khadinghi. Ka pa pen Zomi movie masa lam ” Tui buasa ki luak kik theilo ” leh ” Gii bang khen kheini ” hih movie te ah Actor na sem a, Siamnel lam tawh kisai a uk mahmah khatzong a hihi.

Pass Production hong piangkhiat na: ~ Amasa in Tuang Video Company ka kici hi ( Ka tan 4 lai pawl hikhading hi ) ahih hang in ka lungsim ah a ombek hipan in bangmah khutsung lah theihding a om naikei hi. Tua bang tawh sangkah hun hong bei toto in, laisinkum tan 7-8 hun ciang in ka lawm te khat in MP4 hong nei a, sang tuah hun khawng leh sang khakni cih bang te ah ama MP4 tawh maann leh video zaih ka ki sin toto a, Kilaina Video tomto khawng ka bawl uh hi. Hih laimun ah ka gen ka Lawm ( Pa Dal Khat Khai ) in 12th Oct 2022 ka Suahni lian in Falam ah hong nusia hi. Amah zong kaphawk mahmah hi.

Kawlgam laitan tan giat ka sin laitak hun mah in, ka lawm te khat ( Hong nusia khin Sangpui ) in Passtuang cih min hong vawh ciang in, kamin a lai malding ka ngaihsun pah hi. Bang hang hiam cih leh a awsuah pen ei Zomi sung ah aom ngeilo awsuah leh minthak khat ahih man in manglai tawh hileh cih ka ngaihsut na kawmtawh Pasian’ sung ah na khempeuh ki ” Pass ” khin zo hi cih bulphuhna tawh Passtuang ci’n ka min mal ka kivawh a Zomi sung ah Pass cihtawh min sap anei masa penzong hiding in ka ki um hi. (Tu lam ciang in Pau Sian tawh min ki phuak khempeuh in Pass cih zang pian ta ahih man hi ) Tua bang pilsin hun ka nawk kawmkawm, ka tan kua kum ciang in Ka lawm Pau Za Mung (အထက – ၁ ဒုကျောင်းအုပ် tapa ) in Digital Camera khat sang ah hongpua simtheizel ahih man in, tuatawh ka lawmte mannzaih in ka sangsum ding kei leh kei in ka thalawh kawmkawm to hi.

Ka tansawm dongmah tuabang in ka zomto a khat veivei sang nai laploh lawh zel ka hih man in satzong ka tuak zelzel hi. Sangkhak hun sung in, ka ukna te zuihding mah hi cih lungtup tawh mann leh Video ka zaih zelzel a, akum cian nawn pak keng…ka innkhang te ahi Pa KhamLian te’ Digital Camera neukhat tawh video tomno ” Ni bang tum lo mihing te’ nu’n na ” cih thulu tawh veng naupang te li leh nga kaikhawm in min 45 kim tangding asau movie tomnokhat ka bawlkhia uh hi. Video edit dan, export dan leh camera setting, video setting cihte theinailo kahih man in camera ka kawmna Pa KhamLian sang gampa’ tapa UKhai kiang a sun azan tua video edit leh export ka bawl sak a, tua ka video khui uhpen ka veng uh Myoma Khuado Hall kim a om maingap zawdeuh teng kiang ah DVD khui ka zuak uh a, ka ngahsun sum uhtawh Mamee Chinsat peuh ka na ke lingleng zen uh hi.

2014 kum ciang in ” Zuunni Zogam ” cih thulu tawh ladawng 15 a kihel MV Album khat ka hawmkhia uh a, tuamun ah Pass Production Copyright kei mah in ka la hi. Hih Album sung ah Zomi Ironbird cih pasal no mithum ka movie masa ah zong hong kihel amau te zong lasaklam ah ka makaih khia hi. Pass Production cihtawh ka sepsawm masakpen Videography lam hizaw pian a, Siamnel lam tawh kisai sintheihna sang khat neizo ding cihzong ka ngimna hikawm pian hi. ( Tuni dong bel semzo naikeng ) Pass Production Photography lam ah ahih leh camera ka neihloh ban ah phone gina zong kanei kei a, Tang.Thang Sian Muan ( Ka beh leh ka neulawm in) ama zatlui Honor Phone khat hong pia in, tuatawh ka muh bangbang ka pumzaih gawpgawp hi. Passiography cih tawh Mobile Photography lam ka kipan a, ahih hang in ka khutma te ka deih bang zolo hi.

Na kasep kawm in phone thak khat kei hanciam tawmtawh ka lei a tua phone Camera zong hoihzaw ahih man in ka lawm te’n nang phone tawh mann siang cihtawh a Story vuah a postding khop uh ka zaih kawmkawm in ka mannzaih sa te hoih in hoihta keileh Pass Production or Passtuang cih watermark or logo koihding cih ka khensat hi. Camera kawm in ka lawm te Prewedding leh mann tuamtuam te ka zaih a tua hunpan kipan in Pass Production mintawh deihtak Watermark zang khia in Page zong ka bawl hi. Tuapan in damdam in Pass Production ci in mi’n hong ki theih bawl a, ahizong in tua ka Production minsang in ” Passtuang ” ka mimal mi’n in hong kilim theihzaw hi ( tuni dong ).

GZC Q2. Zomi pawi picing Zomi Namni/Khuado/Sialsawm etc te a manzaih dingin hong ki cial ngei na, minam dang ii pawi ( Festival ) picing te leh Cele, Model, Magazine minthang a ding na zaih sak ngei hiam?

PT~ Zomi..etc… te ah zaihding in Official in hong kicial lian omlo hi. Pawlpi min leh kipawlna khatpeuh tang in bel zaihsak pawlkhat nei ingh. Atamzaw Solo Protaint, Event, Documentary, MV, Family Photo, Newborn Photo leh Birthday, Aniversary cihte kazaih tamzaw hi.

GZC Q3. Zomi manzaih uk leh siam tampi tak a om tei hang nang zah in a Professional ding tawm, ka manzaih sa te koicih leng bit ding cih lungsim nei mel omlo, Hi ciang dong na tun theihna dingin haksat na phu kha hiam, kua in tha hong pia cih nong gen thei tam? Kei leh kei bel Professional in kimu nai kei ingh banghang hiam cihleh dotna 2na ah ka tangthu kong gen daudau sam hang hun sawtpi khatding mah Pasian’ hongpiak hih ka talent pen ka mitcip sak kha hi.Tua ahih man in tuni dongmah tuibuak kik in, sinkawm zaihkawm cihbang in ka kalsuan hi. Tua bang hita semah leng GZC tanu te in ka mann zaihte mukha in na lung uh hong kimsak ahih khakman maw thei keng kei lel nong phawk khak uh Pasian’ tung leh GZC tanu te’ tung ka lungdam mahmah hi.

Haksatna te : Theihthak khat nei in zaih sin nuam mah leng Camera leh supplies neilo ka hih man in Camera te kawm tawm in zaih cihdan in kalsuan ka hih na tawh mi’ mai et mahmah zong hak satna khat mah ahi hi.A uk asiam sa te mahmah pawlkhat inzong amau’ a dem bawlnuam hongsa ahitam hong ki pawlpih nuam bekthamlo van leh na khat hong kawm nuamlo mi pawlkhat zong om in, mipih te mahmah pawlkhat inzong tha hong pianuam lo ahih man in ka lung akiat hun tam mahmah hi. Tua bang hun ciangin ka thubul let Late23 in ka tha hong khauhsak kikzel hi. Sumlam tawh kisai hamsatna: Mann pong khat or video khatpeuh ka zaihding ciang Camera akipan van leh na a tuamtuam te kawm a zaih kahih man in Client te ahuam in sum theinkhat bang ka ngetna ah kei ading khat veivei tul 20000 – 30000 bangbek acian hun tampi om a, hunbeina leh datsi man tawh khat veivei hong ki zawi mel lo thei hi.

A ban ah sumtawm bei nuam mann or video khat lah deih veve cihbang mi te in sum theinkhat ka ngetna ah 80000 bang bektawh hong dekthei zel uh a, amau lung gulhna hihsak zawhloh na leh man mawh na tawh kituak kha hi zenzen leng keisang sum tam ala zaw Kawlpi lam ah ahizong / midang te kiang zuan in ava kizaih uh ka muh ciang, na kasak ngeungau mahmah hun omthei zel hi. Sumtawm abeinuam tebek kei hongzuan cih khat veivei lungkiatna hong om zeuhzeuh thei zel hi. Tutung GZC in hih bang in nong pi bawlzah un kei ka hih na tualsung ah na gol zolo zong ka hi khading a, ahih kei leh ka mimal in hong ki neumuh na omzong hikha ding cih hamsatna tuamtuam te ka neitheizel mahmah hi.

MV lamtawh kisai ah Project hong ki ap cil a kihona atuam, project man khitciang in atuam cih bang dan ka tuakna ban ah khat veivei Pasian’ na nasepna cini hong ki cihziauhziauh leh mann & video zaihsa sumpiakding hamsa hong sakik pawlkhat om ahih man in tualam ah zong ka lungsimpen a ngei abat kikpak nading hong hamsa mahmah hi. ( A nehno mikhat ka hihman hi )

Tha hongpia : Tha hongpia den pen ka thubul let LST mun 23 ahihi. Pasian’ hongpiak ahihmah bang in ka lungkiatciang Pasian in akammal mah tawh tha hong pia kikhi. Tua ban ah muh theihloh ka sung a om ka Ukna leh ka innkuanpih te mahmah inzong tha hongpia uh hi. Ka big fan pen ka innkuan pih teng ahih man in ka lung kiat hamsa ka sak hun aom ciang LST sim thu ka nget khit ban ah amau te en in kei leh kei tha ka san toto kik zel hi. Ka pa in hibang a hong ki pahtawibawl ding lunggulh mahmah ahih man in kum khat bekbek hong dampih lai hi leh amahzong lungdamna khitui nul hamtang ding in ka um hi.