Dr. Zam Len Mang D.Min
Dr. Zam Len Mang Gualnam Munsuang in Pa Vial Khua Hau leh Nu Khup Zo te sung pan a piang unau 7 sungpan a nautum pen ahi hi. October 20, 1970 in Tedim gam Saizang khua ah suak
hi. Ama suakkhit na lengin Laipian Biakna sungah omlai uh hi. 1977 kumin cidamna leh vanzanna ding ci-in Tapidaw suakpan uh hi. 1993 kumin Rev. Gin Khan Khual tungtawn in piangthak hi. Tan lang pan tan giat dong Manglai sangpi B.E.M.S ah kahsuak hi.
1985 kumin Academy For Development of National Groups
(ADNG), Sagaing ah tan sawm zo hi. 1993 kumin Mandalay pan
B.A (Geo) degree tawh man hi.
Kumpi sangsia sepna te: 1985- 1990 Primary Assistant Teacher (PAT); 1991-1995 Junior Assistant Teacher (JAT); 1995 October kha in Senior Assistant Teacher (SAT) in zaakhang leh tawp thuah hi. Pasian sapna tawh kizui in, LaiSiangtho sangkah ding khensat a, a kah theih ma in kawlgam vaigam ah zinin lungdamnathu gennate ah pai-in, thala kawikawi hi. 1999 kumin Eastern Theological College (ETC), Jorhat, India ah B.D course sinkhuan ngaha, 2003 kumin, Bachelor ofDivinity (B.D) degree tawh hong ciah hi.
Tua sangah 10-14 July, 2000 sung Haggai Institute –Advancing Leadership Seminar kah thei hi. E.T.C ah akah sung (2000-2001) Unau Christian Fellowship, Jorhat, ah Secretary sem hi. Pasian geelsaksa a ommah bangin, August 2003 kumin Yangon Apage Zomi Baptist Church ah ki-ap in Pasian nasem a, Lai Siangtho sang tuamtuam leh Tedim Christian College ah hilh hi. 2005-2006 kum sung Agape Zomi Baptist Church-Yangon (AZBC) ah zum leh lai tawh kisai (Office in-charge) tavuan la hi.
Topa Lamlahna tawh kum 2006 in Doctor of Ministry (D.Min) sin dingin Manila, Philippines ah pai hi. Kum 2009 in gualzawhna lukhu nelkai ngah hi. D.Min a sinsung Philippine Christian University, Manila ah August 6, 2008 ni-in, “Guideliness for Biblical Interpretation” leh September 17, 2008 ni-in “Globalization in the Greaster Mekong Sub-region” cih thusinna te ah kahthei hi. Kum 2008 sung tawn tung Zomin Innkuan Philippines kipawlna ah Secretary semsuak hi. Kum 2009 in Manila ah a kibawl “Zomi Nam Ni” ading Chin National Day Celebration Committee te Secretary semin Topan lawhcing sak mahmah hi.
Kum 2010 in Agape Zomi Baptist Church, Yangonah huhsia Assistant Pastor dingin lutkik pah hi.Kum 2011 ciangin Pawlpi Christian Education Department ah Director sem hi. Lai Siangtho sangkah masak in innkuan vai nunun ahih man bangin January 15, 2011 ni-in Pa Zam Suan Pau leh Nu Gin Suan Cing te tanu Vung Khawl Cing tawh kiteeng a, tapa Hau Sian Mung leh tanu Zo Sian Kimte nei uh hi. A kiten kum June 18 ni-in Sedona Hotel, Yangon ah nupa kopin “Having A Sacred Marriage Seminar” kah thei uh hi. Agape Zomi Baptist Church, Yangon Pawlpi ah Fulltime minister khat hi a, Zanggam Zomi Baptist Association(ZZBA) Yangon ah 26.2.2017 ni in ordination ngah a, tulaitak in Mission Department ah Director panmun len hi.