Keybord tumsiam Khen Biak Muan
Minpi le beh : Khen Biak Muan (Suante beh)
Kham khua : Lunmual
Tulian omna : Tahan, Kalaymyo
Suahni : 20/10/1993
Lai pilna : Bachelor of Music
Pianna Tuun leh Zua min : – Awi Lun Cing (Nu) – Thang Za Suan (Pa)
Sanggam Laizom te min : – Pau Lam Thang – Tual Khan Lian – Cing Lam Kim – Cing Tawi Dim – Lun Sian Nem – Cin Muan Sang – Mang Hoih Vung – Pasian thupha tawh unau 8 ka pha uh a, tua lakpan kei a 4 na hi ing.
Ukna (Hobbies) : Music, Laisim, Bawlungsuih
LST Mun : Efesa 1:4, Late 50:15
GZC Q1. Laphuah/Music lam na kidaih zawh a sawt ta na. Nong genthei ding hiam?
KBM:- Hong gen thei mah ning ei – Music pen ka neu lai kum 10 ka phak a kipan uk in ka na sin toto a, kum 15 ka phak ciang Band tawh tum na kipan ing. Pasian in thupha hong pia in tuni dong mah Music tum in, hilh in nuntak khuasa in na om ing.
GZC Q2. Zomi sung mangla leh minam dangte i la vasak pihthei le va tumpih theiding ih neih na angtang hiam?
KBM:- Angtang huai sa mahmah ing, Ih market zong hong zaizaw pah ding hi. Zo la bek hilo kawl la mangla ih sak theih ding khangthak ten hanciam toto lai ni ci-in tha hongpia nuam ing.
GZC Q3. La/Music/Note nang i idea ngiat tawh nagelh ngei hiam, Na music tum/laphuah/lakpan hoih nasak pen in bangla?
KBM:- Topa thupha tawh tu ciangciang a ka tum sa te a tam zaw kei idea vive hizaw in a vek in hoih sa ing, a hi zongin tu sunglakpan Itna (Muannu Buansing) sak mah thangah pen leh hoih sa pen ing.
GZC Q4. Zomi te koici kalsuan leng mailam ah music sung kipum khat in ki khangto theiding?
KBM:- Zomi te pen a tam zaw music talent kinei tek hi, a hih hang in phiatlann kitawn nuam den in hun bei/tha bei/sum bei a sin taktak ding ki utlo in practice ding ki thadah mahmah hi. Tua pen music ah thuk i lut zawhlohna leh minam dang te ih phak zawhlohna khiahna lianpi khat a hihi. Tua ahih man in Music uk khangthak te kong hanthotnop in khuatual siam tawh lungkim hetlo in music sanghoih (Music Education) mantak a kihilhna sang mah ah kah tangtang ding hanciam ni. Music sin na ding ih sum te paingam in siamsin na ah zong ih hun/thatang/lungsim te pia in lungduai in kuhkal tak a ih sin tohtoh a ih hanciam nak leh khangto lo in ih om kei ding hi.
GZC Q5. Music tawh a kisailo na gennop khatpeuh hong luikhia dingin hong thuum ungh. Aw..kammal hoih ka sak mahmah khat hong luikhia nuam mah ing ei.
KBM:- Dr. Cin Do Kham kammal a hi “A guallelte lamto ding, a gual zote pahtawi ding” a cih pen thuhoih mahmah hi in, Zomi te’n hih kammal nuntak pih leng lunggulh huai ka sa mahmah hi. Zomi te in a guallel mite lamto cih thadah kituancil beh zaw hi, A gual zo te sungpan pahtawi nop tuam kinei in pahtawi noploh mah kinei se hi. A ma dawk sunsun leh a lawhcing sunsun te ki lungdampih ding cih thadah facebook khawng pan kiko ngekngek thei mawk hi. Hih pen I thumuhzia a toiluat man a hihi. Tua hi in Zomi te tu a sang ih khantoh zawk theihna dingin khat leh khat I matutna, I lawhcin na leh I gualzawhnate kilungdampih a, ki ciapteh sak ding hanciam in kalsuan ni ci-in hih teng tawh ka laigelh hong khup hi ning. Laisim mimal kim tungah Topa’n thupha hong pia ta hen. Hih bang a interview dotna ah kei bang lel nong phawk khak uh lungdam mahmah ing, GZC tanu tapa te tungah lungdam hong ko phapha ing. Topa’n GZC innkuan thupha hongpia ta hen. Lungdam!
GZC tanu te : Koh lungdam zaw kan ungh e, kahun geel sa uh hong picinh nahih manin, mailam ah na kalsuan na, nasep, nabawl khatpeuh ah Zomi te a laamsang zo semsem dingin hong lamzang toto laita in. Na Zomi pihte in hong angtang lua ungh maw.
