Dr.Sian Za Kam
Tedim gam laitui khua Hatlangh beh Pu Kham Za En leh Pi Gin Niang (Gualnam) te ta 9 lak ah a thumna leh ta pasal upa pen hi. 1940 December 12 ni-in suak hi. Tedim High School ah a sangkah lai-in laipil mahmah ahih manin Yangon Central State Model High School (tu-in Basic Education High School (1) Latha), Pre-Medical Class ah Kumpi scholarship tawh 1956-58 sung kah hi. 1958 March in Matriculation Examination a sang zawh manin Yangon University ah Second Year ISc Part (B) pan kah zomto pah hi. Manglai (English) siam hi. 1969 kumin Rangoon Institute of Medicine (1) pan MB,BS zo-in DP & TM 1973 in zawh beh lai hi. High School sangkah lai pek a kipanin lungsim a picingsa, a muanhuai ngiat khat ahi hi.1969 panin Assistant Township Medicine Officer za tawh Chin State Mindat, Tedim, Paletwa leh Tamu khuate ah; 1988 a kipanin Township Health Officer za tawh Mawlamyaing (Moulmein) leh Myitkyina ah; 1991 in State Health Officer in zakhang in Chin State, Hakha ah; 1994-1998 ciang Magway Division leh 1998-2000 dong Karen State Health Officer semin pension la hi. Pasian zahtak mahmah ahih manin Kumpi nasepna tuamtuam ah Pasian in a mazangin daupai sak hi. A diakdiak in ama mai-ah Zogam State Health Officer a sem ngei Doctor lianpipi mi nga takin a sep sung mahun hanmual hong liamsan citciat ciangun, a kilipkhap phial za munah hong tut teh Pasian in a tumdang takin cidamna leh lawh cinna thupha piain, Zogam pan Nurse leh Midwife Training kah ding mi 300 valkum li sungin a kuankhiatsak zawh pen Kawlgam leh Zogam Cidamna lamah a sem Zomi khat lawhcinna tangthu lianpi-in a kiciamteh den ding hi. Kumpi nasep sung Singapore, Indonisia, India, Nepal, Srilanka gamte ah kha li sung ta Primary Health Care cih thulu tawh in kawikawi hi. December 9,2011 ni-in Yewah han ah limtak in kivui hi. A zi tegel leh tanu tapa 11, tute 6 nusia hi.Tanu tapate: (1) En Za Tuang (2) Niang Zom Mang, (3) Dim San Nuam, (4) Ciang Thawng Cing, (5) Vung Lam Man, (6) En Zo Mang, (7) Khual Kam Kei, (8) Niang Gawm Cing, (9) En Lun Cing, (10) Vung Sian Kim leh (11) Niang Mun Cing te ahi uh hi.