Dr. Thang Cin Mang
Tedim khua Pu Pau Za Kam leh Pi Lian Za Cing te sung panin 17.2.1937 in Tedim khua ah suak hi. Unau pasal 4 leh numei 3 pha uh hi.
Sangkahna: 1945-52 dong Tedim sang ah kah a, tan VII ciang zo hi.1952-55 dong Yangon ah kah a, 1953 in tan x zo hi. 1955- 56 dong Yangon University ah I.Sc Part A & B kah hi. 1956-62 dong Yangon Medical College ah kah a, M.B.,B.S. afinalkumin Kawlgam bupah a 10 na ngah hi. Khat pan sawmna ciang ngahte Yangonah special trainning kum 2 kah in tua ciang gamdang puak ding hi a, Yangon ah tawl bawk natna (Goitre) lam kha 8 kah sak in Zogam ah tawlbawk at sak kawikawi hi.
Nasepna: 1962-63 sungin Galkap Zatopi ah House Surgeon
semin, 1963-66 dong Falam Zatopi ah Civil Asst. Surgeon sem hi.
1966-68 dong Paletwa ah Township Medical Officer sem a, tua hun mahin gawlbawk-atna R.G.H. ah kha 8 sin hi.1969-73 dong Falam ah ACS semin, 1973-74 sungin Hakha ah TMO sem hi. 1974-75 dong Naupang Zatopi, Yangon ah sem hi.1975-76 sungin D.C.H. degree ngah hi. A laivuanna ah a khatna ngah hi. 1978-79 sung Falam Zatopi ah Child Specialist sem hi.1979-1983 sung Malaysia ah Child Specialist semin 1983-91 in Myingyan Zatopi ah sem hi.1991-1997 dong Pakokku Zatopi ah Consultant leh Paediatrician semin 1997 in pension laa a, tu-in Pakokku ah clinic phuan-in om hi. 2002 ciangin Yangonah ciah kik hi.
A lai gelhte: 1. Cidam nading zuihding thu 10 (Ten Facts for Life), 2. Sikhang thu (Hypertension), 3. Sithau thu (Cholesterol).Zatui kibawlna Cornelius Clinic pankhia hi. Tua kawm in U.S aa Cornerstone University te in ahon M.R.E. (Master of Religious Education) ah kah in 2006 kum, amah kum 69 aphak in M.R.E. (Biakna lam pilna) degree ngah hi. Tua banah naupang cingtaaklote kibawlna EDENHANDICAP CENTER leh FOGSIV acih kipawlna te tawh ELIM Child Care Center kici kum 6 nuai naupang 20 val kem hi. Kumpi lam panin zong zato sin Sangnaupang (Medical College) laivuan na ah naupang natna tawh kisai in apua lam panin akicial (External Examiner) in tu ni dong kumpi in zang lai hi. Tulaitak in Yangon Grace Assembly of God Church ah upa sem in ama hih theih zahin Topa na sem hi.
Zi leh Tate: Pi Ciin Lian Cing tawh kiteng a, tapa 3 leh tanu 2 nei uh hi. (1) Nu Cing Lian Lun, B.Sc., Physic) +Pa Daniel (Japan Campany),Yangon, (2) Pa Kam Khan Suum(B.Sc, Chemistry),+ Nu Cing Khan Dim, BSc., Singapore, (3) Nu Vung Khan Kim(B.Sc, Physic)+ Pa Duh Sang(Manager), Yangon, (4) Tg Pau Lian Mung, Chicago, USA.