Pa Hang Lian Khup
Rev Mang Cin Thang (Taithul) leh Nu Cing Khan Mang @ Daw Nan Than Nyunt (Shante) sung panin 9.9.1960 in Kawlpi ah suak hi. Unau numei pasal kigawm (10) lak panin alina hi a, apapi Bo Kam Cin Hang Hang Lian Khup ahi hi. Biakna kin minam it: Apa Rev Mang Cin Thang in 1949 kum akiphut Kalay Baptist Church ah pastor sem ahih manin Pa Khup pen aneutung akipan chiristian biakna sung pan khangkhia, biakna akin, minam a it khat hi. Biakna tawh kisai pawi lian te leh minam tawh kisai khuado pawi, Zomi nam ni, akipan pawi lian khat peuh akibawlna na ah sumleh pai tawh thulehla tawh tha tang tawh ma apang den khat hi.
Zi leh ta neihna: Pa Ling Kho Thang (Gualnam) leh Nu Ngiak Kho Zen (Zaniat) te tanu Lia Ciin Luan Niang tawh 21.11.1987 in nupa suak uh hi. Topan tanu tapa gawm 5 pia hi. (1) Tg Thang Sawm Siing, (2) Tg Thang Din Pau, (3) Lia Lian Ngaih Lun, (4) Lia Zen Lian Vung, (5) Tg Khai Sian Kim. Tulaitak in azi atate tawh Bogyoke lam lianpi dung, pinlong 5, kawlpi ah lungnuam takin teeng hi. Galilee AG pawlpi sungah om uh a, pawlpi upa muan pen khat in om hi.
Nasep tuamtuam: (1) ZOFAP (Zomi Festival of Praise) Zomi bup Pasian phatna, HALLELUJAH laapi sakna pawipi ah apat pan atawp dong president semin lungkim in thangah mahmah hi. (2) Pawlpi biakinn lamthak te aphawk zahzah sumteng tawh huh kawikawi hi. (3) Pasian nasem (hunbit sia) cimawh zawdeuh asak khempeuh delhin huhna pia kawikawi hi. (4) Gam leh minam ading vaihawm na khat peuhpeuh ah kipia tawmin pantheihna khempeuh ah kihel hi.
