Sia Gin Sian Pau (GS Pau) D. Litt
Pa Tuan Kho Kham (Tawmbing) leh Nu Luan Kho Hau (Bawmkhai) te sung pan 21.8.1958 in Pegu khua ah suak hi. Unau 3 pha uh a, amah a upen ahi hi. B.E.H.S No.1 Tedim tan lang pan tan 10 dong laisim hi. Laihat lamah kihel den ahih manin kumsim in pahtawina leh Stipend sang den hi. Tan 8 kumin kumpi laivuanna ah maths distinction tawh ong hi.
Sang sung omzia hoih ahih man sia ten zong pakta hi. Sang sungah Pasian thu nak gen lua ahih manin warning kipia ngei hi.1978 kumin Manywa khua ah sum sazian lam (Acountant) tawh kisai pilna sin a, amadawk lamah kihel hi.
Biakna sungah kihelna: 1974 kumin piangthak hi. 29.9.1974 ni-in Rev Hau Lian Kham in tuiphum hi. 1975-1977 sung EBC pawlpi ah hunlang Sunday school sia sem a, 1977-1980 sung AG pawlpi sungah hunlang Sunday school sia sem leuleu hi. 1975 kum pan kipan khua tuamtuam ah khe ngiat tawh gospel pai a, gupkhiatna thu tangko hi. Youth Camp bawl ding leh khangno thusinna pia dingin kisam kawikawi hi.
Kumpi nasem ulian te kiang leh thonginn leh zato sungah zong lungdamna thu tangko hi. Khangno veideuh hi. Friday nitak sim khangno kipattahna Youth Fellowship ah pai in, khangno te hanthawn den hi. Tedim khuapi sung a om pilna sawm (Boarder) te ah zong hanthawn in paizelzel hi. Ama hih theih zahin pawl sung pawlpua ah inn vak thunget sakin paiden hi.
Kumpi nasepna: 1997 July pan 1993 August dong kum 16 sung Township Co-operative Society ah sem hi. 1977-1979 sung vazuak, 1979-1981 sung voucher lai-at, 1982-1993 sung Accountant tavuan te sem hi. Akhut lam hoih in, maths kiva ahih manin Accountant tavuan kipia hi. 12.2.1988 kumin yangon khuapi ah kum 41 cinna Union Day ah zogam tang mi-in kah thei hi. Socialist kumpi hun sung Nainganzi (Politic) lamah zong kizol ngei napi, amah ut lo hi.
Bethel pawlpi ah sepna: Pawlpi makai sia te deih naleh zotna tawh kizui in 1.7.1993 pan tuni ciang dong Bethel Assembly of God pawlpi ah hunbit pawlpi lai-at sem hi. Tu laitak pawlpi ‘Computer len a, lai nasep (Literature) lamah mapang hi. 1992 kum pan GS Pau cih min tawh laigelh kipan hi. Zolai tawh akihawm khia Malaysia Zingsol, Zangkong Awging, Khanlawhna hun, Lung vak na, Zolai zunna, Tangko, Tahan Awging, Zonu tongluan, Agape thuthang, Zomka, Laitai, Lungdamna Aw, leh Tedim thu kizakna lai, cih te ah laigelh zelzel hi. Zo lai tawh thului agelh kigawm (800) kiim phata hi. “Khami” cih laibu no khat leh “Khangno makai te theih ding kilawm thu pawlkhat: cih laibu Volume (10) ciang bawlngei hi.Kawllai tawh Grace News Letter, Zion News Letter, Banner of Salvation, Harvest Time cih te ah laigelh den hi. Kawllai tawh lai kagelh gawm (70) bang pha hi. Alaigelh sateng anam tawh kizui in gawmtuah in, laibu in bawlin hawmkhia ta hi. Pahtawina laipi leh sumtang (5) vei bang gamsung gampua pan hong kipia hi.
A innkuan thu: 28.10.1983 ni-in Rev Suak Za Go in Thuklai khua Pu Pum Kam (Laiteng beh) leh Pi Huai Kho Cing (Tunngo beh) te tanu syamah Ngo Kang Cing B.Sc (Assistant Township Co-operative Officer) tawh kiteeng sak hi. Topa in amau nupa tungah tanu tapa gawm (5) pia a, avek in kumkhat tawh tan 10 ong kim in degree ngah kim uh hi. (1) Sia Kham Sian Khai B.A (Bible) ACM (Dip in music) M.Div, Yangon. (2) S/m Hau Sian Cing B.N.Sc (Generic), tan VIII kum Luyechun, Singapore. (3) S/m Hannah Cing Thian Nuam B.A (Bible), M.Div, Yangon. (4) S/m Cing Van Kim Tan 10 (4-D) ngah, B.N.Sc (Generic) M.A Theo) Tedim. (5) Tg Kam Pum Khai B.Tech (M.P) Kalay GTC.
