Pa Tual Khan Mung
Khuabeem khua Pu Dam Khan Dal leh Pi Cing Go (Buansing) te sung panin 1965 kumin Tamu khua ah suak hi. SMS Tamu sangah tan (8) ciang kah in sum zon kipan pah hi. Tungzang khua Pu Cin Za Khup leh Pi Dim Lian Cing (Naulak) te tanu Ngul Deih Sian tawh 1985 kumin Zo ngeina tawh kiteeng hi.
Tanu tapate: (1) Lia Go Sian Lam Dim (M.A) Pune India (2) Nu Dal Ngun Sian Cing Matric(3) Tg Dal Tuah Kim 9th Standard Mule, India. (4) Tg Khup Khan Kap Grade 11 Pune India te ahi hi.Biakna lam:1966 kumin Nanphalong Baptist ah kipia hi. 13.4.1989 ni-in piangthak hi. Tua kummah in Jireh AG Pawlpi lutpah hi. 1992 kum in tan (8) zo a, sum zon kipan pah hi. 16.7.1989 kum ciang Zion AG Pawlpi phut uh a, Pawlpi phut inn (22) te lakah kihel hi. 23.5.1993 ni ciangin Nanphalong Bethany AG Pawlpi pan khia leuleu hi. 23.4.1995 ni-in Section Superintendent Rev Sei Kam in Pawlpi kipsak hi.
Pa Tual Khan Mung makaih na tawh Pawlpi thak hong pian ciang a maa makaih na tawh biakinn pi khat hong lam uh a, 13.9.1996 kumin D.C (4) Superintendent Rev. Dr. Khai Khan Suan in ap na nei hi. A nih vei na biakinn taih inn pi Pa Tual Khan Mung te innkuan kipiak na tawh hong lam kik uh a, 21.11.2011 kumin General Council, Vice Chairman Rev Go Za Nang in biakinn ap na neih sak hi.
Biakinn tawk kisai: Pa Tual Khan Mung in Biakinn mun ding leitang 80’ X 50’ pia masa hi. Biakinn lam ciangin Pawlpi mite tha tawh piang zolo ahih manin anuai a bangin piakhia hi. (1) Pa Tual Khan Mung te innkuan panin 975,00000, (2) Pawlpi innkuan pan kidong sum ngah vekpi 55,90000.(3) Meltheih lawm leh gual Pawlpi dang pan 85,29000
