Sia Khual Khan Khup

Gawngmual khua Captain Cin Pau (Tonsing) leh Nu Sian Za Cing (Tonsing) te tau pen hi a, 7.7.1947 kumin Pyin Oo Lwin khua ah suak hi. Pianpih laizom numei 2 nei hi. Apan zi nei kik a, Nu Ning Go Cing (Tonsing) tawh tanu 1 nei kik hi. Sanggam numei te (1) Ngai Man Niang (si) apasal kawl te, (2) Nu Ning Hau Cing + Pa Cin Khaw Zam tawh ta 10 nei uh hi, (3) Nu Niang En Vung + Langh Cin Lian (Teklui) ta (5) nei hi.

Tedim ah tan 7 ciang kah hi. 1981 kumin Rev S. Ngo Khaw Nang in Jesu mintawh tuiphum hi. Apianthak khit ciang ahunneih khempeuh khazih adingin hangsan takin zanga, teci pangin zogam, kawlgam, leh Karen gamah pai hi. Upna tawh thu nakpi in ngen leng ngah ding cih bulphuh deuh hi. Karen gam Pha-an pai in Thamamya, Kawl phungzi pa kiangah Jesu thugen hi. Aciah ciangin lampi ah anne hi.

An nekkhit asawtlo in lua kik ziaziah hi. Aluak sungah khaugui singgui dan leh buhhum tang om hi ci hi. Yangon atun kik ciang a cina in hai pianpian hi. Asung pai gawpin gimlua a, vanleng tawh hongciah to in Mualpi te Rev Kai Sian Mang in khato hi. Kawlpi ciang anne zo nailo a, Taingen hong tun ciang acidam in anne zo hi. Mangmu in Ngal Kho Hang in hong umcih in hong nek sawm a, Nazareth mi zeisu mintawh tuimang un kacih leh tuimang pah ci hi.

Kumpi Saw Maung kiangah zeisu thugen dingin kuankhia a, kumpi pa-in Christmas Card khat pia a, ih upna tekah hanciam ni cih at hi. Akhualzin na ah meileng, vanleng, tembaw akhawnkhong in tuan theih nading Card pia hi. Yangon tuak suk kik a, Pha-an, Thamanya pa kiang apai kik leh nasi ta hi. Kawl phungzi kum 7 sepkhit ciang apiangthak pa tawh kithuah hi.

Tua phungzi pa si a, vantung gamah pai in leiah kikhia kik hi. Amangmuhna te teci panna ah vantung gam kapai a, vantung gamah Pasian khat bek om hi cih cassette ah khumin hawmkhia uh hi. Kawl te kikhel sawm ahih manin kumpi te heh a, Insein thong ah hong kepsak hi. Tua pan Myinchian thong kipuak a, 16.10.1999 ni-in thong sung pan hong bawl pa Pasian kiangah hongciah santa hi. Singlamteh hang galhang pa Zomi sungah nambat khatna in koih kahih manin kong suaksak hi.