“Queen of Zomi Singer” Siamah Esther Cing San

Minpi:- Man Suan Cing

Beh: Gualnam

Tulian omna:- Tedim

Khamkhua: Gamlai

Suahni:- 10th June

Lai sin na:- Kumpi sang tan 10 Lai siangtho sang Bth, Mdiv.

Pianna Tuun leh Zua Min: – Vung Khaw Niang ( Nu ) – Rev Tun Za Kap ( Pa )

Sanggam laizom teng: 1. Ngai Gi Mang 2. Man Suan Cing 3. Ning Deih Lun 4. Dal Don Lian 5. Thang Khan Kam 6. Cin Neih Kim 7. Don Lam Niang

Uuk ( Hobbies ) : Ka uuk bel la sak hipah.

Lai Siangtho bulphuh:- Mark 10:27 Jesuh in amaute enin, “Mihingte adingin hi zo lo mah hi; ahi zongin Pasian adingin ahi mawh thu hi lo hi; Pasian adingin na khempeuh hithei hi,” a ci hi.

GZC Q1. Dorcas Team hun pek pan Zomi mikim in hong kithei ta, lasak leh music sung na kidiah zawh zong sawt ngel ta cileng. Album/Mv bangzah bawlkhin, Nong genthei ding hiam?

Sm CS. Album :- 6 leh Mv 1

GZC Q2. Queen of Zomi Singer cih pahtawina dong ngah thei dingin aw hoih leh lasak asiam ngiat nahih manin lasak bangin hong uuk sak a, kua in tha hong pia. Lasak, la taih ( practice ) sung hita leh stage tung haksat na tuak gei hiam?

Sm CS. Tha ong pia leh ong pahtah:- ka Pa in ong pantahin ka Nu in thu ong nget sak den. Stage tung ah haksat na bel van ( sound system ) te a lem mel loh ciang cih loh haksat na om kei.

GZC Q3. La na phuak, nagelh gei hiam, Na music/laphuah/na lasak lakpan hoih nasak pen in bang la? Mailam lathak bawl tohtoh ding geelna nei maw, tunai lathak single ahih zongin hawmkhiat ding na nei hiam?

Sm CS. La ka phuah lian om kei. La deih deuh cih zong ka tel khiat ding om kei ka lasak khempeuhka deih vive hi . La thak bawl ding bel khua hun zui leh a lem dandanin bawl zel ding bel ngaihsun ing. Tu laitak la thak hawm khiat ding om kei .

GZC Q4. Zomi sung minam dangte ii movie sung ah kihel theiding leh mangla te nangawn vasak pihthei le va tumpih theiding ih neih na angtang hiam?

Sm CS. Angtang mahmah ing.

GZC Q5. Global Zomi Idol 2022 Judge sem dingin India gam Lam ka khuapi na zinna pan saklam Zomi te thugen hita leh lasak dan ahih zongin na muhzia, etteh huai nasak, sin tuak nasak a om na?

Sm CS. Lamka lam ah tu tung ka muh khiat pen Lasiam bel akhang akhangin ki zom in hampha mahmah uh. La zong siam thei mahmah uh in ahanciam nate uh zong thupi ka sa mahmah hi.

GZC Q6. Mailam hun ah Zomi te koici kalsuan leng music sung hita leh ih minam sung kipum khat in ki khangto theiding?

Sm CS. Music sung leh minam sung ah ki pum khat na ding bel :- Pasian zahtak in khat leh khat kitel siamna ki thu mang diamdiamna, ki niamkhiatna, itna taktak anei te sungah khantoh na omhi ci in mu ing.

GZC Q7. Music tawh a kisailo na gennop khatpeuh hong luikhia dingin hong thuum ungh.

Sm CS. Atawp na ah: GZC te in hibang hun manpha leh thu gen theih na nong piak man un lungdamin angtang ki sa mahmah ingh. Mailam ah GZC na sep na ah Topa’ Pasianin Ama minthanna dingin ong makaih toto tahen Amen.

GZC Tanute: Manlah leh buai pipi mahtawh nahun manpha hong khenkhia teta nahih manin nang sangsang in koh lungdam zaw ung. Mailam ah nasinna, nasep, na kalsuanna ding te ah hong lamzang toto lai in maw.