Pa Cin Za Hu Pau (Leng Tong Pauno)
Tuithang khua Pa Zel Khua Kai (Tunglut) leh Nu Ciang Khua Niang (Songput) Lailo khua te sung pan 23.8.1962 ni-in Sakollam ka innpi pan ka suak hi. Sanggam unau 11 lakah nautum pen pa a kongkhak pa ka hi hi. Tuithang khua ka hi a, ka tangval khiat na Tonzang kapian na Tedim hi. 25.6.1990 ni-in Kawlpi khua a teng Vangteh khua mi Lia Goih Khan Dim (Vangaw) tawh kiteengin tapa 3 kanei uh hi.
Nu leh Pa’n Pau no hong ci uh a, Lengtong khui kabawl ciang Lengtong Pau no hong kici hi. Kum (8) ka phak in kei phuah tawm Pasian phatna la tom nono te Sunday School ah sasa ta ing. Love Song pen kum (11) kaphak in “Nungak talpi khat a ma theih loh kal in” “Na min thei vang lo lo nuam ingh” cih phuak ta zen ingh. Ka ngaihsut kik ciang kamai zum. 1981 kum ciang lakhum ka kipan a, Studio bel Lynn Studio Yangon hi.
Ka laphuak pongpong dawng 200 val khawng hi-in, Studio ah dawng 60 khawng kisa khin hi. Khui pen lawm te tawh kasak khop uh Lengtong No 1,2,3, leh mi tawh kihel lo kei guak sak khui 3 khawng bek hi pan hi.Zomi sungah komai a lakhum masa katheih khialhl kei leh Rev Lian Bawi makaih “Agape itna Late”, T.S.Khai makaih “Sihna kigo zo” leh U Lanh Cin te’ khum “Kumpi te kumpi” cih bang thei ingh.
Khui hawm sate sung pan Lengtong 5 na “Zogam hong paal ding” thangah pen ingh. Lengtong No.1 sunga “Tun sung khat pan” cih a phuak tak pen Lengtong ci ziau ni kacih sa uh hi. Tulai Zomi khangno te hampha kasa mahmah hi. Gamdang pan music degree ngah te ih nei ta hi. Ih gamah music sang ih nei ta hi. Modern Style tuamtuam tawh la kiphuak, kisa, kitum ta cih kamuh ciangin ka lungdam lua a, kamai bang zum kik hi.
Pilna siamna neilo tuam niam khat adding hih ciang la kasak theihna pen ka Nu leh Pa tungtawn a hong luang Pasian thupha letsong taktak hi cih pen up cihtak um ingh. La kaphuah teh a “AW” (Tune) zong masa ing. Tua La aw pen tam veipi sasa in, mau mau leng….tua aw tawh kilawm kituak ding La thu/ La mal hong piangkhia hi. Tua La tam veipi sasa in, lamal gualh dan te zong puahpha toto lai ing. Zingsang thawh tung thudang lading hong lut ma in enkik leng hoih pen hi.
Ka kammal zat te Za la kam a maan hiam? Midang te a sukha hiam? Ka la kammal te hang zum kong mang kong ka tung thei diam? Cih bang in sittel khit ciang Studio ah khum theih dingin kakip sak hi. Zomi sungah La tungtawn in ki khangto mahmah a, mailam ah khangto lailai ding hi. Leitung mun tuamtuam pan hong khangkhia ding Zovontawi te kam leh muk (Leii) te zong La mah tawh ih kepsak (control) kul ding hi.
Ih taang ngeina paunak leh La kam te zong La sung mahah kepcing a, khangthak mono te’ zaktheih leh lunglut theih ding in music leh La tawh a mangthang sa zomi te hong kikai khawmkik ding hi cih pen ka sun mang ahi hi. Zomi Siamsin Magazine Volume-1, 2005 Kalay University pan kitom lak hi.
