Rev On Khan Suan
Phaiza khua Pa Tun Kho Gin leh Nu En Cing te tapa thumna hi a, 1.7.1939 in Phaiza khua ah suak hi. 1947 kum SPS Thalmual ah tan lang kah a, 1956 kumin SMS Tuithang ah tan sagih zo hi. 1957 kum SHS Tedim ah tan giat kah in haksat na tuamtuam tawh tawp hi.
1959 kum Phaiza in Zolai sang ngah theih nading Private sang hong in Siapi sem hi. 1960 kum ciang yangon ah Compounder kha 6 kah a, tua khit ciang Vaccinator Training kah hi. 18.2.1962 kumin Nu Vung Ngaih Zam tawh kiteeng a, tapa nga leh tanu thum nei hi. 14.4.1962 kumin Rural Health Center, Tuithang ah Vaccinator sem a, Falam, Tedim, Tuithang,Cikha khua ah kum 18 sung asep khit ciangin 1980 kumin nasep tawpin Pasian nasep kipan hi. 1.7.1980 kumin Phaiza AG Pastor sem hi. 1983-86 sung Sillong khua India ah G.Th kah hi.
12.2.1987 kumin Ordained Minister ngah hi. 1986-98 dong Assistant Superintendent Tedim Section leh 2002-2005 sung Tedim Section Superintendent sem hi. Hunters Quartet Piankhiat zia:-1953 kum BBC Yangon pan Sia te hong pai to in “Na vawh bangin na at ding hi” cih action tawh hongsa hi. Action (Lim tawh lahna) pan adeih na kitel sakin thupi mahmah ahih na kaphawk hi.-1956 kum November kha laa sin kaciah leh Pasian in Zawhang 3:16 tungtawn in laa khat hongpia hi.
-1957 kum TBA sivuai pi Tamdeng ah Phaiza CE in a lim (action) tawh lakin laa kasa uh hi. Tua bang om nailo, lamdang kisa in Sia J.Gin Za Tuang in maan hong zaih in, mang lai in gelh in “The High Call” Magazine sungah suahsak na tawh hong pahtawi hi.-1955 kum pawl Burma Divinity School, Insein panin David Yong makai in “Negro Spiritual” ci-in laa hongsa hi. A mai uh belvom nuh in laa siam thei mahmah uh hi. -1958 kum Hakha ah Laisiangtho sang kakah ciang Rev John son tung pan “Southern Negro Spirituals” kici laabu khat kangah hi. Tua laa te letkhia in belmang kizut in kasa uh hi.
Negro te pen America ah sal a om ahih manin gentheih uh hi. Ahi zong a nungta Pasian um ahih manin Pasian kiang a tunciang puansilh nikten, nek leh dawn ding kisam nawnlo in nuam mahmah ding cih tawh thala in aphuah uh ahi hi. Action tawh lakin kasak uh ciang zogam ah hihbang om nailo ahih manin lamdang sa in mi lungsim lawng mahmah cih kamuh ciangin Pasian hopihna kangah aa, laa sakna (action) tawh Pasian nasem in cih kasungah hanthohna khat kangah hi.
Tua ahih manin 1967 November kha sung “Hunters Quartet” min in anuai a teng in laa sakna tawh Pasian nasep kaki pan uh hi. (1) Rev On Khan Suan ( AG Pastor Phaiza, Tedim Section Superintendent ).(2) Rev Tual Khan Nang ( BBM Pastor, KCBC, TBA, Press Manager ). (3) Pa Vung Lian Nang ( AG sumzong (mi masa) Phaiza, Tedim, Kawlpi ).(4) Pa Zam Kho Pau ( BCM Believers Church Myanmar, Zolengthe Quatet ). (5) Rev Son Do Cin (UPC Pastor, Phaiza, Mualnuam, Kaptel ).(6) Sia On Khaw Zam ( CJC Pastor, Phaiza, Singlei, Fartlang, Tedim ).(7) Pa Gin Khan Kham ( Believers Church of Myanmar-Evangelist ).
