Tg Thang Sian Sang @Sangpi
Rev Cin Khan Thang leh Nu Hau Khan Ciin te tanu tapa 5 lakah aneu pen hi a, 20.12.1983 kumin suak hi. Ka Pawlpi pen Hallelujah AG ahi hi. Music cihna gawm ka theih ma in laa ka-uk khin hi. Ka laa phuah masak pen bang kum 15 ka phak lai hi ci-in ka thei hi. Ka u nun biakinn ah asak ding a ka phuah sak hi a, Isaiah 46 na sung ahi hi. Ka laa phuah vekpi bel dawng 200 val ta hi.
Laa ka phuak ciangin a tam zaw a aw ka zong masa hi. Khat veivei lamal leh laa aw hong pai khawm aa, asak kik ki nung thuah hi. Kei phuah te lakah “APhe Yeh EiZeih MimiKhe” sak pen bang Daw Sung Thin Par inn pan ciah lampi ah line car tung pan 2003 kumin kaphuah hi. Laa dawng khat phuah nading minute 15-30 bang asawt om a, a kum akha a ki zolo zong om hi.
Phatna leh Biakna laa hoih ih cih te a phuak laitak Pasian kha tawh kidim in Sathau nilh na ngah te in phuak leh hoih pah lel in um ingh. Love song te leh gam it na laa te zong a phuak laitak veina, thuakna leh lungtang dimin itna honglut ciang phuak leh hoih lel ding hi.Rev David Suum in GMI ah huhna hong nget ciang kha guk sung khong laa hilh ding a hong pai hing. GMI te khat veina Series “MiKyi SohTaing” pen a phuak leh a sa kahih manin hoih sa lel ing. “YongKyi Chin Mi Eain” zong kanawh phuah mahmah te khat hi.
Upna pen mei inn tawh genteh in ih upna ih mitsak loh ding deihna hi. Meivak bang a ih kep ih dop ding deihna hi. Hih ciang ka tun nading midang lawm te bangin sia leh hong makaih taktak om lo in, Pasian bekmah hi. A tung lamin ka u in Guitor hong hilh hi. Laa siam te hong pai ciang hong zol hi. Ka lungkiat ciang tha hong pia hi. Kum 16-17 ka phak kum (2000-2001) kum laa sak ka kipan hi. “Anet Shaingson Chit meettu“Takhin a tuat ” Series ah kasak masak pen ahi hi.
Pasian in thupha hongpia in, laa phuak ding leh a sa dingin sathau hong nilh ahih manin ka lungdam hi. Music tawh ki sai kei muhna ah Pasian pen phat ngai Pasian hi. Aging thei khempeuh tawh phat ding hi cih mu ing. Kei zong Gospel music lamah hong saplam katel hi. Pawlpi pawlkhat te in music zang lo hi. Tua te lakah ka kihel sawm kei hi.
Topa in huh ong kop lai teng music tawh Pasian kaphat ding hi. Na khempeuh ahoih lamin ih zat theih ding thupi hi. Tu laitak in YMCA Hall zang in Pawlpi Topan hong kipan sak hi. Laa phuak lasa bek hilo in Pawlpi mi hongpia hong makaih hi. Tha hong pia un, tha la khawm ni, kei a dingin a tawntung in thu hong nget sak un, Pasian minthan na dingin Pasian in vision hong piak te sepzawh nading thu hong nget sak un. Ka lungdam. GMI –Magazine 2008 pan ki la hi.
