Rev. Kam Cin Hau (D.D)
Pa Vum Khaw Zam leh Nu Vungh Za Ngai te sung
panin 22.2.1963 in Kalemyone Nahnuai khua ah suak hi.
Suahpih laigui zom guk lakah tapa nihna hi. A pa galkap pension sum tawh sangkah zo nawnlo in tan sagih azawh ciangin sang tawpin lokho hi. 1975 kumin Hebia 2:3 tungtawn in gupngah kitel aa, 1977 kum ciang tuiphum na tawh teci pang hi. 4.4.1979 kumin Khasiangtho sungah kiphumna (Kamtuam) pau ngah hi.
12.3.1982 ni-in Pasian in ama nasem dingin khauhtakin sam hi. 15.6.1985 ni-in Pentecostal A.G Nahnuai ah hunbit Pasian nasem bek hilo Pawlpi keem sia zaa kipia hi. Thungen antangin a om laitak 31.7.1987 ni-in Mangmu in khuaphawk nawnlo hi.
Pasian sawlna bangin Shan gam Lashio khua ah 12.10.1987 kumin kumkhat sung sangmang sem dingin kuanpah hi. Tua panin Nahnuai ah Pastor sem dingin ciahkik hi. 15.2.1988 ni panin mipi maiah lungdamna thu khauhtakin genkhiat kipan hi. Nahnuai AG biakinn mi 350 tatna ding innkiu suang 7.3.1990 ni-in khia hi. 15.2.1995 ni-in Bethel Bible College panin (B.C Min) tawh pahtawina kipia hi. 2.12.1995 kum ciang kawlgam AG zumpi panin siampi zaa kipia hi. Pasian lamlahna om mah bangin 31.1.1998 ni-in Mandalay khuapi sungah pawlpi khat kipan hi. Topan thupha pia a, APTA te khutnuai a om CIST sang te in 25.2.2007 ni-in Malaysia khuapi Kualalampur ah Doctor of Divinity pahtawina kipia hi.Lungdamna thu mi teng thum tungah gen hi. Pawlpi leh khua 120 ah 250 vei gen hi. Gupngah mi 6000 bang pha in, kamtuam pau ngah 1500 kimpha hi. Tuiphum vekpi 1500 hi a, thugenna ah thungai tam penna mun New Lamka (India) hi a, 30,000 in ngai hi. 31.1.1998 pan tuni dong Paradise AG Church Mandalay ah Pastor semin gam tuamtuam ah Crusade bawl kawikawi hi.
Nasep bulpite: (1) Senior Pastor; Paradise AG church, Mandalay, (2) Principal: Kawllaitawh kisin kha thum tentan sang, (3) Principal, manglaitawh B.Th. sinna sang, kum (5) tawh pia, (4) Tagah kepna sang zong nei a, naupang 40 kim sang kah sak hi.
Tuampianna:
(1) 1987 kum Mangmuhna leh Paisan’ sathau nilhna ngah a, pentecostal kalsuan zia zang pah hi.
(2) Charismatic kalsuan zia tawh Kha Siangtho vangliatna zangin lamna, dianna, pukna, ot ziahziahna, pulpi lamah ki-apna nak zat mahmah hi.
(3) 1995 kum Lamka khua cialpi bawlna-ah mitul sawm nih val pha in “Zogam Billy” min kipia hi.
(4) Thugen sialin mi phongsiam, mi khanglo sak, mipi lawpsak thei Revivalist pa hi.
(5) Mandalay Paradise AG Church Biakinn ding a up ngam bang mah in mi khat tungtawng teng tul thum leh zali man ki lei sak hi.
