Rev. Pum Khan Nang (D.D)
Tuithang khua Pa Vum Do Thang (Phiamphu) leh Nu Niang Nian te tapa hi a, 9.9.1948 kumin Tuithang khua ah suak hi. Azi Nu Khawl ZaHuai tawh 23.7.1970 ni-in Fr P.Blivet in Tuithang RC biakinn kilemna sacramenttu sang hi. Tapa 3 leh tanu 4 nei uh a, tumin vawh 5 nei hi. 1957 kum RCM suak a,1971 kum ciang piangthak hi. Apian thak manin RC Pawlpi in 22.2.1972 kumin Pawlpi pan hawlkhia hi. Pianthakna Laisiangtho Mate 11:28 ahi hi.
21.8.1981 kum ciang AG Pawlpi zom hi. 1968 kumin High School final zo a, 1969-70 kum Mandalay ah T.T.C kahin 1971 pan 1986 kum dong sangsia sem hi. Tua khit teh Tedim AG section ah hun khen na hilh dingin teaching evangelist hunbit in sem hi. 29.3.1990 kumin Hakha D.C khawmpi ah Licensed Minister pia a, 2.12.1995 kum ciang Yangon G.C AG in Ordination pia hi.
5.2.1994 ni-in Rhema Bible College and Mission panin B.Th ngah hi. Faith Baptist Bible College Tedim ah M.A kumnih kah hi. 2.11.2015 ni- in Christian International School of Theology, Manila pan in Doctor of Divinity (D.D) kipia hi. 2015 kum mahin Bethel Bible College in B.C.Min pia leuleu hi. Hun khenna leh Pawlpi thangthu 674 vei hilh khin hi. Lai nasepna panin hunkhenna bunih suahin bawl hi. Zomi Encyclopedia Volume(22) dong bawl khin hi.
India gam panin Laisiangtho puak khop zah kawlgam sungah lutpih manin Moreh leh Tamu khua te ah thong kiat lawh hi. USA Chick Publication te laibu bawl pen sia Pum Khan Nang bawl in kingawh a, Tedim thong leh Falam thong ah kia a, Falam D.C thukhen zum in amawhna mulo ahih manin thu siang tawh ciah sak kik hi. Tanu tapate: (1) Pa Thang Khan Piang B.Th + Nu Cing Lun Vung (USA). (2) Nian Deih Lun+ Kham Suan Lun, B.Th., M.A.(3) Thang Lam Nuam + Nang Khan Thang (4) Dim Lawh Cing, D.Th. (6) Niang Sian Muang, (7) Niang Sian Nem, B.Th.+Khai Khan Langh
