Rev. Dr. Khen Za Sian (D.Min)

Pu Vai Za Dal leh Pi Dim Man te tanu leh tapa 7 lak panin athumna hi a, 20.2.1955 kumin suak hi.

Pianpih sanggamte: 1. Ni Ding, 2. Sap Lam Ngam@Go Khan Mang (Late), 3. Khen Za
Sian, 4. Dal Lam Ging (late), 5. Luan Ngaih Cin, 6. Zam Sian Cing leh 7. Awi Lam Vung.

Zineihna: 26.5.1985 ni-in Pu Hau Gin leh Pi Khup Dim tate lakpan atumpen Ngin Khawm Niang tawh pumkhat suakna nei hi.

Ngin Khawm Niang pianpih sanggam te: 1. Dam Sian Mung, 2. Zam Za kap leh 3. Tun sawm Thang te ahi hi.

Tate: 1. Man Khawm Cing + Thang Sian Khai (US ah a innkuan un om uh hi. Atate uh: (1) Thang Deih Tuang, (2) Sian Suan Suum leh (3) Cing Khan Huai. 2. Dim Khat lun 10th Standard, 3. Dal Sian Thawn Mung B.Sc, 1st Year, 4. Gin Pha Sian Sang M.E in maritam 1st Year, 5. Ding Sian Lam Paak.

Laisiangtho sangkahna: (1) 1979-1982, sung India Shilong ah a om UPCI sang, “Calvary Bible Institute,” pan Diploma ngah,(2) 1985-1989, sung UPC sang Zangkong ah a om, “Apostolic Christian Bible College,” pan B.A in Theology ngah hi.

Doctor of Ministry in Administration kahna: Master of Divinity (In Biblical) zom dingin Manila Philippine April 7,1993 in ka tung hi. Alliance Biblical Seminary ah June kha panin ka kipan a, semester khat ciangin Asian Theological Seminary ah ka kisuan hi.

D.Min in Administration sin theihna: Western lam panin Philippines ah sang Missionary sem kawmin D.Min kah theihna ding, “Overseas Theological Seminary,” cih sang ah hong kisang ahih manin M.Div tawh kasin khawm thei hi. Hih sang pen nipi khat in khat vei bek class kinei a, ninga ni sim (Night Classes) ahi hi. Credit pen 36 hi a, Pasian na kasep khitna sate pen credit 12 in hong san sak ahih manun credit 24 bek kisam lai hi. Lukhu nelkai lak hun pen ahun hong kibang thei pah hi.

Certificate ngahna: 1. M.Div, in Biblical Studies: Hih course pen Credit 96 hi a, 1996 1st Semester in ka zo a, March 21st 1997 in gualzawhna lukhu nelkai ka ngah hi. 2. Doctor of Ministry in Administration: Hih tawh kisai in lukhu nelkai 24th February 1997 ni-in gualzawhna lukhu nelkai kangah hi.

Pasian nasepna: UPC pawlpi panin Pasian nasepna dingin hong kipia Licence te: (1) 14.3.1978 ni-in Local Licence, hong pia uh hi. (2) 1980 kumin General Licence, hong pia uh a, (3) 25.3. 1988 kumin UPC pawlpi in Ordanation hong pia uh hi. 1977 pan kipanin keima kipiak tawmna tawh Freelance Evangelist kasem a, UPC panin Local Licence ka ngah pan kipanin pawlpi kipsakna tawh kasem hi. Sangkah kawm leh Pasian nasem a thuahden ka hi.

Tavuan let ngei te: (1) 1979 February panin 1981 dong fulltime Evangelist ka sem hi. (2) 1982 panin Section ah Pastor kasem hi. (3) 1989 panin Kalay Special Area ah General Secretary 1993 February dong kasem hi. (4) 1989 panin Kalay District Pastor 2006 dong kasem hi. Ka Pasian nasep hun sungin Sermon 9800 vei kanei a, Jesu mintawh tuiphum 2350 ahi hi. Nupa kop 37 kipsakna thungetna kaneih sak hi. Jesu mintawh ka tuiphumte lak panin ordination ngah 6 om a, 27 General Licence nei om hi. Local Licence ahih ka ciamteh kei hi.

Laibu gelh te: (1) Sunday School naupang te thusin ding Beginner, Primary, Junior leh Intermediate dong (Department khat pan bu 3 vekpi gawm 1), (2) 1991 kumin, “Zomi leh Biakna,” (3) Tedim innkuan ih hihna taangthu, (4) Pipute Sul (Nomadic of our for Fathers, (5) Hebru Hilhcianna, (6) Khristian kisat suahna, (7) Sabbath maw Sunday, (8) Tedim pau hong piankhiatna, (9) Vote khiat dan lamlahna (Voter Education), (10) Pawlpi Taangthu, (11) Pentecostal leh Charismatic, (12) Kamtuam ih cih.

Laiteite: (1) United Pentecostal Churches International, “Upna laigil,” (2) Ih up leh ih hilh thu (We believe and teach), (3) Jesu thu bangci gen ding (How to share about Jesus), (4) 1948 UN Declaration of Human Rights.

Media Lamah: (1) 1989-1993 sung Editor of Pentecostal thukizakna (Kawlpi). (2) 2001-2004 Kawlpi pan kihawm leh Zangkong pan 2012 pan kihawm ah Chief Editor. (3) Chairman of Zomi Media Council of Myanmar. (4) President of Zomi National Council of Myanmar (Zangkong).

ZBC labu khet kikna: Ihneih sa dawng 469 pen ZCLS in anunung pen 1992 kumin hongkhen uh hi. Hing nusiat uh ciangin Pasian nasem masate khutmate phawk denna ding leh azang nuamte in zattheih dingin kumpi theih pihna tawh, ZBC labu cih pen, “Khristian Labu,” cih aminpua sakin kumpi phalna tawh, “Pasian nasem masate phawk denna dingin, “Ngilh Mawh Lum Suang,” ci-in March 2014 kumin kakhen sak hi.

Lai Siangtho teina: UBS phalna tawh Today English Bible pen Studies tawh kithuah Zolai tawh tei ding Project hong om ciangin Chairman leh Editor tavuan la in Thuciam Thak tei Komiti- te tawh tei kipanin, ahih hangin lungdamna thubu teng akizawh khit ciangin ZCLS in laitei komiti hong phiatin ZCLS in tavuan ka la ding uh ci-in tua hun a ZCLS ah Ex-Secretary Rev Suan Khen Mung in lai hong piakpiak ciangin kibing khawl hi. Tua ciangin 1997 kum a Zolai tawh Thuciam Lui leh Thuciam Thak ih neih pen khet kik dingin hanciamna tawh India Bible Society ah ka nget ciangin Kawlgam Bible Society in khet kik akul lohna thu na zasak ahih manun kikhen kik thei nawnlo hong suak hi. Tuakhit ciangin King James Version tei dingin ka khensat a, lawmte khat leh nih huhna tawh Zangkongah omin 2006 pan kipanin tei ka kipan hi. Tu in ahih leh draft ka man ta a, laibu picing in hong suak zawhna dingin final kaneih laitak ahi hi.

Mipi nasepna: (1) 1982 kumin Kawlpi ah Khawlzang veng kipawlna phuan. (2) Tedim Association ah EC Member khat: Constitution leh Byelaw gelhna ah makai (Convener) leh Building komiti ah Secretary. (3) Zomi National Council of Myanmar-Zangkong Branch ah President. “November 23, ni-in Pu Do Khan Khup (Siapi Gen Za Dal-Vangteh) tapa tawh, “ZOMI IH HIHNA (Identity) leh Malay, Thai leh India ah dong tuak Zomite a dingin US White House zumpi sungah thusunna kanei uh hi”