Prof. Dr. C. Thang Za Tuan, PhD.
Zomi sung pan Kawlgam Basic Education Department ah Deputy Director General & Adviser (1999-2005) za ciang a tung masa pen hi. Tozang Township, Haiciin khua Pu Thang Za Cin, Valte (Labour Corps, France 1917) leh Pi Ning Khaw Cing, Guite tapa nautum zom hi. 1942 April 17 ni in suak hi.
Haiciin (1948), Tuimui (1952), Tedim (1954), Central State Model High School, Yangon ah kumpi Stipend tawh 1956 sang kahhi. 1959 in Matriculation zo hi. Kum 21 a phak in Yangon University pan B.Sc., (1963), YIOE pan Dip.Ed (1969), State Scholar Australia ah pai in M.A Science Education, Macquarie University pan in 1975 kum in zo hi. YIOE mah pan Ph.D (2006 Nov.4) ni in ngah hi. Tudong in khantawn pilnasin (lifelong learner) hi lai hi. Kumpi nasep a niam pen Piado (Peon) za tawh Prime Minister’s inn ah 11.7.1958 ni in ki pan hi.
SAT (1963) kum Education Department ah zom a, sang lamah panmun za a banban leh a tuamtuam in len toto in, Deputy Director General (Academics) (1999) & Adviser(2004) kum 47 sung pau banna omloin sem suak hi. Kumpi piak na sep siam cih minphatna te 1995 & 2003 kum Indepedence day commendation ah ngah in 1.5.2005 ni’n kumpi nasepna pan tawl nga hi. Zogam Haka, Matupi, Falam, Tedim, Mindat khuate ah kum 21 sung sem hi.
Sanglamah ki zang ding lai hilh dan thak (Taxonomy of Educational Objectives) kawl gamah tun (1976), School Board of Trustees phuatdan (1998), School Profile & Working Calendar limzat kik ding dan (1999) leh General Science laibu thak (2000-01)te a geel Chairman in hi in Kawlgam bupah ki zang hi. Sawlmang, citak leh ki zen ahih man tungsiah leh pakta hi. A theihna leh a siamna te ah kingengkhai saklo ahih a seppihte’n nuam tuam sa uh hi. Ama kiangah huhna a ngenn kha khempeuh a huh theih tawp in panpih ahih manin mite’n mai ngap thei uh hi. Mi deidanna neiloin sem ahih manin mi muanna ngah hi.
Falam Hihg School Diamond Jubilee (1983) bawl in Zomite’n High School neih a ki pan khantohna leh ma sawnna a kim in Magazine sungah khum hi. Zomi Nam Ni kum 50 cin 1998 kumin Golden Jubilee Yangon a bawlna ah makai in Zomi madawkte 911 Pahtawina laipi pia khia in Golden Jubilee Commemorative Magazine sungah a min uh khum hhi. Zomite pianna gui khat hihna thei in ki pum khat nading leh kilap san theih nading lunggulhna tawh Concise Study of Chin History, Culture and Traditions laibu kumpi phalna leh Kawllai in gelhna ah makaih hi.
Zomite’n thu leh la ciin theih na dingin Zolai Masawn Pawl-ZOLUS(1994) phuan khia sungah ki helin Zomite’ theih huai, ciin huai, kephuai, thu leh late ki gelhna ZOLUS Journal ah endikpu in pang hi. Zomite’ kipawlna namkim ah ki hel in zang uh hi. Gamsung gam pua a om Zomite’ thupi tuamtuam piak Pahtawina leh Kipahpihna Laipitampitak leh pianna Haiciin khuabup pahtawina mualsuang phuh (2005) ngah kha ahih manin angtang mahmah hi. A zi Nu Ciin Khan Lun, Bawmkhai, B.A, M.Div. tawh tapa 4 leh tanu 1nei uh hi. Pasian na leh leitung vai-ah Zomite’ ading sep theih laiteng a tawp dong sep suakdingin lunggulh in ki-ap lai hi.