Rev. Dr. Zam Khen Thang
Pu Pau Za Kam leh Pi Lian Za Cing te ta pasal 4 leh numei 4 lak panin a gukna hi a, 1935 kum December 7 ni-in Tedim kuha ah suak hi. 1942 kumin Tedim sangpi ah sangkah kipan hi.1950 kum panin Yangon St.Paul’s High School ah sangkah zom-in, 1954 kumin tan 10 laivuanna ah Additional Maths Distinction ngah-in, First Division ah zo hi.
Kawlgam buppi ah a sang penpan 14 na-ah om hi. Kumpi lam panin Collegiate Sholarship pahtawina kha sim—in sum a piak ban-ah, Christian Sangnaupang te lak panin a siam pen pahtawina letsong Judson Award zong Burma Baptist Convention panin kipia hi. Zomi lak panin zong a hat pen ahihna Hill Chin Students’ Proficiency Prize pahtawina zong ngah hi.
Yangon University ah sangkah zomin,1957 kum-in B.Sc Engineering a kum masa (First Year) a zawh khit ciangin kumpi in U.S.A Illinois University ah a Laisim zomdingin State Scholarship tawh puak hi.1961 kumin Illnois University panin B.S.E.E (Bachelor of Science in Electric Engineering) degree ngah hi. Tua khit phet-in Denver khuapi ah Electric Engineer 1962 dong sem-in, Kawlgam hongciah ciangin Hawaii, Japan, Hongkong leh Thailand te ah hawh hi.
Kawlgam hong ciah kik 1962 kum panin Shan gam Taunggyi khua ah Township Engineer sem-in, tua panin a zaa khangin Kyaingtong ah District Engineer sem hi. 1969 kumin, kumpi in Laisim zom dingin France gamah puak leuleu hi.1972 kumin Paris University (University de Paris) panin Ph.D (Computer Science) degree, Tres honorable kici a sang bel tawh zo hi. Paris University Sorbone panin French pan Diploma zong ngah thuah lai hi.
A sangkah hun sungin England, Spain, West Germany, Italy, Switzerland gam te ah zin kawikawi hi.1974 kumin a zaa khang in, Peoples’ Pearl and Fisheries Corporation ah Mangpi zaa tawh A.D.B Project Manager sem hi. Tua hun sungin kumpi tavuan tawh France gamah kha 4 sung vahawh kik hi. September 1,1984 ni-in Yangon Judson Chapel ah Daw Mie Lay Nyunt, B.Sc tawh pumkhat suahna nei hi.
Tua kum aa kipanin Korean Embasssy ah Consultant Officer kumkhat sung sem hi.1986 kum ciangin France te Company S.I.T.A ah Manager for Myanmar kumkhat sung sem hi.1990 pan 1991 dong, Singapore a Genetics Computer Company ah Consultant ban-ah Bulls & Bears Company ah Portfolio Executive sem hi.1992 kum ciangin a lunggulh tawntung ahi Pasian thu sin dingin Singapore panin Philipines gamah pai-in, International School of Theology (I.S-O.T) degree a ngah khit ciangin Kawlgam ah Pasian sung aa nasep kipan dingin a innkuan un hongciah uh hi.
V.C.F kici Victory Christian Fellowship te tawh kipawl in, Kawlgam mite lakah nasep hong kipan hi. August 29,1998 in Malaysia gam aa Victory Christian Fellowship te in Tuiphum Sia (Ordination) pia hi. 1996 pan 2000 sungin Pasian nasepna tawh kisai-in Malaysia, Phillipines leh Hawaii (USA) gam te ah va zin kawikawi hi. 21.7.2000 ni-in Phillipine gam Manila Silang zatopi panin Topa kiang hongzuat sam ta hi.