Lead Guitar tumsiam Jacob Mungta
Minpi le beh : Thang Lam Mung (Naulak) Kham khua : Anlangh
Tulian omna : USA,Atlanta
Suahni : Khuado Kha ,1979
Pianna Tuun leh Zua min : – Cin Ngaih Dim (Hatlangh) ( Nu ) – Tun Khaw Nang (Naulak) ( Pa )
Sanggam Laizom te min : –Tuan Go Mang, -Luan Khat Man, -Cing En Niang, -Dim Suan Nuam, -Kei (anau pen). *Ukna (Hobbies) : La ngaih, Lai sim, Pasian thu ngaih, Inn puah, Movie et.
LST Mun : Kahla 3:24, Rom 12:12, John 3:16
GZC 1 : Hong dongpah saisai nung, Music lam na kidiah zawh asawt ta hia?.
JMT: Music lam kadiah cil pen, Kaneu tung pan cihtheih hi. Ahang in kaneu lai-in, ka Pano Pr. Do Za Thang (Kimpu Seven’ pa) in Classical Guitar zaknoptak a tum’ka ngaih na pan, Music ukna sisan hong om in, tuni ciang, Music sungah akidiah to suak hi-ing. Tua bek tham lo-in, ka nu in ka neulai-in, “na Pa pen Khamtung gam ah “Guitar anei masa pen hi” cih hong gen ( a thu kician bel kan nawn keng ) ngei hi.
GZC 2: Album/Mv bangzah tumkhin, Nong genthei ding hiam?
JMT: Album ah ka kihel masak cil na pen, Malaysia ah Zomi sung pan akibawl masa penpen, “Lametna Ni” Album sungah Bass Guitar na tum ing. Tua hun sung mah in, ka inn ah hong giak ZCF Canaan pawlpi khangno teng tawh kikupna pan aa hong piangkhia ahi, Zomi sungah amasa pen“Evangelistic Live Worship”cih, Sia David Suum makaih na tawh kibawklkhia aa, tua lai ah, Lead Guitar pen Kei leh BJ Langhno in alangtuak na tum ung. Tua lo bel, dawng khat, dawng nih katum na zong, pawlkhat om.
GZC 3: Zomi sung minam dangte i la vasak pihthei le va tumpih theiding ih neih na angtang hiam?
JMT: Angtang mah ing. Nidang in ih Zomi sungah Music lam hong pankhia masa U Lam Cin te leh Lengtong Band te khit ah ih Zomi Music ban kizom lo ding hong bang hi. Tua khit ciang, Kawlpi pan in, Nyi Nyi Khine, Kyaw Khine (Khuppu) te, Zangkong pan, Zen Lian cih te in Zomi Music maban hong zom to uh hi. Tua khit ciang in, E Tuang leh Muang Muang, Khualtawng (Amen), Deihpi cih (ka phawkpak teng) bang in, ahunzui-in, Zomi Guitarist hong kizom to hi. Tua khit tawlkhat sung bang, Zomi sung ah Musician hong kizom nawn mel lo tawh kibang hi. Malaysia pan in, Sia BJ Langhno leh Ke’n maban hong zomto in, tua pan in, tuni ciang dong, lamet loh zah dong in,Topa’n, hong kibehlap sak aa, kei’aituam dan in ngaihsun in, Zomi khangthak Musician tampi hong piankhiat kamuh teh, angtang in, kakipak mahmah hi. Tuhun ciang in, Minam dang te la atumsak thei ding leh, minamdang la asa thei ding, Zomi te ki om tham ta ahihman in, ka angtang mahmah hi.
GZC 4: La/Music nang i idea ngiat tawh nagelh gei hiam, Na music tum/laphuah lakpan hoih nasak pen in bangla?
JMT: La phuah pawlkhat bel nei mah hiveng in, mipi’ mai aa luikhiat ding zah in, a hoihlua om salo kahihman in, hici koih lai phot ingh. Music bel mailam ah bawl sawm mahmah ingh.
GZC 5: Zomi te koici kalsuan leng mailam ah music sung kipum khat in ki khangto thei ding?
JMT : Zomi Music akhantoh theih nading leh kipumkhat theih nading in, amindawk masa te in, khangthak te deihsak na tawh pantah in, Khangthak te’n zong, mi masa te zahtak bawl in, akisap leh thudong in, kiniamkhiatna tawh hanciam tek lehang, Zomi Muisc khangto ding hi cih, kei mimal muhna hi.
GZC 6: Music tawh a kisailo na gennop khatpeuh hong luikhia dingin hong thuum ungh.
JMT: “Kei nangawn” hong phawk kha aa, hici bang in, holim na nong neihpih uh, kipak mahmah ingh.
GZC :- Koh lungdam zaw kan ungh, a ki geelsa hunte hong picin nahih manin, mailam ah na kalsuan na, nasep khatpeuh ah Zomi te a laamsang zo semsem dingin hong lamzang toto laita in. Na Zomi pihte in hong angtang ung maw.
