Lt.Col. Lian Cin Zam, Zeya Kyaw Htin

Pu Pau Kho Mang leh Pi Ton Cing te tapa hi a, 13.12.1914 in Mualbeem khua ah suak hi. A zi Nu Ciin Za Ngul tawh, tanu 2 leh tapa 1 nei uh hi.
Sangkah na: Mualbeem khua pan Zolai Tan IV a zawh ciangin Tedim A/V Middle School ah Tan VII zo hi. 1933 sungin Kawllai Tan IV Kalaymyo pan zo hi. 1934 in sumphuk sunin pilna zo hi.
Nasepna: SPPS Tedim ah tawmvei sung Siapi sem hi. 1935 kumin Falam ah Burma Military Police Bn. ah galkap lut hi. 17.4.1937 in San khat (Lance Naik) ngah a, 19.4.1937 in San thum (Havildar) ngah in, 15.3.1938 in Jemadar (Governor’s Commission) ngah hi. Burma Frontier Force, Myitkyina Battalion ah ama’ Coy. tawh piang hi. 20.5.1942 in amah leh a Coy.buppi Japanten man uh a, Mandalay Kumpi huang sungah kem uh hi.

Ama vaihawm siamna tawh Japan te in khah khia hi.16.7.1942 pan Western Chin Levy ah sem hi. Mangkang galkapte tawh India gam ah nung kik khawmin 2nd Buregt, The Burma Rifles (Special Force) ah sem hi. 1.9.1944 ni-in ABRO Commission 2/Lt. ngah hi.1.3.1945 in Tedim pan Lt. ngah a, 1.4.1945 in Capt. ngah in,29.4.1946 in Major 2/i.c C.O ngah hi. 22.12.1947 in Lt.Col. ngah a, 3rd Chin Rifles ah CO sem hi. Kawlgam suahtakna lak ding ciangin ABRO Commission ap kik a, 4.1.1948 pan Burma Army Commission suak hi.

Karenni State ah Hesan Force makaih in galsimin kuan hi. 31.2.1948 in Karenni State ah Military Administrator tavuan sem hi. 20.2.1949 in Meikthilar ah KNDO te in amah leh a battalion buppi in man uh a, ama siamna hangin bangmah ci loin suakta pah uh hi. Tua hunin thau thupi khempeuh ama khut sungah om hi a, ama siamna hangin galte khut sungah tung lo hi. Thaupi teng galte khut sung tung leh Kawlgam tangthu atuam khat hi thei ding hi.

1.5.1949 panin Pegu Front ah Lion Force uk a, gam makaite tawh kitel khialhna nasia takin om in buai dektak hi. 5.3.1951 pan Staff College kah a ‘A’grade tawh ong hi. 1952 in 15th Buregt Hmawbi ah phuan a, C.O.. sem hi. Phyu ah a piat a kipan gam sung gal simna tuamtuam ah makai hi. Lt.Col. Lian Cin Zam a thei ngei Mikang, Mivom a Kawl a Zo in a ciim, a pilna, a lungduaina, a thu manna, a thukhualna, leh a kiniamkhiatna te zahtakin amah it ciat uh hi.

Kawlgam adingin Commanding Officer muan pen khat ahi hi.
Minphatna: 4.1.1957 ni-in Zeya Kyaw Htin ngah hi.
A Sihna: 4.8.1957 ni-in Mingalardon galkap zatopi ah leitung nusia hi. A luang vanleng tawh Zogam ah kipua a, 19.4.1958 ni-in a pianna khua Mualbeem ah Zo ngeina in kivui in amah itna in sai, sakol, sial, lawi leh bawng te kawsah in kikeng sak hi.