Jemadar Vungh Khua Lian
Nu leh pa – Pu Suang Vungh leh Pi Phut Ciang
Suahni – 16.6.1913 (Laaitui)
Pianpih sanggamte: 1. Neng Pum Man Khua Niangh (Gualnam) 2. Hau Khua Ciin Khup Vungh, Tuidil (Suantak) 3. Theu Tual Dim Khan Cing (Munsuan) Mang Khan Ciang (Munsuan) 1. Niang Ngul Thiau Mang (Muizawl – Hatlangh) 2. Niing Za Cing Lut Za Thang (Mitsum) 3. Vungh Khua Lian Hau Khua Kim (Gualnam) 4. Ngul Za Nang Awi Do Niangh (Hatlangh)
Zi neihna: Pu Thang Lian leh Pi Am Dimte’ tanu Pi Hau Khua Kim tawh kitengin tanu tapa 8 nei hi.
A tate: 1. Ciang Lamh Cing Dai Sian Thang (Gualnam) 2. Vungh Suan Lian, B.Sc Lian Khua Man (Luisuk) 3. Ciin Za Niing Gin Go Thang (Munsuan) 4. Lian Khan Khai, B.Arg.Sc Niangh Do Man (Gualnam) 5. Pum Za Kam, B.Sc Niing Khawm Mang (Luisuk) 6. Dim Ngaih Hau Awn Khan Khup (Hatlangh) 7. Tualh Khan Mang Tangval lai in si 8. Niang Ngaih Vung Awn Sian Pau (Gualnam)
Nasepna leh mapannate: 1. 15.11.1933 ni in Kawlgam galkap lut hi. 2. Galkap sungah Training tuamtuam a zawh khit ciangin 1942 kumin Jemadar za ngah hi. 3. Galkap sungah kum 14 a sep khit ciangin 25.6.1947 ni in galkap pension la hi. 4. 1948-49 sung Laaitui ah hausa sem hi. 5. 1954-60 sung Tedim gam No. 5 Circle leh 1960 – 64 kum sung No. 11 circle te ah Circle Chairman (Khawk uk) sem hi. 6. 1960 – 64 sung Laaitui khua hausa (a 2 veina) sem hi. 7. 1967 – 74 sung Tedim gam Lotho Kipawlna ah makaipi sem hi. 8. 1974 – 78 sung Laaitui khua hausa (a 3 veina) sem hi.
A khua a tui ading a sepnate: 1. Mailam Nainganyi vaihawmna a baih nading leh nautaangte’ tel Councilte a kip nadingin, 1948 January kha in Capt. Mang Tung Nung makai in mi 22 tawh KSVP (Khamtung Suahtakna Vaihawm Pawlpi) phuan uh hi. 2. 1954 kumin Laaitui sanginn leh sia inn teng siikkang tawh laihsak hi. 3. 1958 kumin Mansuang gunlei thak bawlna ah makaipi sem hi. 4. 1961 kumin Laaitui Private Manglaisang phuan hi. 5. 1961 kum mahin Laaitui Consumer Procos phuan hi. 6. 1963-64 kumin khausanlui tui, nylon pipe tawh khua dong laksak hi. 7. 1967 kumin Lamzang-Mansuang lei Mawtawlam tawhna ah makaipi sem hi. 8. 1974-78 kumsung Laaitui khua pan Lentang dong Mawtawlam tawhna ah makaih hi.
Gamdang paina: 1. Galkap sungah khelhna nei ngeilo ahih manin 8.6.1946 ni in England gam London khuapi aa kibawl Leitung galpi nihna zawhpawi (II World War Victory Ceremony) ah kihel dingin Kawlgam galkap sungpan kiteel aa, 6.6.1946 ni in Mangkang kumpipa George VI tawh London khuapi ah va kimu hi. Hih England kumpipa tawh kimu dinga kiteelte in a thahoih, a meelhoih, a pil a ciim leh thutheite kiteel ngiat hi a, Pu Vungh Khua Lian zong teelcing ahih manin a pai ahi hi. A kiteel lai in amau galkap sunga bawk 3 pa in ama tangin painuam napi in, a meel a sa leh a pilna in Pu Vungh Khua Lian zahin cinlo ahih manin pai thei loin, tua gualzawhna pawi ah Pu Vungh Khua Lian mah a kiteel ahi hi. 2. Tua gualzawhna pawi ah Victory Parade kidemna zong om aa, tua ah Burma Rifle-te in a khatna ngah uh aa, tua hangin Europe gam khuapi lian ahi Paris, Berlin, New Castle, Edinburg, Glasgow, Chi bury, Rome leh Naples khuate ah kihawhsak kawikawi hi.
Pahtawi ngahna: 1. 1949 kumin Dol Laisen, 2. 1955 kumin Pyidawtha Planing Silver Medal, 3. 1960 kumin Ngun namsau (Silver Sword) te ngah hi.
A sihna: 8.2.1982 ni in Laaitui khua pan leitung nusia hi.
A la a. Van sin nuai aa khua cih zatam, ka bat loh khua omlo e. b. Sim leitung teng namcih mim phung, ka ho loh mi omlo e. a. Sinlai phel gua bang khauh a lun ka ho aw, Za tan pheilam a tawn e. b. Tong nem tawh kop, ban zal zun siam, lun ka biak, Vang khua lii tui in zel e
Source: Laaitui Magazine 2020 pan kila
