Lt.Col. Putpa, B.G.M

Pu Achin leh Pi Dim Khua Cing te tapa hi a, Nu Niang Za Vung tawh tanu 3 leh tapa 3 nei uh hi.

Sangkahna: 1921 pan 1923 dong Tedim GPC ah kah a Tan 1⁄2 leh Tan I zo hi. 1923 pan 1925 dong Tonzang GPC ah kah aa, Tan I pan Kawllai Tan III zo hi. 1925 pan 1930 dong Tedim ah kah a Tan VII zo hi.

Nasepna: 1.8.1936 ni 10/20 Buregt ah galkap tum hi. 1936 pan 1956 kikal Kawlgam, Pakistan, India, Belgium, England, Germany te ah training atuamtuam 24 vei kah hi.1937 in 2/Lt, 1945 kumin Capt, 1950 in Major ngah hi. 1955 in Lt.Col. ngah a, 1958 in medical board in tawp hi.

Sepna mun: 1937-45 kumin Mangkang galkap Bn. ah (Burma Campaign), 1946-50 2nd Bn. Chin Rifles, 1952 in 2i/c 1st Chin Rifles ah, 1952 mahin 20th Burma Regiment ah, 1952-58 in 1st Chin Rifles ah Commanding Officer sem hi. Kimawlna lam zong kiva mahmah hi.

Minphatnate: 1.1939-1945 Star, 2.Burma Star, 3.War Medal, 4.Burma Galantry Medal (BGM) 5.Defence Medal, 6.Lut-myauk-yay Tazeik, 7.Pyipa Yanhnein Tazeik, 8.Lotlatye Tayeik. 9.Naing- ngandaw, 10.Sit-hmu-htan Tazeik. Galkap a tawp zawh ciangin Tedim galkaplui kipawlnaphuan hi. Lokhawhna, pilna, hausa, Circle Chairman, biakna te ah makai sem kawikawi hi. Galkaplui kipawlna ah a sep sungin Tedim Zatopi ah X’ray khat, MCH inn ding khat galkaplui min tawh pia hi.1962-1972 sung Revolutionary Council in Chin Affairs Council Member in koih hi. Zozum Upa a sep sungin Zomite phattuam nading tampi semkhia hi.

A ma-tutte: 1.Tonzang in Myone a ngah na, 2.Tedim a meiphelh zum ding, 3.Sial Lum Khulh (Siallum Fort) puahna, 4.Sagaing Yawthitgyi sang (ADNG sang) a Tedim kam-a sin ding vaihawm, 5.Leilet bawl nading tui laksaknate:1).Cikha, 2).Satawm, 3). Hmawngtlang, 4).Cerhmun, 5).Ramthlo leh mundangte, 6.Gam ki-uk na Upadi (Union Constitution) bawl ding a Zogam a kiseh mi ngate lakah khatin kihel hi. 7. Tonzang gam nailung khawi nading leh nailung khawite kipawlna phuankhia hi. 8.Mindat khua Khuado Hall ding vaihawmsak hi.1972-74 dong Chin SAC ah Upa sem hi. 2.3.1974 in Naingnganzi pension la hi. 26.1.1996 ni-in a tenna Leilum a innpi ah hong nusia hi.

Tate: (1) Nu Cing Khan Niang, BA(Burmese), Assist. Lecturer + Pa Kham Zen, (2) Nu Niang Khua Hau + Pa G. Thang Khan Mung, BAg, Deputy Director, (3) Pa Cin Sian Mang+ Nu Ciin Ngain Lun, (4) Tg Cin Uk (1192) khualzin omna ki thei lo, (5) Nu Len Lun Niang + U Hla Nyunt, (6) Pa Pum En Thang BSc.(Math)+Nu Man Hau Ciin, BSc.(Chem).