Pu Thawng Cin Thang
Pu Do Tual leh Pi Pum Kho Man te tapa hi a, April 16,1914 in Saizang khua ah suak hi. A zi Nu Niang Kho Mang hi a, a sih ciangin anau nu Cing Lun Niang tawh kiteng uh a, a ki gawmin tanu 5 leh tapa 4 nei uh hi.
Sangkahna: 1921-24 dong Tedim khua Kumpi Kawllai sangah Tan I pan Tan IV sin hi. 1923-1930 dong Tedim khua, Anglo-Vernacular Middle School ah Tan IV pan Tan VII dong sin hi. 1930-33 dong Sagaing khua, Manglai/Kawllai kumpi sangah Tan VIII pan kah a, Tan X Additional English tawh zo hi. 1933-41 dong Yangon University Teacher Training College ah kah hi.
Nasepna: 1933-36 dong Falam ah Apprentice Clerk sem hi. 1936-39 dong Chin Hills District, Falam ah Sub-Inspector of Schools sep leh, Falam sangpi ah JAT tawh thuah hi. 1939-41 dong Yangon University Teacher‘s Training Collegea kah sung University Training Corps ah kum nih bit lut hi.1941 May kha
a kipan Tedim gam Pyinya-uk leh Galkap lam, gam-ukna lam leh mipi kikal ah Civil Affairs Officer sem hi. 1942 kumin Japan galdo na‘ngin Western Chin Levies phuankhia a, Company Commander tavuan sem hi. Tua huna kipanin Allied Forces te leh Civil Administration kawmin, Political Liaison Officer, Treasury Officer, Quartermaster, Intelligence Officer, leh Interpreting Officer te sem kawm hi.
1943 kumin Assistant Divisional Education Officer za kipia ahi hang, sangte kikhak khin ahih manin gam- ukna lam (Civil Administration) ah hunbit in sem hi. Tedim Vuandok leh Levies Galkap ukpi nasep a thuahkhawm Kelly tawh gal mai teng ah pai kawikawi hi. 1944 March kha-in, Mangkang Galkapte Tedim-Tonzang-Imphal lam ah nungkik a, Tedim a nusiat ni-in, Vuandok Kelly tawh gal gam lam a hi, Saizang/Kaptel lam manawhin gal guk tawh Japan te do nang vaihawm dingin leh pai a, Saizang leh Phaileng khua kikal giahbuk ah a u, Ukpi Thawng Za Khup tawh Japan te do kik nang kam kikumin, a kivaikhak khit ciangin Manipur gun kantanin Kaptel,Heilei,Suangzang,Saek, Khuakhing, Lennupa gam suangah phualsat uh hi.
Tua huna a phuah la:
(a) Huihkhi lang dang seino gual aw, ciin ho neem tuang nusia‘ng e, (b) A gal pan mitmei suan ing e, ka sial lum tawh hei ing e. Tua Lennupa gam sungah Sukte Independent Army phuan hi. 1944 June kha-in, Japan (CDA) te phualpi Kaptel sim uh a, a vekin hingmat-in Aizawl khua ah puak hi. Kaptel khua ah S.I.A (Sukte Independent Army) mi belap a, September 11,1944 ni-in Manipur gun kantanin Mualbeem khua la hi. Tua laiah C.D.A makai Pu ZaBiak zong hingmat in, Imphal ah puak hi. Mualbeem khua a gualzawhna leh galsim lai nadingte vaihawmna pawi ah Sia Sing Lian in Pu Thawng Cin Thang pahtawina la phuak hi. (a) Gual in taitai hong ci ding a, dam dildialin hei ing e. (b) Suktui lunmang hawmsiam komin, sul ah ong hei kik ing e.October 14,1944 ni-in England kumpi in Pu Thawng Cin Thang pen ABRO Commissio No.1446, Staff Lieutenant za pia a, gal vai leh gam-ukna vai tawh thuah khawm hi.
Sukte Independent Army makai sungah a kihel, Pu sing Lian leh Pu Suang lian te sawl in, Sihzang makai Pu Vum Ko Hau leh Pu Awn Ngin te tawh kimusakin, Japan Galkapte do nang vai-hawm khawm uh hi.1945 kum sungin Burma Frontier Service ah Vuandok za kipia a, 1945-46 sung Tedim, Falam leh Hakha gamte ah Vuandok sem hi.1947 kumin Panglong thukimna letmat thuh dingin, gam makaite ngaihsutna pia hi. Supreme Council of United Hill People kipawlna ah Khamtung mi Upa 6 sungah khat-in kihel hi. Kawlgam ( tajccHOya’) bawlna ah Zomi buppi in Deputy Counsellor tel a, a san loh ciangin, Deputy Councellor ( tBuHay;t&m&Sd) tavuan kisemsak veve hi.1947 kum April kha-a Maymyo a kibawl Rees William’s Frontier Areas Committee of Enquiry ah Advisor sem hi.1947 kum sung mahin Kayah gam sung Sawbwa a si khat tangin panmunlen ding a telsak commission mi 3 lakah khat in kihel hi.
Bogyoke Aung San makaihna tawh Soronto Villa Rehabilitatian Conference, 1947 ah upa khat in kihel hi.1947 kum sung Kawlgam suahtakna ngah ciang ki-uk nang sepkholhnate ah Zo Zum nasep ding gel kholhna ah Atuanvuan (Additional Secretary) za tawh makai sem hi. January 4,1948 suahtakna ngah huna kipan, Zo Zumpi ah Atuanvuan (Secretary) sem hi. January 4, 1949 in Thiripyanchi Minphatna ngah hi.1948 pan 1954 sung Zo Zumpi Atuanvuan, Ministry of Home Affairs ah OSD, Hantharwaddy District OSD leh ADC (Additional District Commissioner) nasepnate sem hi. 1954 kum panin Zogam- Falam Mangpi sem hi. Mangpi a sep sungin, Zomite lunggulh pen ahi, Thau Licence leh Dol Licence tampi piakhia hi. 1958 kum pan, Zogam Menzi sem hi.
Caretaker Govt. hun sungin, thau khempeuh kikhawm ding cih thu a om ciangin, “Keima’ piaksa hi; Zomite in hih thau te tawh kumpi langpang ngei lo ding ci-in tavuan ka la hi,” a cih manin thau kikhawm nawn lo hi. Zogam Menzi nasep leh Session Judge tavuan sem khawm hi.1964 kumin Zomi kumpi langpang dinga kithawite amah-mah in zol kik zo hi. 1966 kum June kha in Mandalay Commissioner, 1969 kumin Kachin Pyine ah Menzi, 1972 kumin Home Ministry ah Govt. Servants Screening Board ah upa sem hi. April 16, 1974 ni-in pension la hi. January 18, 1986 in Yangon ah hong nusia hi. Tenna: Yangon.
