Rev. Dr. Jacob Kham Khan Mung (D.D)

Tonzang khua Pu Zen Za Nang (Mate beh) leh Pi Khawm Niangte sung panin 1965 kumin Tedim ah suak hi. Tonzang, Tedim, Tamu, Yangon ah teng kawikawi hi. Dr. Sandar Nwe@ Nu Niang Lun Cing(Civil hospital, Shwepyithar) tawh kiteeng hi.

Sangkahna: 1970 kum in Tedim ah sangkah ki pan a, 1982 kumin Tamu pan tan 10 zo hi. 1989 Bangalore India pan B.Th 1990 kum in Bangalore India pan BD ngah hi. Pasian na sepna leh gualzawhna tungtawngin D.D. (Doctor of Divinity) pahtawina ki pia hi.

Thudinpih: “Ahoih thei pen dingin sem in” (Do the best). Tapidaw innkuan gamtat luhek kipattah phat mahmahna pan khangkhia h. December 31,1984 in Topa Zeisu a honpa leh a Topa in sang hi.

Piangthakna a ngah khit ciangin Pasian thu lunggulh mahmah a, Pasian nasep ding bekbek ngaihsutin nei hi. February 17, 1985 ni-in kituiphum hi. March 5,1985 ni-in Isaiah 6:8 “Hiah om ing Topa, kei hong sawl in,” cih tungtawnin Pasian nasep dingin khensatna nei hi. Pasian nasepna tawh kisai-in, 1991 kum November kha a kipan Yangon ah CLC min tawh lailam nasepna kipan khia a, Kawl lai, Zo lai tawh laibu thoh hi.

Tu ciangciang laibu nam (100) val thoh khin zo aa, ama gelh tawm laibute: Basic Bible Doctrines, leh Survey of the Bible cih te a om hi. 1996 kumin Myanmar Christian Fellowship phuanin Kawlpau tawh biakpiakna khat kipan hi. 1999 October kha in Bethel Baptist Church phuankhia hi. 2001 kum July kha in Bethel Baptist Institute hong hi. 2002 April kha in Bethel Press ci-in laikhetna tawh Pasian nasepna behlap hi. Tua banah Fareastern Fundamental School of Theology ah visiting lecturer (1995-1997), Godpel Baptist Bible Seminary ah Adjunct Faculty (1995-2001), Evangelical Baptist Bible College ah Lecturer (1996- 2001), Grace Baptist Theological Seminary ah Lecturer (1995-1998), te seem aa, tulaitakin Bethel Baptist Church ah Pastor sem in, Bethel Baptist Bible Institute ah president sem hi.