Pu Chin Sian Thang

Tonzang Township Zampi khua Pu Sum Hang leh NU Niang Khaw Cing te sung pan 6.4.1938 in suak hi. Sanggam laizom 5 lakah numei 3 leh pasal 2 hi a, a upa pen hi. Mandalay pan 1958 kumin tan 10 zo a, Yangon University ah B.A 1967, LLB 1968 kumin zo leuleu hi. Buanli khua mi Pu Kham Za Kam leh Pi Awi Cing te tanu nihna Nu Don Khan Niang tawh tapa 5 leh tanu 3 nei uh hi.

Mapan nate:

-Rangoon Hill Chin Student Union leh University Chin Student Association ah president sem hi.

-1961 kum Taunggyi Conference, Mualtung mi teng kimuh khopna ah thugenna nei hi.

-1971 kum pan Sitni (Lawyer) sep kipanin 1986 in Kalay Township Sitni makai pi ngah hi.

-1988.8.4. ni-in, Zomi National Congress –ZNC minam party pankhia uh hi.

-1989.5.27 ni-in, ZNC Annual Meeting, Zogam Tedim khuapi ah bawl uh hi.-1990 kum General Election ciangin Parliament Member in pang hi.

-1998 kumin CRPP (Committee Representing for the People’s Parliament) phuankhia uh hi.

-2001 kumin UNA (United National Alliance) phuan Member khat in kihel hi.

-2010 General Election ah 2008 Constitution hangin ZNC kihel lo dingin pu laak khia hi.

-2015 Kawlgam bup kiteel pi ah ZCD party panin Parliament Member hong ngah hi.

Thongkiatna:-30.10.1972-4.3.1974 dong Federal tawh kisai thu a sunna hangin Mandalay thong inn tung hi. -2.3.1992 in Kawlpi a inn pan kiman in Yangon ah suak ta hi.-10.5.1993 in Kawlpi a inn mah pan kiman kik in kha khat et cik na thuak hi.-10.10.1996 in kumpi te in nipi kal nih ni(14) sung kemcip leuleu hi.-6.9.1998-14.5.1999 dong dam lohna hangin Sakura zato ah lum hi. -15.9.1999 in kumpi ten MI-14 Quarter, Botataung Township Yangon ah kem hi.  -3.11.1999-14.6.2001 sung Yangon UN tawh thu kikup vai in, kumpi ten kem leuleu hi.  -28.10.2007- 30.10.2007 ni nih sung Saffron Revolution (puan sansilh) te hangin Insein thong ah ki koih hi.-30.5.2012 in ZNC Party pan ZCD (Zomi Congress for Democracy) ci in laih hi.

Pahtawina kipia te:(1) Zomi innkuan USA in “Zomi National Freedom Award” 2012 kumin pia hi.(2) Zomi Association of United States (ZAUS) Portland in “Zomi Patriotic Award” 2012 pia hi. (3) Zomi Association of Malaysia in “Father of Zomi” 2013 kumin pia hi.(4) Zomi Baptist Convention of Myanmar in “Ngal Liam Zua Pa” 2013 kumin pia hi.