Evan Langh Do Khup
Thawmte beh Pu Vungh Thang leh Pi Do Zen Cing te sung panin 24.12.1968 kumin Tonzang gam Kansau (A) khua ah suak hi. 1986 kumin Lia Cing Suan Niang tawh Rev Go Khen Thang in siangtho kiteen na pia a, tu in Pasian thupha tapa 3 leh tanu 2 nei uh hi. 9.8.1990 (Wed) ni-in piangthak a, tua kum mahin Topa leenggah huanah nasep kipan pah hi. Tua kum a kipan “Khitui Gospel Nasepna (Tears Gospel Ministries)” min tawh nasem in Zogam, Kawlgam leh Gamdang mun tuamtuam ah Crusade 500 vei val bawl khin a, mi tampi in gupna bukim (vantung thupha leitung thupha) ngahlawh uh hi.
Tears Gospel Ministries:-Tears Gospel Audio Ministry (1991)-1991 kumin “Nuntak kikna” kici lakhui bawlin khui 200 hawm khia hi. -1996 kumin “Khitui Gospel Lainatna Aw” kici lakhui bawl in khui 2000 hawmkhia hi. -Tears Gospel Literature Ministry (2000)-2000 kumin “Hauna leh Khansauna Thusim” kici laibu gelhin bu 2000 hawmkhia hi. 2004 kumin “Hauna leh Khansauna Thusim” bu 1000 bawk kik in hawmkhia hi. -2004 kumin Tedim Bethel Bible College in pahtawina in Bachelor of Christian Ministry (BCMin) pia a, Thesis “Khitui Gospel Nasepna” laibu gelh hi.-2007 kumin “Hauna leh Khansauna Thusim” bu 1000 bawl kik a, India kumpi phalna tawh Manipur University ah kumpi sang BA third year te’n Sang laisinbu in zang uh hi.-2011 kumin “Hauna leh Khansauna Thusim” Gangte minamte in amau pau in lekkhia in bu tampi hawnkhia uh hi.-Tears Gospel Mission (2002), 2002 kum a kipan tuni dong kum simin Zogam khanglam Kanpatlet gamah gammial nasem missionary 9 pan 12 ciang puak den hi.
Tears Gospel Video Ministry:-2003 kumin “Ngaih Anglai Ah” video VCD hawmkhia hi. -2005 kumin “Ngaih Anglai Mah” video VCD/DVD hawmkhia hi. -2006 kumin “Ngaih Anglai” video VCD/DVD hawmkhia hi. -2008 kumin ZYA fund zon nadingin “Tunnu Awnem” video DVD/VCD bawlsak hi.-2009 kumin “Nui zelin Kapzel dia” video DVD hawmkhia hi.-2010 kumin “Sian Anglai Ah” video VCD/DVD hawmkhia hi.
Gamdang ah Pasian thu genna: -1998 kumin Australia gamah Pasian thugen in pai hi. -2001 kumin Japan gamah Pasian thugen in pai hi.-2002 kumin Singapore leh Malaysia ah Pasian thugen in pai hi.-2004 kumin Japan gamah Pasian thugen in paikik hi.-2007 kumin Malaysia ah Pasian thugen in paikik hi.-2008 kum sung India mite kiang, Moreh, Lamka, Shilong, Guwahati, Delhi, Pune, Mombay khuate ah Pasian thugen in pai hi.-2010 kumin South Korea ah Pasian thugen in pai hi.-2010 kumin Australia gamah Pasian thugen in paikik hi.
Pahtawina:-1998 kumin Tedim, Soul Winning Laisiangtho sang pan Bachelor of Ministry (B.Min).-2004 Tedim, Bethel Bible College Bachelor of Christian Ministry (BCMin).-2005 kumin Laibu bawlna hangin ZCLS pan pahtawina Laipi.-2005 kumin “Ngaih Anglai ah/mah” video bawlna hangin “Zomite muhna leh theihna khansak” I min tawh ZCLS pan pahtawina Laipi.-2007 kumin “Ngaih Anglai” video bawlna hangin “Zo ngeina leh kampau te aman than lohna kemcing” cih min tawh ZCLS pan pahtawina Laipi.-Kipawlna tuamtuam leh Pawlpi tuamtuam panin zong adang pahtawina tampi ngah hi.
A Dinmun thupitna: Evan Do Khup: “Hauhna leh Khansauna Thusim” laibu a panin a tawp dong keima khut mahmah tawh ka gelh hi a, Zogam khanlawh nading leh zomite innkuan sung hong nop theih nading in lunggulhna khitui taak keuhkeuh in, ka gelh lai ahi hi. Hih laibu pen laibu dang khat peuhpeuh panin kiteikhia hilo hi. A simkha khempeuh tungah ih kisapna zuiin Topa Kha Siangtho in hong lawng a, thupha hong piak nading in thu kong nget sak hi.
