Pu Song Theu
Pu Goih Zel leh Pi Ngai Vial te sung panin 1884 kumin Tedim gam Kapteel khua ah suak hi. Nu Dam Kho Don tawh kiteeng hi. Mangkang kumpi in 1885 kumin Zogam Thangmual hongtung in Zogam hong la ta hi. 9.10.1892 kumin Kapteel hausa Ukpi Thuam Thawng Sihzang Ukpi pawlkhat in Myouk pa leh alawmte a suam lupna tawh kizui in Kapteel khua kihal sak in, thau lawng 180 leh sum tang Rs.1000 kiliau sak hi.
1989 kumin kum 13 pha a, Tote (Hausa te) piak ding saphei saliang te beh papi te kaikhawm in pia nawnlo in nekpih ahih manin tua hun pan hausa te maipha ngah nawnlo in asawt na ciangin Kapteel panin ki hawlkhia hi. Kum 19 aphak ciangin mi 80 makaih in sik khua lampi vat uh hi. Kum 33 aphak 1917 kum ciang Piantit kuan in Mangkang kumpi in Ngun nam pia hi. Phasahpahlah kumpi in zong Ngun namkhat minphatna in pia hi.
Pilly Babu, U Bakhin, Ahhuai leh Brundel te inn ah nasem in pau sin hi. Pilna deih in thupi sa a, Kapteel in sang ngah nading hanciam pah hi. Khua sung meltheih sungah lai thei om leh pahtawi nuam mahmah hi. Tan khat ong te pek khat, tan nih ong te peknih cih bangin hawm kawikawi hi. Kumpi nasem te leh College kah te hong ciahciang hawhpah in thu dongin ki kuppih pah hi.
Pilna deih ahih manin a tapa Kalemyo ah sangkah sung ompih a, Vuandok suak in Vuandok Gin Za Cin leh a tupa Song Theu-Theu Mang Za Suan te ahi hi.Pu Song Theu pen pil bek lo in khelpil se hi. Tedim pan kawlpi apai ciangin van puak man sum pia nuamlo ahih manin mawtaw sungah ama van teng hakkol tawh puase hi. Sitni pil ahih manin Mangvom Mangkang dual tuanlo hi. 23.4.1971 ni-in Kapteel khua pan leitung nusia hi.
Motto: (1) Mi poi mi hoihlo nuihsan deih lo hi. (2) Siktukilh tangkhat kia zong tawm in, man neisak hi.(3) Thuman lo a, gualzawh na ah meet na om kei ci hi.(4) Dawi biak na paai in, Laisiangtho leh labu zangin mi khempeuh it un.(5) Pasian in neek ding a, abawl khempeuh ne un ci hi.Pu Song Theu Capt Mang Tung Nung makaihna khamtung suahtak vaihawm Pawlpi (KSVP) ah mapang in asawt ciang CNO ah kilaih hi.
