Dr. Lian Sian Sing, M.B., BS

Pamin – Pa Pum Za Kam (Gualnam)

Numin – Nu Ning Khawm Mang (Gualnam-Luisuk)

Suah ni – 12 Feb 1985 ni’n suak

Unau – Pianpih unau 7 lakpan a u bel

Innkuanpih

1.5.2010 ni in Nu Dim Sian Cing (Naulak) tawh kitengin tanu 1 leh tapa 3 nei in, Pasian hon piak inn nuamah ka om uh hi. Ka tate;

1. Lia Mang Tawi Lun
2. Tg. Kam Tung Pau
3. Tg Hau Lam Mang
4. Tg Mang Van Sang

Siam sinna leh nasep lutcilna

Tan lang pan tan sawm dong St. Mary Sangpi (No. 3 High School, Kalaymyo) ah pilsinna ka nei hi. 2000-01 laisim kumin tan 10 laihuanna ah Maths le Science (Bio, Physics le Eco) Distinctions nih ngahin gualzawhna ka ngah hi. Mark gawm 371 tawh Magway Medical sangpi ah ka lut thei hi. Kum 3 khit ciangin Yangon ah kituah suk in University of Medicine – 2 ah ka zom thei hi. 2007 kumin M.B.B.S. ka ngah hi.

2008 sang man ciangin NGO khat ahi MERLIN ah nasep interview ka lut aa, Pasian hehpihna tawh nasep ngahin Malaria project asem dingin Thantlang, Chin State ah Project officer za tawh nasep ka lut hi. Pasian lamlahna leh Major Khup Cin Pau (Rtd)’ tanu Dr. Ciin deihsakna tawh 2009 kum sung mahin Vietnam gam Hanoi khuapi ah zunkhum lam tawh kisai conference khat ah Dr. Hau Mang le Dr. Thang tawh ka pai thei uh hi.

Gamdang tunna

MERLIN ah a sawtlo in Thantlang Township makai panmun Team leader ngah ding lametna om mah taseleh, thasum $275 nusia-in, nasep pan khawl nading lai khia-in, nasep a tangzai zawding ngimna tawh Yangon ah ka paisuk hi. Norway lam pai nading ka siau masa aa, a paisate a omsuak tam khin mahmah ahih manin Visa ngah loin, cih nading theihloh laaitakin Lawm Thang Za Khai le ka nau Kip Thangte tungtawnin Malaysia lam pai ding ka khentat hi.

U Thang Khan Sawm@Sawmno hon vaihawmsakna tawh Singapore lam tawnin Malaysia lam ka zuan uh hi. Gam leh nam ading nasepna Malaysia ah om sungin Minam aading nasepna ci-in Z.A.M. ah Volunteer le Medical officer dingin ka kipia hi. Z.A.M. min tawh UNHCR te tungah Grant siau-in Zomi Corner min tawh Rm 12,000 ka ngah uh hi. Tua grant sum tawh Zomi Corner Computer sai le sammet sai ka kipan thei uh hi. Refugee community tampi lakpan grant a kingah masa bel ahih manin angtang huai kasa hi.

Tuikhiang khuami Pa Zamdal deihsakna tawh Klinik Patel & Kim ah nasep siau in, ni 3 sung tawntung sum ngahlo in ama geiah atu bek dingin ka kipan hi. Malay leh Sen pau kamkhat zong apau thei vetlo khat in, Malay le Sen te kilak theihna Clinic ah kum 3 bang a sem man ka hi hi. Sum pek khat zong ngahlohna pan Malay ah ni tha a tambel pawl ding zah dongin Pasian lapsangna ka ngah hi. Ni tha Rm 500 ka ngah ni zong om ngei aa, a tawmbel Rm 180 nisimin ka ngah hi. Topa hoihna bek ahi hi.

Australia gam tunna

UN zum aa nasem Hakha-te Akhun acih ka lawmnu’ lawmte khatin Australia hon deihsakna hangin Australia lam ngim-in ka nei uh hi. Australia gam Adelaide ah khua a satsa Pa Thang Sian Dal@Dalta te’ deihsakna tawh 26 Feb. 2013 in Australia ka tung uh hi. Ka mangngilh theihloh interview khat ahihleh, Officer te-in gamteel nadingin interview hon sap ciangin ‘Gam pen kiteel theilo hi, ahih hangin unau sanggam na neih uhleh address hon pia un’ ci se hi. A tello te-in, ‘Ko Australia pai nuam ung’ acih ciangin officer te-in gam kiteel theilo hi, ci-in amau deihna pia ziau hi. Ko ahihleh, ‘ka sanggamte Australia ah om hi’ ci-in address pia in deihna mah ka teel veve uh hi.

Australia tun zawh kum 4 khit, 19 July 2017 ni-in gammi suahna ngahin 2017 December tha sungin Kawlgam ah innkuan-in it le ngaih teng tawh kimu dingin ka ciah uh hi. Kawlgam ka ciah uh ciangin Kawlgam le Australia a kibatlohna pawlkhat ka mu hi. Kawlgam ah Kumpite zawngin mipite hau thei uh aa, Australia ah kumpite hau in, mipite zong cimawh lua tuanlo hi. Australia gamah misi nangawn kithupisakin Than te kilipkhap lo-in kilim kep mahmah aa kituahtuah lo hi. Kawlgam ahihleh misi cih thadah mihing nangawn sum neikei leng kithupi simlo hi. Australia ah mizawngte ading kumpi huhna om aa, kisimmawhna omlo hi. Kawlgam ah sum ih neih keileh, nuntak a haksa mahmah ding dinmun ahi hi. Bangbang ahizong itna ngeina le thukhualna ah Kawlgam kaankaan om nailo hi.

Nasep ngeite

• Project officer/Medical officer – Merlin (NGO), Malaria project (2008-09)
• Medical officer – Zomi Association of Malaysia (2010)
• General Practitioner@GP – Klinik Patel & Kim, Malaysia (2010-2013)
• Volunteer, Interpreter – Migrant Resource Centre South Australia (2013-2014)
• Interpreter – Department of Human Services, ABC, On call Consultants International,
• Translating and Interpreting Service (TIS) (2013-tudong)
• Treasurer – Zomi Innkuan Adelaide (2014-2017)
• Chairman -BethelMissionChurch,Adelaide(2017-tudong)

Siamna leh uukna

King kimawl, Innlei innpuah

Lungtup

Pianthak mahmah leh hauh mahmah thuahkhop nading Mi tampi huh le pattah zawh nading Khang kizom aa thupha ngah innkuan hih zawh nading

Muhngei gam teng

1. India
2. China
3. Thailand 4. Vietnam

5. Singapore
6. Malaysia
7. Jordan
8. Qatar
9. Israel (Jerusalem, Jordan, Bethlehem, Nazareth)

Ka deih belh laibute

1. Lai Siangtho
2. A rich man from Babylon
3. Barefoot Investor
4. Think and Grow Rich

Tulaitak omna

Adelaide, South Australia.