Mahar Thray Sithu Captain Mang Tung Nung
Pu Pau Khen leh Pi Vung Lun te tapa hi a, 1.6.1901 in Muizawl khuaah suak hi. Azi Nu Lun Kho Zam hi a, tanu 1 leh tapa4 nei uh hi.
Sangkahna: A neu lai-in A.B.M Sia Shwe Zan, Sia Po Ku te tung pan Kawllai sin hi. 1909 in Tedim Kawllai sangah sangkah masa pawl ahi hi.1924 in Pachmari Small Arms School ah kah a, “D” (Distinguised) in zo hi. Tua sang ah 1925 dong sia sem pah hi. 1927 in Ahmednagar Machine Gun School ah kah a, “Q.1” tawh zo hi.1931-1932 in Nowgong Kitchener College ah kahin zo bek tham loin Minphatna ngah hi.
Nasepna: 30.11.1921 in Paltan tum hi.21.7.1925 in Jemadar ngah
hi.16.12.1936 in Subedar ngah hi.8.7.1937 in Burma Rifles ah Subedar Major ngah hi.8.10.1940 in Honorary Lieutenant ngah hi.4.4.1943 in Western Chin Levies pan A.B.R.O. ah Commission ngah a, 2/Lt ngah hi.2.11.1944 in B.R.C Hoshiarpur, India ah Captain ngah hi.4.10.45 in No. 2 Holding and Enquiry Centre (B) pan Major ngah hi. King George VI kumpi suahna pawi simin pai a, 12.5.1937 in Bucking-ham Palace ah King George VI tawh kimu hi.
1941 in Commander-in-Chief in nasep hoihna letmat pia hi.1941 in Kayin gam Kawkareik ah Japan gal pang hi.1942 in Tedim gam Levi phuan a, 1943 in Section Commander sem hi. Galkap sungah kum 25 a cin ni 31.9.1946 in pension la hi. 1947 in Panglong ah SCOUHP leh tangpite tangin pai hi. 1947 in Tedim pan Amat (MP) in telcing hi.1948 in K.S.V.P phuan hi.1948 in Zogam zumpi ah Parliament Atuanvuan (Secretary) sem hi.1951 in kitelna ah zo a, Prime Minister pa Atuanvuan semin Yangon University Councillor zong sem hi.
1956-59 in S.A.M.B ah O.S.D sem hi.1960 kitelna ah telcingin Zo Zumpi ah Atuanvuan sem hi.1948 in Thailand Goodwill Mission in pai hi. 20.2.1948 ni-in Zomi Nambup Ni (Chin National Day) kipsakna na’ngin Falam ah makai-in pai hi. CNO (Chin National Organization) phuan hi.1953-54 in India panin Kawlgam ading bawngci hoih leina leh puakna ah makai hi.1960 kitelpi ah Tedim Pyithu Hluttaw amat ngah a, Zo Zumpi ah sem hi.1962 ciang Naingnganzi pan tawlnga a, 1956 in Muizawl khua ah lokho in tangseu 150 la hi.1966 in Tedim Sub-division Cultural Committee Chairman sem hi.
Minphatna: 1949 kumin Kumpi in Mahar Thray Sithu cih Minphatna pia hi. Pahtawina Ngun Nam (Bird Wood Sword of Honour) ngah hi. 6.1.1968 ni, a khan kum 67 a phak laitakin Tedim khua ah si a, 7.1.1968 in Muizawl khua ah kivui hi. Tenna: Sakollam veng, Tedim.