Rev. Suak Za Go
Rev. Suak Za Go, Gobawi pen Valvum khua-a teeng Pa Dam Khua Zam leh Nu Luan Khua Niang’ sung pan a piang tapa a nihna hi a, 27.3.1948 ni in Valvum khua-ah suak hi. SPS Ngennung, SMS Griphi leh SHS Tedim ah kah hi. 1955 kumin a nu in a sih san khit ciangin Tuiphum pawlpi ah a innkuanun tapidaw sauk uh a, 1963 a ki panin CE Chairman semin ama kipiakkhiatna tawh Pasian’ na sep kipan hi.
1972 kum December sungin Rev. Hau Lian Kham’ thuhilh na pan in pianthakna ngah hi. 1973 kum in Evangelical Convention Churches, Missionary Board Churachandpur(Lamka) in Lai Siangtho sangkah dingin Bangalore ah puakin huh uh a, 10.3.1977 ni in BRE degree ngah hi. 29.2.1978 ni in Lia Gin Za Man tawh Khristian ngeina siangtho bangin ki teeng uh hi.
1.2.1981 ni in Kawlgambup AG General Council in AG Golden Jubilee pawipi sungin Putao ah ordination pia hi. A tate pen Rev. Zam Sian Paing, BCM(Hons), MA., MDiv.MTh. USA, Lia Man Hau Vung, BA(Econimic) MBA., Mg Nang Muan Lian, BA.(English) (USA) ahi uh hi.
Pasian’ na a sepna a tomkim in: (1) June 1, 1993-March 10,1977-Lai Siangtho sangkah Bangalore, Khrisitian i cih kua ahi hiam? (Who is a Christian?) cih laibu neu Manglai pan in Tedim pau in tei khia hi. (2) August 1,1977-April 30, 1986- Tongznag AG Pawlpi Senior Pastor, Tedim AG Section Superintendent(Partime), No. 3 Distric Council Yangon EP Member sem hi. (3) May 1, 1986-April 30,1993- Tedim AG Section Superintendent (hunbit), No.3; District Council Yangon EP Member, Principal-Pentecostal Bible School, Tedim (Tu’n Bethel Bibel College), (4) May 1, 1990-April 30,1993- Tedim AG Section Superintendent(hunbit), Superintendent No. 4, District Council Kalaymyo(part time), AG General Council Yangon EP Member, (5) May 1,1993March 31,2011- Kawlgam bup AG General Council Yangon, General Treasurer (hunbit), Board Member-The Bible Society of Myanmar, Business Manager-Evangel Bible College, Yangon,
Hilhcianna Kithuah Lai Siangtho tei Editor & Managing Director sem in hih Tedim pau Study Bible pen Kawlgamah Tedim mite a nei masa pen hong suak hi. Tua banah TEDIM GAM AG PAWLPI TANGTHU bu zong gelh hi. Tedim pau tawh akinei masa pen Tiddim Chin 1977 Edition akici Lai Siangtho bu pen Piancilna pan Mangmuhna dong a tate tawh computer sungah khenkhia uh a, Kawlgam Bible Society phalna tawh hilhcianna ki thuah Lai Siangtho bu in aki zat khit ciangin 2017 kumin The Bible Society of Myanmar, General Secretary Rev. Khoi Lam Thang’ huhna tawh internet, iOS leh Android pan in a ki sim khiat theih dongin sem khia hi.
