Rev Thang Khawm Pau
Rev Thang Khawm Pau pen Pa J. Gin Za Tuang leh Nu Ging Khaw Don te ta upapen hi a, 15.12.1952 in Tedim khua ah suak hi. Pilna zonna tawh kisai in amasa in State High School, Tedim leh Mindat ah kah hi. 1972 kumin Mindat pan tan sawm ong a, tua kum mah panin Mandalay Arts & Science University ah zom a, 1977 kumin B.A (Geography) degree ngah hi.
Mandalay University ah asangkah lai-in University Christian Fellowship (UCF) ah hahkat mahmah in, Tedim EBC pawlpi ah zong khangno makai sema, tua te tungtawn in Pasian nasem ding sapna ngah hi. Tua panin kumpi sangkahna tawh lungkim zolo in, Berean Baptist College & Seminary, Bangalore, India ah Lai Siangtho sangkah a, 1983 kumin B.D ngah hi. Sang azawh ciangin Tedim EBC pawlpi ah 1984-1988 dong kum 4 sung pastor sem hi.
1986 kum Faith Baptist Bible College & Seminary akihon akipan tuciang dong Lai Siangtho sangsia sem hi. Tua pan Pasian lam honsakna tawh Master’s Seminary, Sun Valley, USA ah Lai Siangtho sang zom a, M.Div ngah hi. Tua pan hong kik tak teh lailam nasepna, sanglam nasepna leh gambup nasepna te kipan hi. 1997-2002 dong term nih sung EBC gambup ah General Secretary sem a, upa tintan phuankhia in, gambup computer vaihawm in, na tampi tak sem hi.
Ama private nasepna tawh laibu, limsang upna, Pasian kamciam damna, upna laigil te bawlin mailam ah zong laibu hoih tampi bawl ding, tei ding ngimna nei hi. Tua banah tu laitak in ih zat Tedim labu thak hoih mahmah ama veina tawh hong bawlin EBC gambup ah hong piakhia hi. 2005 kum ciangin, pilna sinna sang Cornerstone-Children Academy phuan in sang naupang tampi te in pilna sin ziahziah uh hi.
1987 kumin azi Nu Ciin Lun Vung tawh kiteeng a, tapa 1 leh tanu 2 nei uh hi. (1) Lia Don Sian Nuam B.A (English) Pensacola Christian College, Florida Christian Education. (2) Tg Tuang Sian Hon Thang B.A (English) Pensacola Christian College, Florida, USA. (3) Lia Mang Sian Cing matric ong. Pensacola Christian College, Florida, USA.
