Pa Kap Khen Pau @ Kapno
Tedim Myonee, Pangzang khua, Pu Lam Khen Thang, (Guite) leh Tedim Myonee, Heilei khua, Pi Hau Khen Cing (Thatmun)te sung pan 11.8.1969 kum in Munlai, khua, Kalay Myonee ah suak hi. 1.1.1995 ni in Rev. On Khan Pau in Munlai ah tuiphum hi. Sangkahna: SHS, No. 2 panin tan 10 zo hi (1985-86). BA.(His) 1997, UDEYangon, MBA, 2002, Yangon Institute of Economics Department of Management, Hlaing Campus, Yangon pan in buaih ngah hi. Sanggam suahpihte(1) Nu Hau Ngo Cing (2) Nu Cing Za Lian (3) Tg Pau Suan Mung(si) (4) Tg Thang Za Mang (5) Nu Man Sian Lun te ahi hi.14.1.1997 ni in Nu Toe Toe Naing (Valte beh), BSc., Dip.A.Psy, (Yangon University) tawh Munlai Baptist Church ah Rev. Nang Khan Do in pum khat suak sak hi.
Tate: (1) Tg Thang Lian Mang 4th year BA(English), UDE-Yangon, 3rd year BE(Civil), Seo Kyeong University, Yangon Campus, (2) Lia Cing Sian Lian, Grade 10, BEHS-1 Dagon.
Nuntakna-Business -1985 pan tuni dong (1985-86 India gamgi teng ah van zuak; 1988-89 Tan sawm sangnaupang te manglai hilh, 1990-2010 Mogoke,Bombay(Mombay), Yangon ah Kham leh Suangmanpha lei/zuak, 1999 in Manipura Trading Enterprise min tawh Company nei, 2012 in K-Synergy Service Company nei, sum le pai tawh kisai laibu pawlkhat Tedim pau tawh tei-in laibu in bawl a thugenna zong nei thei zel hi.
Religious –Tan lang pan tan sawm dong Munlai Tuiphum Pawlpi ah Sunday School kah a, pahtawina ngah den hi. Monywa College akah kum 1986 pen Monywa Tuiphum Pawlpi kipat kum hi a, sia Carson Cin Khen Tuang le Monywa a Thu-um innkuan pawl khat leh college sangnaupang te kipawl in amasa bel Christmas bawl uh hi. Yangon New Apostolic Church ah kum khat (1989) kihel a, khangno makai sem hi. Insein a om (1988-90) sung Biakna deidanlo a Pasian biakpiak khopna neihpih a, Christmas bawl pih zel hi. Yangon EBC ah kum li (1990-94) kihel hi. Yangon Zomi Baptist Church ah kumnih (1995-96) kihel hi.
Tedim Baptist Church-Yangon (TBCY) piankum 1997 pan tuni dong TBC-Y Pawlpi ah Upa sem a, panmun tuamtuam ah mapang hi. President asep masak 2009 kumin Biakinn lamkhuan ngahpih a, President anihvei sepna 2013 kumin Biakinn honpawi neihpih hi. Tedim Christian College piankum 2000 pan tuni dong Board of Trustee ah kihel hi. Tedim Baptist Convention pian nading thapia in panpih hi. ZBC kum za (1999) pawi Hakha ah TBC-Y khangno te tawh kithuah in kihel hi. MBC khawmpi(2000) Tisule, Kayah State ah MBC GS angah TBC-Y Senior Pastor Rev. Dr. S Pau Khan En uap dingin pawlpite tawh na kihel thei hi.
Social –Pau le lai le ngeina a khantoh nading laibu honkhat bawl hi. College akah lai (1987) in Monywa ah Chin National Day bawlna ah makai hi. Tedim kipawlna Yangon kipat kum 2000 pan tuni dong EC member hi den hi. Khamtung ah zusa in lo teng susia in kial atun kum 2008 in Yangon pan Chin Mautaam Relief Committee phuan in sumzonna nei uh a, angah khempeuh Paletwa, Matupi leh Thantlang ah khak uh hi. Khamtung gam khantoh nading a veina tawh 2012 kumin Environmental and Economic Research Institute (EERI) Director le alawmte Tedim ah paipih in thu kikupna neihpih hi.
Tua hangin Pa Vung Suan Pau in Kabamyi Chittu Athusu ngah hi. 2012 December kha in US Embassy pan Counsellor le adang nih khamtung khuapi tuamtuam ah paipih a, Tedim atunciang khuanu khuapate tawh kimel theihnaleh ankuang um khopna neisak hi. Zinte in nuamsa in lungdam mahmah uh aihman in Tedim te in US ah Visit tawh baihtakin paitheih na’ng lampi ong kihong hi. Tedim ah Private Bank aomding lunggulh mahmah a Kanbawza Bank te huhna anget leh ngahnapi Tedim ah innmun ongzon uh ciang haksatna om ahih manin Falam te’n ngah hi. Lungkialo in hanciam toto a, tu taktak ciangin First Private Bank te’n ong hong taktak tading hi.
Political -2012 bi-election ah NLD te ong kihelciang gamvai kisemthei zawdeuh ding cih upnanei ahih manin 2013 pan 2015 dong gamvai thusinna leh nasepna nakpi takin nei hi. A lawmte 4 tawh Civil Society Organization (CSO) khat phuan uh a, amin dingin The Serenity Initatives (TSI) phuak uh hi. Director sem hi. 2013-14 sung Chin State Myone 9 ah Capacity Development Training pia kawikawi uh hi. 2014 July-Sep sung Union Election Commission (UEC) phalna tawh Voter List Update Pilot Project pen Alone, Tedim, leh Myitkyina ah bawlsak uh a, tua etteh in gambup Voter List a kibawl ahi hi. UEC Chairman U Tin Aye in Naypyitaw ah Banquet annek pihna nei a, tualaiah UEC Commissioner teng, States and Regions pan Chairman teng, EU pan mi nih, USAID pan mi nih, le CSO bup tangin kei ka kihel hi. 2015 kitelpi hunciang mekhiatdan tawh kisai thusinsakna, pau nam tuamtuam tawh laibu bawlna, laidal bawlna leh website pan hunlap a thuzaksakna bawl uh hi. Website min pen www.merin-online.org ahi hi. Suahtakna le kikimna aom nading hanciam mahmah hi. TV leh media tuamtuam te tawh interview neithei zel a, ki suaksak zel hi. 2016 ciang Open Sesame Myanmar (OSM) kipan a Excutive Director sem in pau nam 15 tawh Civic Education laibu bu-30000 bawl in gambup ah hawm hi.
