Pu Dam Khua Hau
Pu Ngul Langh (Suankhup) leh Pi Niang Zen te tapa upen hi a, 11.3.1930 kumin Tedim khua ah suak hi. 1956 kumin Yangon United Christian High School (Cushing) sang panin matric zo i. 1957 kum ciang Rangoon University ah kah a, 1961 kumin B.A zo hi. Suankhup beh sung panin B.A zo masa pen ahi hi.
SHS Tedim sangpi ah Senior Assistant Teacher (SAT) sem hi. 1961 kumin Buddha Biakna gambup Biakna ki suak sak ding cih thu a gin ciangin Rangoon University sangnaupang te thukim lo a, “Rangoon University Minority Students Alliance” phuan a, Kachin mi Zauseng tawh kop in makai pi (President) sem hi.
A nung ciangin Zauseng, KIA gam sung makai pi suak hi. 1964 kum April 9 ni-in sum buuk khempeuh kumpi neihsa aki suah sak ciang leh kumpi thukhun (Policy) mualtung mite mailam a dingin lam en om salo ahih manin kumpi laih ding vaihawm in India gam bel hi. India ah kumpi tung lungkim lo gam a ding a sum ngam teng kituah uh a, U Son Cin Lian (M.P), U Hrang Nawl (M.P), Lt Col.Son Kho Pau te tawh kopin kumpi tung huhna ngen uh hi.
India kumpi in huh ding kamciam pia a, ahih hang “No sungah makai (president) khat hong kiteel un” acih ciangin makai ding a teel pa uh U Hrang Nawl muang zolo ahih manin hong kikhen uh hi. 1965 kum April kha ni 9 ni-in Kawl kumpi khut sungah ki ap kik (surrender) hi. Kumpi te’n avekpi in Falam thong ah keem uh hi. 1969 November 1 ni-in Falam thong panin amah khan kipia a, suahtakna ngah hi.
Amah khan tang Dr. Sian Za Kham, Bo Kham Cin Pau leh Mangpi Kiam Si te hi. A thu asian ciang in Tedim ah om in Mang kam sinna sang hong hi. 1983 kum kipat lamin Khampat, Thahdo beh te in Manglai hilh dingin cial ahih manin vapai hi.
30.7.1983 niin Khampat khua ah Leitung nusia hi. Hong nusiat in kum (51) pha hi. Sanggam laizom numei 6 leh pasal 3 hi a, a upen S/m Luan Za Cing ahi hi. (1)Nu Luan Za Cing + Rev Hau Go (sukte)(2) Pa Dam Kho Hau + Nu Nian Kho Niang /Nu Cing Khan Vung /Nu Niang Khan Zam.(3) Nu Cing Khaw Vung + Bo Pau Khan Lal (Sukte)(4) Nu Hau Khan Niang + Lt Col. Zam Khan Thang (Buansing)(5) Nu Huai Kho Man + Sia Gin Khan Cin (Tangpua)(6) Nu Suan Ngaih Cing + Pa Phung Za Pau(7) S/m Lian Khan Ciin + Sia Pum Thang(9) Sia Zam Za Dal + Nu Niang Man Lian.
