Pu Thual Zen (General)
General Pu Thual Zen pen Tedim khua gei Laamzang khua a piang hi a, a gol ciangin galkap tumin Sgt, santhum angah ciangin pension la in tawp hi. Sum bawl kipan a, sum tawm khat hong cih thei ta hi. 1962 kumin Democracy Party phiat mai in galkap kumpi in kawl gam adeih bangin hong uk hi. Gam mi khempeuh in thuak zolo haksa sa, nuam sa lo in ki om hi.
9.4.1964 ni-in galkap kumpi in sum buuk khempeuh hong laksak in, 18.5.1964 ni-in dangka 50 lai leh 100 lai si sak leuleu hi. Mi khempeuh kilung kimlo ahih manin kumpi suan khia dingin Sgt, Thual Zen (Laamzang), U Son Cin Lian (Tedim-Sezang), U Dam Kho Hau (Tedim), U Mang Khan Pau (Circle Chairman-Gelnual), U Tuah Za Lian te makai in India kumpi bel in India panin U Ral Mung (MP Hakha), U Hrang Nawl (MP Thlantang), Col. Son Kho Pau (Thuklai) te tawh va kigawm uh hi.
India kumpi Lal Bahadur Shastri hi a, New Delhi ah kimu uh hi. India kumpi in huh nading kamciam pia a, no sungah makai pi hong kitel un ci-in a sawl ciang U Hrang Nawl a teel uh hi. Pawl khat in muang zolo ahih manin kikhen thang uh a, India kumpi in huh theilo hi. Col. Son Kho Pau makaih galkap sin Pakistan panin thau vui thau tang tawh hong ciah mi 30 te U Hrang Nawl in makaih in Rih, Hakha, Falam khua te luh hi. General Thual Zen in zong galkap 700 bang nei a, amah makai in Tedim luh ding sawm hi.
Tedim luh ding tawh kisai in General Thual Zen leh Zozum te Lailo gam suang kua ah 17.7.1965 kimuh khopna bawl masa hi. Kumpi lam pan Col. Van Kulh, Lt Col. Put Pa, leh Menzi Thawng Cin Thang te kihel a, gal piang sak lo in na khawl uh leh mawh mai na kumpi in hongpia ding hi ci-in “Kamciam” pia in tua tawh kikap na omlo hi. Tuidil gamah a om sungin Laamzang khua te mah ahi Tedim Palik Sankhat Kai Zen makai in Thual Zen te pawl va delh uh hi.
Thual Zen te’n lam phung ah pang uh a, makai pa mah kaplum pah in a dang palik te tai mang uh hi. A luang man ding a innkuan pih te sum tampi pia hi. Tua panin Pu Thual Zen pawl a pang galkam 30 te kiangah zing an ne hi. A zingciang in Senam ah giak in, tua pan Suaklu khua ah Palik te kiangah a kipawl hihang ci-in va ki-ap hi. India Palik te’n kem a, asawt ciangin kawlgam hong puak kik hi. Kawl kumpi in Mandalay thongpi ah koih a, tua pan General Thual Zen si hi.
